Read Sehwi Hesekiel 39 Bible Online

Hesekiel 39 - Sehwi bible

Hesekiel 39

¹Na wɔ, Sona awa, hyɛ ngɔm tia Gɔgo ná kã kyɛ, AWURADE Nyameɛ nwa nyoo: Tie, wɔ Gɔgo bɔ edi Meseke ne Tubal so hene ɔ, meko metia wɔ!

²Ngɔmaa ɛkɔkakyi wɔ nwo kosa kɔwa, ngɔhwe wɔ ngɔhɔ, na ngotu wɔ ngofi sorɔ dɔ paa maa ɛkɔɔfa koɛ kɔtoa Yisrael mmokaa nemɔ.

³Na afei ngobubu w’agyaen mɔ bɔ bɛwɔ wɔ sa bɛen nu ne, na ngɔma w’agyaen mmakaa bɔ bɛwɔ wɔ sa famaa nu ne kɔye kogua ase.

⁴Ɛkɔtɔ wɔ Yisrael mmokaa so, ɛne wɔ lɔen amukoraa ne maen maen bɔ bɛboka wɔ so ne yeɛ ɛmɔkɔtotɔ ɔ. Na ngɔfa wɔ ngɔma nnomaa ahoroɔ bɔ bɛkye ngaka bedi, ɔne ngaka aboyaa maa bekoli.

⁵Aseɛ pralaa so yeɛ ɛkɔtɔ ɔ, ofikyɛ me yeɛ mahã ɔ, AWURADE Nyameɛ noa dwirɛ ɛne.

⁶Magɔgo ne bɛ bɔ bɛtete asomdwee nu wɔ supɔ nemɔ aso ne, ngɔsoma see maa ɔkɔhɔ bɛ so, na bekonwu kyɛ me ole AWURADE.

⁷“Ngɔla me dumaa krongron ne ali wɔ me maen Yisrael nu, mengɔma bengogua me dumaa krongron ne nwo fiɛ ko; na maen maen nemɔ bekonwu kyɛ me ole AWURADE, Yisrael nu Krongronniɛ ne.

⁸Tie, ɔbaasi, na okosi koso, AWURADE Nyameɛ noa dwirɛ ɛne. Kyẽa bɔ mahã ye nwo dwirɛ ne, ye ɛne.

⁹“Na afei mmenia bɔ bɛtete Yisrael nguro nemɔ aso ne, bɛkɔɔfa akodeɛ nemɔ bekohua see; bɛkɔfa akokyɛm nemɔ, buralɛ ndaadeɛ, agyaen ne agyaen mmakaa, mmopura ne pealɛɛ nemɔ bɛkɔsɔ see, na bɛkɔfa bɛkɔsɔ see afoɛ nzoo.

¹⁰Na ɔnate sɔ ati, bɛngɔpena eyein wɔ eburo, yeɛ bengobubu ebie wɔ ɛhɔayeɛ nemɔ anu, ofikyɛ akodeɛ nemɔ yeɛ bɛkɔfa bɛkɔsɔ see ɔ. Na bɛ bɔ bɛfene bɛ nningyein ne, bɛ koso bɛkɔfẽ bɛ deɛ bie; yeɛ bɛ bɔ bɛbɔle bɛ so apaa ne, bɛ koso bɛkɔbɔ bɛ so apaa bie, AWURADE Nyameɛ noa dwirɛ ɛne.

¹¹“Na ɔkɔwa kyɛ, sɔ kyẽa ne, ngɔma Gɔgo aseɛ bɔ bekosie ye so ɔ wɔ Yisrael, wɔ Akwandufoɛ Bɔnza bɔ ɔwɔ ɛpo eyia afiteleɛ ne anu, bɔnza bɔ osi akwandufoɛ atee ne. Berɛ yeɛ bekosie Gɔgo ne ye lɔen worawora ne amukoraa ɔ, na bɛkɔfrɛ berɛ Hamon Gɔgo Bɔnza.[12]

¹²Na Yisrael awuro ama kɔfa ɛsraen nzoo yeɛ bekosie bɛ ɔ, kyɛ bɛfa bɛpete aseɛ ne anwo.

¹³Aseɛ ne aso ama mukoraa kosie bɛ, na ɔkɔyɛ dumaa paa kɔma bɛ wɔ kyẽa bɔ ngɔla m’animnyam ali ne, AWURADE Nyameɛ noa dwirɛ ɛne.

¹⁴Bekotu mmenia bekosie berɛ maa mmerɛ biala bekohyinihyini aseɛ ne aso bekosie efuin mɔ bɔ baha wɔ aseɛ ne aso ne, kyɛbɔ ɔnate so bɛkɔpete aseɛ ne anwo ɔ. Na ɛsraen nzoo ne, sɛ ɔso a yeɛ bekohyini bɛkɔpena efuin nemɔ ɔ.

¹⁵Na sɛ sɔ mmenia nemɔ bekyinikyini aseɛ ne aso, ná bɛ nu bie nwu sona bowue a, ɔkɔfa sɛngyerɛnneɛ bie kɔhyɛ berɛ nzorɛ, kɔpem kyɛ mmenia bɔ besie fuin nemɔ ne bekosie ye wɔ Hamon Gɔgo Bɔnza ne anu ɔ.

¹⁶(Kuro bie koso wɔ berɛ bɔ oli Hamona ɔ.) Sɔ yeɛ bɛkɔyɔ bɛkɔpete aseɛ ne anwo ɔ.

¹⁷ “Na wɔ, Sona awa, AWURADE Nyameɛ nwa nyoo: Se nnomaa ahoroɔ amukoraa ne eburo ngaka amukoraa kyɛ, ‘Ɛ́mɔhã bɛ nwo bɛbɔ nu bɛbra, ɛ́mɔboaboa ɛmɔ noa béfi nekaa biala bɛbra m’afɔleɛ poentolɛ bɔ meto mema ɛmɔ ne abo. Ɔte Yisrael mmokaa so afɔleɛ poentolɛ kandinga, na ɛmɔkoli naen bɛkɔno mogya.

¹⁸Ɛmɔkoli katakyie mɔ bɛ naen, ná ɛmɔano aseɛ so ahemvo mɔ bɛ mogya, mmoaen nyii, mmoaen mmaa, mbɔngye, nandwie nyii, bɛ mukoraa bɛte Basan ngaka bɔ balɔ ɔ.

¹⁹Na m’afɔleɛ poentolɛ bɔ meto mema ɛmɔ ne abo, ɛmɔkoli ɛloe kɔpem kyɛ ɛmɔ ko koyi ɔ, yeɛ ɛmɔkɔno mogya kɔpem kyɛ ɛmɔkɔbo ɔ.

²⁰Me poentolɛ ne abo, ɛmɔkoli mbɔngɔ, pɔngɔhanɛfoɛ, katakyie mɔ ne koɛhonɛfoɛ amukoraa naen kɔma ɛmɔ ko koyi,’ AWURADE Nyameɛ noa dwirɛ ɛne.

²¹“Ngɔla m’animnyam ali wɔ maen maen mɔ nu, na maen maen nemɔ konwu me ndɛenbualɛ bɔ mabua ɔ, ɔne m’asohwenɛ bɔ mamaa wawa bɛ so ɔ.

²²Na ofi sɔ kyẽa ne bɔ ɔkɔ ɔ, Yisrael awuro ama konwu kyɛ me ole AWURADE bɛ Nyameɛ.

²³Na maen maen mɔ konwu kyɛ Yisrael awuro ama b’amumuyɛɛ ti yeɛ ɔmaa bɛhyele bɛ nnure bɛhɔle ɔ: banni nahorɛ bamma me, yiti mvale me nyunu mveale bɛ, na mvale bɛ nwurale bɛ pɔfoɛ mɔ sa, na bɛ mukoraa bɛtotɔle ngrandɛ noa.

²⁴Me ne bɛ lili ye kyɛbɔ bɛ fiɛ ne bɛ mmeraatolɛ te ɔ, na mvale me nyunu mveale bɛ.

²⁵“Yiti AWURADE Nyameɛ nwa nyoo: Ngosa ngɔfa Yakob ngofi nnurehyelɛ nu ngɔwa, na ngonwu Yisrael awuro ama mukoraa anwumvoin, na ngɔhwe me dumaa krongron ne nwo nungunɛ.

²⁶Bɛ wora kofi b’animguaseɛ ne nahorɛ amukoraa bɔ banni bamma me ɔ, mmerɛ bɔ bɛte b’aseɛ so asomdwee nu bɔ ebiala onnwunanwuna bɛ ɔ;

²⁷mmerɛ bɔ maafa bɛ mafi maen maen mɔ nu masa mawa, bɔ maaboaboa bɛ noa mafi bɛ pɔfoɛ mɔ aseɛ mɔ so, ná mafa bɛ so mala me krongronyɛlɛ ali wɔ maen maen pee bɛ nyunu ɔ.

²⁸Na afei bekonwu kyɛ me ole AWURADE bɛ Nyameɛ, bɔ mmaa bɛhyele bɛ nnure bɛhɔle maen maen so, ná afei maaboaboa bɛ noa mafa bɛ mawa bɛ bɔbɔ b’aseɛ so, bɔ manyakyi bɛ nu biala wɔ dɔ ko ɔ.

²⁹Mengɔfa me nyunu mengɔfea Yisrael awuro ama ko, ofikyɛ mahwie me Sunzum magua bɛ so, AWURADE Nyameɛ noa dwirɛ ɛne.”