Read Sehwi Hesekiel 4 Bible Online

Hesekiel 4 - Sehwi bible

Hesekiel 4

¹“Wɔ, Sona awa, fa nyɔboɛ tafaa to wɔ nyunu, kolikoli Yerusalem kuro ne gua so;

²tua kuro ne, yɔ nyinasoɛ bɔ bɛkɔfo so bɛkɔhɔ kuro ne anu ɔ, boaboa anweaa sire wɔ ye si, kyekye asikyeleɛ pɛ ye nwo bra yia, ná fa nikyee bɔ bɛfa bedwiri fasue begua ɔ pɛ ye nwo bra yia.

³Afei fa buralɛ tɛtrɛtɛɛ, fa yɛ buralɛ fasue wɔ wɔ ne kuro ne b’afia, fa wɔ nye kyire ye, maa ɔyɛ kuro bɔ batua ye ɔ, ná tua ye serɛserɛ. Na ɛhe kɔyɛ sɛngyerɛnneɛ kɔma Yisrael awuro ama.

⁴“Afei, da hyerewaa so wɔ wɔ bɛen so, ná fa Yisrael awuro ama b’amumuyɛɛ gua wɔ so. Na ngyẽa somaa biala bɔ ɛla hyerewaa so nen, né b’amumuyɛɛ yeɛ asoa ɔ.

⁵Ofikyɛ mahyehyɛ ngyẽa somaa bie mama wɔ, bɔ ye somaa ne, ɔne b’amumuyɛɛ afoɛ ne somaa te pɛ ɔ, na ɔte ngyẽa ɛyaa nza ne aburahona bɔ yeɛ ɛkɔfa kɔsoa Yisrael awuro ama b’amumuyɛɛ ɔ.

⁶Na sɛ ɛyɔ sɔ yie a, da hyerewaa so bieku, wɔ wɔ famaa so, ná soa Yuda awuro ama b’amumuyɛɛ eleburanna. Mafa ɛlɛho biala magyina berɛ mama afoɛ ko mama wɔ.

⁷Afei, fa wɔ nye kyire Yerusalem bɔ batua ye ne, bɔ wɔ sa nwo te kwaterekwa ɔ, ná hyɛ ngɔm tia kuro ne.

⁸Tie, ngɔfa nyamaa ngɔkyekye wɔ, bɔ ɛngɔhora ngɔpɛne wɔ nwo ngofi wɔ bue ko aso ngɔhɔ ko aso ɔ, kɔpem kyɛ ngyẽa bɔ ɛfa tua kuro ne kɔwa ayieleɛ ɔ.

⁹“Wɔ, fa atokoɔ, ayuo, aluaa, ngongo, aburoo ne ɛmo. Fa gua kukue ko anu, ná fa yɛ aleɛ. Na ngyẽa somaa bɔ ɛla hyerewaa so, bɔ ɔte ngyẽa ɛyaa nza ne aburahona ne, ye yeɛ ekoli ɔ.

¹⁰Na ɛlɛho biala w’aleɛ bɔ ekoli ne, odi kyɛ ɛkari kilo ko ye ngyɛmuɛ nnu nu ko, na ɛlɛho biala odi kyɛ edi ye mmerɛ noa mmerɛ noa.

¹¹Nzue koso, odi kyɛ esusu koraka né ano; ngoo towaa ne, ye ngyɛmuɛ nzia nu ko, na ɛlɛho biala odi kyɛ ɛno ye mmerɛ noa mmerɛ noa.

¹²Di sɔ aleɛ ne kyɛbɔ edi ayuo apiti ne ala. Fa sona ye bondua bɔ wahɔ ɔ kua see, ná toto sɔ aleɛ ne wɔ so wɔ bɛ nyunu berɛ.”

¹³Yeɛ AWURADE sele kyɛ, “Sɔ ala yeɛ Yisraelfoɛ bekoli b’aleɛ bɔ ye nwo nde ɔ, wɔ maen maen mɔ bɔ ngɔsoa bɛ ngɔhɔ so nemɔ anu ɔ.”

¹⁴Yeɛ nzele kyɛ, “Ao, AWURADE Nyameɛ, me kra nwo ogguale fiɛ le; ofi me ngwadaa nu bɔ ɔbaadwu ɛnɛ ɔ, nnnili kaka bɔ ye bɔbɔ wawu ɔ anaa bɔ kaka bie ahye ye ɔ le, yeɛ akyiwadeɛ naen biala ɔhhane me noa le.”

¹⁵Yeɛ osele me kyɛ, “Yoo, mate. Nzaade ngɔmaa ɛkɔfa nandwie bii ekosi sona bondua gya nu, ná ato w’aleɛ ne wɔ so.”

¹⁶Osa sele me kyɛ, “Sona awa, tie, nekaa bɔ Yerusalem onya ye aleɛ fi ne, ngɔma ye bo kɔpɛ; na bɛkɔfa ahunundetelɛ bɛkɔkari aleɛ kaaba bie bekoli, na bɛkɔfa anwodwiri yeɛ bekosusu bɛ nzue bɛkɔno ɔ;

¹⁷amaa ɔnate so aleɛ ne nzue nwo ayɛ se ama bɛ; na ebiala nwu obiɛngo a, ye nwo kɔyɛ ye anwodwiri, na ɔnate bɛ bɔne ti bɛkɔfɔ bɛkɔtete.