Read Sehwi Hesekiel 46 Bible Online

Hesekiel 46 - Sehwi bible

Hesekiel 46

¹AWURADE Nyameɛ nwa nyoo: Ye kunu dɔ aluo berɛ anoa piri bɔ ye nye kyire eyia afiteleɛ so ne, odi kyɛ bɛto nu elesia bɔ bɛfa bɛyɔ adwuma ne; nakoso afofikyẽa ne de, odi kyɛ bebukye; yeɛ ɛsraen foforɛ kyẽa ne koso, odi kyɛ bebukye.

²Ɛhene ne, ɔkɔfa aluo dɔ anoa piri abrannaa ne aso ɔkɔhɔ nu, na okoogyina anoa piri aponnwaa ne anwo. Asɔfo nemɔ kɔbɔ ye naen yeralɛ afɔleɛ ɔne ye asomdwee afɔleɛ ne, na ɔkɔsɔne wɔ anoa piri aponnwaa ne anwo berɛ. Afei okofite, nakoso anoa piri ne de, onni kyɛ bɛto nu kɔpem kyɛ okodwu nɔsoa ɔ.

³Sɔ ala yeɛ odi kyɛ aseɛ ne aso ama bɛsɔne wɔ sɔ anoa piri ne anu afofingyẽa nemɔ ne ɛsraen foforɛ nemɔ anu, wɔ AWURADE nyunu ɔ.

⁴Naen yeralɛ afɔleɛ bɔ ɛhene ne ɔbɔ ma AWURADE wɔ afofikyẽa ne, odi kyɛ ɔyɛ mmoaen akrɔngrɔma nzia bɔ bellili nnɛen ɔne boaen nyii ko bɔ ollili nnɛen ɔ.

⁵Aleɛ afɔleɛ bɔ ɔfa boka boaen nyii ne aso ne, odi kyɛ ɔyɛ graa ko; yeɛ aleɛ afɔleɛ bɔ ɔfa boka mmoaen akrɔngrɔma nemɔ aso ne koso, ɔkɔyɛ bɔ ye sa kɔsõ so ɔ, ɔne graa ko biala ye nwo ngoo galɔn ko.

⁶Na ɛsraen foforɛ kyẽa ne, nandwie akrɔngrɔma ko bɔ ollili nnɛen, yeɛ mmoaen akrɔngrɔma nzia ne boaen nyii ko bɔ bellili nnɛen ɔ yeɛ odi kyɛ ɔfa bɔ afɔleɛ ɔ.

⁷Odi kyɛ ɔbɔ nandwie nyii ne nwo aleɛ afɔleɛ graa ko, boaen ne nwo aleɛ afɔleɛ graa ko, yeɛ mmoaen akrɔngrɔma nemɔ de, kyɛbɔ ye sa kɔsõ so ɔ, ɔne graa ko biala ye nwo ngoo galɔn ko.

⁸Na sɛ ɛhene ne ɔkwaawura nu a, odi kyɛ ɔfa anoa piri abrannaa ne aso, na berɛ ala yeɛ okosa kɔfa kofite ɔ.

⁹“Na sɛ aseɛ ne aso ama bɛba AWURADE nyunu wɔ mmerɛ bɔ bedi aluolue nemɔ a, ebiala bɔ ɔkɔfa sorɔ dɔ anoa piri atee ne aso kɔwa nu kɔɔsɔne ne, ngwaen dɔ anoa piri atee ne aso yeɛ odi kyɛ ɔfa fite kɔ ɔ; yeɛ ebiala bɔ ɔkɔfa ngwaen dɔ anoa piri atee ne aso kɔwa nu ne, sorɔ dɔ anoa piri atee ne aso yeɛ odi kyɛ ɔfa fite kɔ ɔ. Onni kyɛ osa kɔfa anoa bɔ ɔfale nu wale ne anu, na mmom odi kyɛ ɔkɔ ye nyunu tee fite.

¹⁰Sɛ bɛkwaawura nu a, odi kyɛ ɛhene ne ɔne bɛ bɛkɔ; yeɛ sɛ befite koso a, ɔne bɛ yeɛ bekofite ɔ.

¹¹“Na aluolue nemɔ ne nyianu ngyẽa nemɔ anu, aleɛ afɔleɛ ne kɔyɛ aleɛ graa ko ne nandwie nyii ko, aleɛ graa ko ne boaen nyii ko, na mmoaen akrɔngrɔma nemɔ nwo de, kyɛbɔ ye sa kɔsõ so ɔ, ɔne graa ko biala ye nwo ngoo galɔn ko.

¹²Sɛ ɛhene ne ɔbaabɔ akyɛdeɛ afɔleɛ ma AWURADE a, kyɛ naen yeralɛ afɔleɛ oo, anaa asomdwee afɔleɛ oo, odi kyɛ bebukye anoa piri bɔ ye nye kyire eyia afiteleɛ ne bɛma ye, na odi kyɛ ɔbɔ ye naen yeralɛ afɔleɛ ɔne ye asomdwee afɔleɛ ne kyɛbɔ ɔyɔ ye afofikyẽa ne ala. Afei odi kyɛ ofite, na ofite yie a, odi kyɛ bɛto anoa piri ne anu.

¹³“Boaen akrɔngrɔma bɔ wali afoɛ ko bɔ ollili nnɛen ɔ yeɛ ɛlɛho biala odi kyɛ ɛfa babɔ naen yeralɛ afɔleɛ ma AWURADE ɔ. Bɔ ye ngyerɛmɔ biala.

¹⁴Bɔ ye nwo aleɛ afɔleɛ ngyerɛmɔ biala, graa ko ye ngyɛmuɛ nzia, ɔne ngoo galɔn ko ye ngyɛmuɛ nza bɔ bɛkɔfa bɛkɔfɔre esam paa ne ɔ, ná ɔyɛ daa biala aleɛ afɔleɛ ma AWURADE, nhyehyɛleɛ bɔ ɔla berɛ daa hɔ ɛne.

¹⁵Odi kyɛ bɛfa boaen akrɔngrɔma ne, aleɛ afɔleɛ ne ne ngoo ne bɛba ngyerɛmɔ biala, maa ɔyɛ daa biala naen yeralɛ afɔleɛ.

¹⁶“AWURADE Nyameɛ nwa nyoo: Ɛhene ne, sɛ ɔfa agyapadeɛ ɔkyɛ ye mma mmienzua nemɔ anu bie a, agyapadeɛ ne kɔyɛ ye mma mmienzua nemɔ deɛ, b’agyapadeɛ bɔ waali bɛ sa hɔ ɛne.

¹⁷ Nakoso sɛ ɔfa ye agyapadeɛ ne bie ɔkyɛ ye somvoɛ mmienzua nemɔ anu ko a, ye de agyapadeɛ ne kɔyɛ somvoɛ ne deɛ kɔpem fawɔnwodi afoɛ ne, na afei agyapadeɛ ne kosa kooli ɛhene ne sa. Ye mma angome yeɛ ye agyapadeɛ te bɛ deɛ ɔ.

¹⁸Asa koso, ɛhene ne, onni kyɛ ɔfa nhyɛsoɛ so ode maen mmaa b’agyapadeɛ ne bie, amaa ɔnate so wamma b’agyapadeɛ wamvi bɛ sa. Ye bɔbɔ ye agyapadeɛ ne bie yeɛ odi kyɛ ɔfa ma ye mma maa ɔyɛ bɛ deɛ ɔ, amaa ɔnate so me maen mmaa ne anu biala wammɔ aya wamvi ye agyapadeɛ so.”

¹⁹Afei ɔfale me ɔɔfale atee bɔ ɔla anoa piri ne ngyɛnu dɔ ne aso, maa yɛɛwurale asɔfo mɔ pumbu krongron mɔ bɔ bɛ nye nea sorɔ dɔ ne anu. Na nwuni nekaa bie wɔ eyia atɔleɛ so dɔ nziɛ nziɛ.

²⁰Na osele me kyɛ, “Ɛwa yeɛ odi kyɛ asɔfo nemɔ bɛto mvomsoɛ nwo afɔleɛ ne bɔne nwo afɔleɛ ne ɔ, nekaa bɔ odi kyɛ bɛto aleɛ afɔleɛ ne ɔ, amaa ɔnate so bamva bamvite aluo berɛ pato nu berɛ bamma mmenia ne anyɛ krongron.

²¹Afei ɔfale me wale aluo berɛ pato nu berɛ, na ɔfale me hɔle aluo dɔ ndweasoɛ nna nemɔ aso; na pato ndweasoɛ nemɔ, né ebiala le pato.

²²Né pato mmaa mmaa wɔ pato ndweasoɛ nna nemɔ aso, bɔ ye tendenn nu te agyirɛ aburanna, ye tɛtrɛtɛɛ nu te agyirɛ aburasa ɔ. Né bɛ mmɛnna bɛte pɛ.

²³Pato nna nemɔ akunu ne, né abamma wɔ nu bra yia, na né basisi mmokyea wɔ abamma nemɔ b’aseɛnwo berɛ babra bayia.

²⁴Yeɛ osele me kyɛ, “Ɛhemɔ ole gyaale mɔ, nekaa bɔ awuro ne anu somvoɛ mɔ bɛkɔto mmenia nemɔ b’afɔleɛ bɔ bahu ye ne.”