Read Sehwi Hesekiel 40 Bible Online

Hesekiel 40 - Sehwi bible

Hesekiel 40

¹ Bɛhyele yɛ nnure bɛhɔle ne, ye afoɛ aburanyɔ ne nnu ne anu, afoɛ n’ahyɛaseɛ bosome ne anu eleburu ne aso, bɛbɔle kuro ne ɔ, né ye afoɛ buru ne nna ɛne, sɔ kyẽa ne ala yeɛ AWURADE tumi wale me so ɔ, na ɔfale me wale berɛ.

² Nyameɛ nyekyire ne anu, ɔfale me wale Yisrael aseɛ so, na ɔfale me oogyinane bokaa tendenn paa bie aso, bɔ né so te kyɛ kuro bɔ bakyekye ye wɔ ngwaen dɔ ɔ.

³ Na ɔfale me wale berɛ nen, yieee, né biaa bie wɔ berɛ bɔ ye sue te kyɛ kɔɔbere ɔ. Né ogyi anoa piri ne anu berɛ, né otira nyamabire ne elemmire bɔ bɛfa besusu nikye ɔ.

⁴Na biaa ne sele me kyɛ, “Sona awa, fa wɔ nye nea, ná fa wɔ so tie, ná ma w’adwene bra bɔ mebaala ye ali mekyire wɔ ne amukoraa so; ofikyɛ mvale wɔ mmale wa, kyɛbɔ ɔkɔyɛ bɔ ngɔye ngohyire wɔ ɔ. Bɔ enwu ye amukoraa, bɔ ye dawure kyire Yisrael awuro ama.”

⁵ Na nwuni fasue bie bɔ wapɛ awuro ne anwo wayia ɔ. Né biaa ne tira elemmire bɔ bɛfa besusu nikyee ɔ, bɔ ye tendenn te agyirɛ nzia, bɔ ko biala ye tendenn te agyirɛ ko ɔne bɛ sa mmɛseka ko ɔ. Fasue ne, osusuli ye sii nyunu ne, né ɔte elemmire ne ko; né ye aseɛnwo bɔ ɔkwaadwu ye anwuro ne koso ɔte elemmire ne ko.

⁶Na afei ɔwale ɛpoen bɔ ye nye nea eyia afiteleɛ ne anwo, ɔfole ye atweleɛ ndiasoɛ ne aso, osusuli anoa n’aponnwaa ne, na né ye tɛtrɛtɛɛ te elemmire ne ko, yeɛ ye tɛtrɛtɛɛ ko ne koso te elemmire ne ko.

⁷Pumbu ko biala, ye tendenn nu te elemmire ne ko, yeɛ ye tɛtrɛtɛɛ nu te elemmire ne ko. Atee bɔ ɔla pumbu nemɔ b’afia ne, ɔte agyirɛ nnu; na anoa n’aponnwaa bɔ ɔwɔ pato nu berɛ anoa ne nwo ne, ɔte elemmire ne ko.

⁸Afei osusuli pato nu berɛ atee bɔ ɔfa anoa piri ne anu nen, na né ɔte elemmire ko.

⁹Afei osusuli pato nu berɛ atee bɔ ɔfa anoa piri ne anu nen, né ɔte agyirɛ mmɔtwɛ, ye mbuna nemɔ te agyirɛ nyɔ; pato nu berɛ anoa ne, né ye nye kyire awuro ne anu dɔ.

¹⁰Eyia afiteleɛ anoa piri ne, né pumbu nza wɔ ye bue biala. Né esusu bɛ mmɛsa a, bɛ mukoraa bɛte pɛ; na mbuna bɔ bɛwɔ ye bue biala ne, esusu a, bɛte pɛ.

¹¹Afei atee bɔ ɔkɔ anoa piri ne anu ne, osusuli ye tɛtrɛtɛɛ nu nen, né ɔte agyirɛ buru; yeɛ ye tendenn nu koso te agyirɛ buru ne nza.

¹²Né simbini wɔ pumbu nemɔ nyunu, bɔ ye bue ko biala te agyirɛ ko ɔ; na pumbu nemɔ, bɛte agyirɛ nzia wɔ bɛ bue biala.

¹³Afei osusuli anoa piri ne fili pumbu ko ye anwuro oodwuli pumbu ko koso ye anwuro, na ye tɛtrɛtɛɛ te agyirɛ aburanyɔ ne nnu, ofi anoa ko bɔ ɔkwaadwu anoa ko ne.

¹⁴Afei osusuli ngurolo ne, né ɔte agyirɛ aburasia, na anoa piri ne asi berɛ yeɛ ɔte asa so ɔ.

¹⁵Efi anoanu berɛ anoa piri n’anyunu berɛ bɔ ɛkwaadwu ngurolo ne bɔ ɔwɔ anoa piri ne asi ne, ɔte agyirɛ aburannu.

¹⁶Né mboma bɔtɔfee mɔ lela pumbu nemɔ ne bɛ mbuna nemɔ anwo, ɔne bɛ mbuna mɔ bɔ bɛ nye kyire anoa piri bɔ bapɛ ye nwo bayia ne, yeɛ bɛ ngurolo nemɔ koso sɔ ala. Né mboma mɔ bapɛ ye kunu dɔ bayia, na né bali ayee bakaa adwii baguagua mbuna nemɔ anwo.

¹⁷Afei ɔfale me hɔle aluo berɛ pato nu berɛ, na yieee, né pumbu mɔ ne atee wɔ berɛ bɔ bapɛ aluo berɛ nwo bayia ɔ; né pumbu aburasa yeɛ bɛwɔ atee ne anoa ɔ.

¹⁸Né atee ne la anoa mbiri nemɔ nwo berɛ, bɔ ye tendenn te kyɛ anoa mbiri nemɔ ɔ, na atee he yeɛ ɔla aseɛnwo ne.

¹⁹Afei osusuli abrannaa ne tɛtrɛtɛɛ nu, ofi aseɛnwo dɔ anoa piri n’anyunu bɔ ɔkwaadwu ye kunu dɔ aluo berɛ ne, na né ɔte agyirɛ ɛyaa ko wɔ ye eyia afiteleɛ so ne ye sorɔ.

²⁰Na anoa piri bɔ ye nye kyire sorɔ dɔ, bɔ atee la berɛ kɔ aluo berɛ pato nu berɛ ne, osusuli ye tendenn nu ne ye tɛtrɛtɛɛ nu.

²¹Na ye pumbu nemɔ, nza wɔ ye bue ko, yeɛ nza koso wɔ ye bue ko; na ye mbuna nemɔ ne abrannaa ne, esusu a bɛ ne anoa piri bɔ oli moa ne bɛte pɛ. Ye tendenn nu te agyirɛ aburannu, yeɛ ye tɛtrɛtɛɛ nu te agyirɛ aburanyɔ ne nnu.

²²Ye mboma nemɔ, ye abrannaa ne, ye ayee mmakaa adwii ne, esusu a ɔte kyɛ anoa piri bɔ ye nye nea eyia afiteleɛ so ne. Atweleɛ ndiasoɛ nzoo yeɛ ɛfa fo kɔ so ɔ, na ye abrannaa ne wɔ ye nyunu berɛ.

²³Né anoa piri bie wɔ ye kunu dɔ aluo berɛ bɔ ye nye kyire sorɔ dɔ anoa piri ne, kyɛbɔ ye nye kyire eyia afiteleɛ ne ɔ. Na osusuli, na efi anoa piri ko bɔ ɛkwaadwu ko ne, ɔte agyirɛ ɛyaa ko.

²⁴Yeɛ ɔfale me hɔle ngwaen dɔ, na nwuni anoa piri bie bɔ ye nye nea ngwaen dɔ ɔ. Osusuli ye mbuna ne abrannaa ne, na né bɛte kyɛbɔ esusu ko nemɔ a bɛte ne ala.

²⁵Né mboma apɛ ye ne ye abrannaa ne anwo bayia, kyɛbɔ mboma hene mɔ bɛte ne ala. Né ye tendenn te agyirɛ aburannu, yeɛ ye tɛtrɛtɛɛ nu te agyirɛ aburanyɔ ne nnu.

²⁶Né ole atweleɛ ndiasoɛ nzoo bɔ bɛfa bɛfo so ɔ; né abrannaa nemɔ wɔ bɛ nyunu berɛ; na né ayee mmakaa adwii wɔ ye mbuna nemɔ anwo, wɔ ye bue faen ne ye bue faen.

²⁷Né anoa piri bie wɔ ye kunu dɔ aluo berɛ wɔ ye ngwaen dɔ; na osusuli fili anoa piri oodwuli anoa piri wɔ ngwaen dɔ, na né ɔte agyirɛ ɛyaa ko.

²⁸Afei ɔfale me fale ngwaen dɔ anoa piri ne anu hɔle ye kunu dɔ aluo berɛ, na osusuli ngwaen dɔ anoa piri nen; né ɔte kyɛbɔ esusu ko nemɔ a bɛte ne ala.

²⁹Ye pumbu mɔ, mbuna mɔ ne ye abrannaa ne, bɛte kyɛbɔ esusu ko nemɔ a bɛte ne ala. Né mboma mɔ bapɛ nu ɔne ye abrannaa ne aso babra bayia. Ye tendenn nu te agyirɛ aburannu, yeɛ ye tɛtrɛtɛɛ nu te agyirɛ aburanyɔ ne nnu.

³⁰Né abrannaa apɛ ye nwo ayia, bɔ ye tendenn nu te agyirɛ aburanyɔ ne nnu, yeɛ ye tɛtrɛtɛɛ nu koso te agyirɛ nnu.

³¹Ye abrannaa ne, né ye nye kyire aluo berɛ pato nu berɛ. Né ayee mmakaa adwii wɔ ye mbuna nemɔ anwo, na ye atweleɛ ndiasoɛ ne te mmɔtwɛ.

³²Afei ɔfale me hɔle ye kunu dɔ aluo berɛ, wɔ eyia afiteleɛ so; na osusuli anoa piri nen, né ɔte kyɛbɔ esusu ko nemɔ a bɛte ne ala.

³³Ye pumbu mɔ, mbuna mɔ ne ye abrannaa ne, bɛte kyɛbɔ esusu ko nemɔ a bɛte ne ala. Né mboma mɔ apɛ nu ɔne ye abrannaa ne aso babra bayia. Ye tendenn nu te agyirɛ aburannu, yeɛ ye tɛtrɛtɛɛ nu te agyirɛ aburanyɔ ne nnu.

³⁴Ye abrannaa ne, né ye nye kyire aluo berɛ pato nu berɛ. Né ayee adwii wɔ ye mbuna nemɔ anwo, wɔ ye bue faen ne ye bue faen, na ye atweleɛ ndiasoɛ ne te mmɔtwɛ.

³⁵Afei ɔfale me hɔle sorɔ dɔ anoa piri ne anwo dɔ; osusuli, na né ɔte kyɛbɔ esusu ko nemɔ a bɛte ne ala.

³⁶Ye pumbu mɔ, mbuna mɔ ne ye abrannaa ne, bɛte kyɛbɔ esusu ko nemɔ a bɛte ne ala. Né mboma mɔ apɛ nu ɔne ye abrannaa ne aso babra bayia. Ye tendenn nu te agyirɛ aburannu, yeɛ ye tɛtrɛtɛɛ nu te agyirɛ aburanyɔ ne nnu.

³⁷Ye mbuna ne, né ye nye kyire aluo berɛ pato nu berɛ. Né ayee adwii mɔ wɔ ye mbuna nemɔ anwo, wɔ ye bue faen ne ye bue faen, na ye atweleɛ ndiasoɛ ne te mmɔtwɛ.

³⁸Né pumbu bie wɔ berɛ bɔ ye anoa ne ɔwɔ anoa piri mbuna nemɔ anwo, wɔ nekaa bɔ benwunzi naen yeralɛ afɔleɛ nwo ne.

³⁹Na abrannaa so berɛ anoa piri ne anu, né ɛpoen nyɔ gyigyi bue ko, yeɛ nyɔ koso begyigyi bue ko, bɔ so yeɛ beku naen yeralɛ afɔleɛ, bɔne nwo afɔleɛ ne foɛlilɛ afɔleɛ ngaka nemɔ ɔ.

⁴⁰Na ye bue ko bɔ ɔwɔ nziɛ dɔ ne, bɔ ɛfa fo kɔ sorɔ dɔ anoa piri ne anwo ne, né ɛpoen nyɔ gyigyi berɛ; na ye bue dɔ ne koso, bɔ ɔwɔ ɛpoen piri n’abrannaa so ne, né ɛpoen nyɔ gyigyi berɛ.

⁴¹Né ɛpoen nna wɔ anoa piri ne bue faen, yeɛ ɛpoen nna koso wɔ ye bue dɔ. Ɛpoen nemɔ te mmɔtwɛ, bɔ so yeɛ beku afɔleɛ ngaka nemɔ ɔ.

⁴²Né ɛpoen nna gyigyi berɛ bɔ so yeɛ bɛbɔ naen yeralɛ afɔleɛ ɔ; bɛte nyɔboɛ bɔ base ɔ. So yeɛ bɛfa nningyein bɔ bɛfa beku naen yeralɛ afɔleɛ ne afɔleɛ ngaka nemɔ begua ɔ. Ko tendenn te agyirɛ ko ne bue, ye tɛtrɛtɛɛ nu te agyirɛ ko ne bue, yeɛ so kɔ anwuro agyirɛ ko.

⁴³Né ndɔkorɔ bɔ ye ndendenn te bɛ sa mmɛseka ko ɔ owurawura terɛ ne anwo bra yia; na ɛpoen nemɔ aso yeɛ né bɛfa afɔleɛ naen nemɔ begua ɔ.

⁴⁴Na ye kunu dɔ anoa piri ne asi dɔ, né edweintolɛfoɛ bɛ pumbu mɔ wɔ ye kunu dɔ aluo berɛ, wɔ sorɔ dɔ anoa piri ne anwo, bɔ bɛ nye kyire ngwaen dɔ ɔ. Né ko wɔ eyia afiteleɛ ɛpoen piri ne anwo, bɔ ye nye kyire sorɔ dɔ ɔ.

⁴⁵Na osele me kyɛ, Sɔ pumbu he bɔ ye nye kyire ngwaen ne, asɔfo mɔ bɔ bɛnea awuro ne aso ne yeɛ ɔte bɛ deɛ ɔ;

⁴⁶na pumbu bɔ ye nye kyire sorɔ dɔ ne, asɔfo mɔ bɔ bɛyɔ afɔleɛ bokyea ne aso adwuma ne, ɔte bɛ deɛ. Bɛ ole Sadoke boso ama, bɔ bɛte Lewi boso ama, bɔ bɛ yeɛ bepingye AWURADE bɛsɔne ye ne.

⁴⁷Na osusuli aluo berɛ. Né ɔte ahinanan. Ye tendenn nu te agyirɛ ɛyaa ko, yeɛ ye tɛtrɛtɛɛ nu te agyirɛ ɛyaa ko, na né afɔleɛ bokyea ne gyi awuro ne anyunu.

⁴⁸Afei ɔfale me hɔle awuro berɛ abrannaa ne aso, na osusuli abrannaa so mbuna nemɔ. Né ye bue ko te agyirɛ nnu, yeɛ ye bue ko koso te agyirɛ nnu. Na anoa piri ne, ye tɛtrɛtɛɛ nu, ye bue ko te agyirɛ nza, yeɛ ye bue ko koso te agyirɛ nza.

⁴⁹Abrannaa ne tendenn nu, ɔte agyirɛ aburanyɔ, ye tɛtrɛtɛɛ nu te agyirɛ buru ne ko. Ɔfale me fale atweleɛ ndiasoɛ bɔ bɛfa bɛfo bɛkɔ so ne aso. Né bonima mɔ gyigyi mbuna nemɔ anwo berɛ, ko wɔ ye bue faen, yeɛ ko wora wɔ ye bue dɔ.