Read Sehwi Hesekiel 48 Bible Online

Hesekiel 48 - Sehwi bible

Hesekiel 48

¹Mmusua kure nemɔ dumaa ɛhe: Ofi sorɔ dɔ paa bɔ ɔfa Hetelon atee so ɔkɔ Hamate, Hasa Enan, Damasko ɛwɛen so wɔ sorɔ dɔ bɔ ɔkwaadwu Hamate mboanoa. Ɔtrɛ fi eyia afiteleɛ kodwu eyia atɔleɛ; ɔte Dan deɛ, bue ko ɛne.

²Bɔ ɔtoa Dan aseɛ deɛ aso, ofi eyia afiteleɛ so kodwu eyia atɔleɛ so ne, ɔte Asɛ deɛ, bue ko ɛne.

³Bɔ ɔtoa Asɛ aseɛ deɛ aso, ofi eyia afiteleɛ so kodwu eyia atɔleɛ so ne, ɔte Nafetali deɛ, bue ko ɛne.

⁴Bɔ ɔtoa Nafetali aseɛ deɛ aso, ofi eyia afiteleɛ so kodwu eyia atɔleɛ so ne, ɔte Manase deɛ, bue ko ɛne.

⁵Bɔ ɔtoa Manase aseɛ deɛ aso, ofi eyia afiteleɛ so kodwu eyia atɔleɛ so ne, ɔte Efraim deɛ, bue ko ɛne.

⁶Bɔ ɔtoa Efraim aseɛ deɛ aso, ofi eyia afiteleɛ so kodwu eyia atɔleɛ so ne, ɔte Ruben deɛ, bue ko ɛne.

⁷Bɔ ɔtoa Ruben aseɛ deɛ aso, ofi eyia afiteleɛ so kodwu eyia atɔleɛ so ne, ɔte Yuda deɛ, bue ko ɛne.

⁸“Bɔ ɔtoa Yuda aseɛ deɛ aso, ofi eyia afiteleɛ so kodwu eyia atɔleɛ so ne, ɔte aseɛ bɔ odi kyɛ ɛmɔpɛ bɛto berɛ ɔ. Odi kyɛ ye tɛtrɛtɛɛ nu yɛ agyirɛ apee aburanyɔ ne nnu. Yeɛ ye tendenn nu, ofi eyia afiteleɛ kodwu eyia atɔleɛ so ne, odi kyɛ ɔne abusua biala ye aseɛ deɛ bɛyɛ pɛ; na ye afia berɛ yeɛ nekaa krongron ne kɔwa ɔ.

⁹Aseɛ bɔ ɛmɔkɔpɛ bɛkɔto berɛ bɛkɔma AWURADE ne, odi kyɛ ye tendenn nu yɛ agyirɛ apee aburanyɔ ne nnu, yeɛ ye tɛtrɛtɛɛ nu koso agyirɛ apee buru.

¹⁰Aseɛ krongron ne, ɔkɔyɛ asɔfo nemɔ bɛ deɛ. Ye sorɔ dɔ tendenn nu kɔyɛ agyirɛ apee aburanyɔ ne nnu, eyia atɔleɛ bue nu dɔ tɛtrɛtɛɛ kɔyɛ agyirɛ apee buru, eyia afiteleɛ bue nu dɔ tɛtrɛtɛɛ kɔyɛ agyirɛ apee buru, yeɛ ye ngwaen dɔ tendenn nu kɔyɛ agyirɛ apee aburanyɔ ne nnu, bɔ AWURADE nekaa krongron ne kɔwa ye afia ɔ.

¹¹Sɔ aseɛ ne kɔyɛ asɔfo mɔ bɔ basie bɛ nwo krongron ne bɛ deɛ, bɔ bɛ ole Sadoke boso ama nemɔ, bɔ bali me dwirɛ nwo nahorɛ, bɔ banni ye nwo makyebu wɔ mmerɛ bɔ Yisraelfoɛ belili ye nwo makyebu, kyɛbɔ Lewifoɛ belili ye nwo makyebu ne.

¹²Yiti b’aseɛ ne, ɔkɔyɛ aseɛ sonongo bɔ baye bafi aseɛ ne aso nekaa krongron ne anu ɔ, krongron nu krongron bɔ ɔne Lewifoɛ b’aseɛ bɔ wɛen ɔ.

¹³Asɔfo nemɔ b’aseɛ ne, ye ngyɛnu berɛ, Lewifoɛ mɔ konya aseɛ bɔ ye tendenn nu te agyirɛ apee aburanyɔ ne nnu, bɔ ye tɛtrɛtɛɛ nu te agyirɛ apee buru ɔ. Ye tendenn amukoraa kɔyɛ agyirɛ apee aburanyɔ ne nnu, yeɛ ye tɛtrɛtɛɛ nu te agyirɛ apee buru.

¹⁴Onni kyɛ bɛyɛ bie atɔen anaa bɛfa bɛsesã nikye; yeɛ onni kyɛ bɛma sɔ nekaa paa bɔ ɔwɔ aseɛ ne aso ne okodi ebie berɛ, ofikyɛ ɔte krongron ma AWURADE.

¹⁵“Aseɛ ne bɔ waha ne, bɔ ye tɛtrɛtɛɛ nu te agyirɛ apee nnu, bɔ ye tendenn nu te agyirɛ apee aburanyɔ ne nnu ne, ɔkɔyɛ kuro berɛ aseɛ mbaen bie, nekaa bɔ bɛkɔtena ɔ, ɔne nekaa bɔ ngaka kɔhɔ adidie ɔ. Na kuro ne kɔwa ye afia.

¹⁶ Ye susulɛ ne, sɔaa yeɛ ɔte ɔ: Ye sorɔ dɔ te agyirɛ apee nna ne ɛyaa nnu, ye ngwaen dɔ te agyirɛ apee nna ne ɛyaa nnu, ye eyia afiteleɛ bue nu dɔ te agyirɛ apee nna ne ɛyaa nnu, yeɛ ye eyia atɔleɛ bue nu dɔ te agyirɛ apee nna ne ɛyaa nnu.

¹⁷Na kuro berɛ aseɛ bɔ ngaka kodidi so ne, ye sorɔ dɔ kɔyɛ agyirɛ ɛyaa nyɔ ne aburannu, ye ngwaen dɔ kɔyɛ agyirɛ ɛyaa nyɔ ne aburannu, ye eyia afiteleɛ bue nu dɔ kɔyɛ agyirɛ ɛyaa nyɔ ne aburannu, yeɛ ye eyia atɔleɛ bue nu dɔ kɔyɛ agyirɛ ɛyaa nyɔ ne aburannu.

¹⁸Aseɛ bɔ waha bɔ ɔla aseɛ krongron ne ngyɛnu ne, ye eyia afiteleɛ so kɔyɛ agyirɛ apee buru, ye eyia atɔleɛ so kɔyɛ agyirɛ apee buru, na ɔkɔla aseɛ krongron ne ngyɛnu. So aleɛ yeɛ ɔkɔyɛ kuro berɛ adwumayɔlɛfoɛ b’aleɛ ɔ.

¹⁹Na kuro berɛ adwumayɔlɛfoɛ, bɔ befi Yisrael mmusua kure amukoraa nu yeɛ bɛkɔyɔ adwuma ɔ.

²⁰Na sɔ aseɛ ne bɔ ɛmɔkɔpɛ bɛkɔto berɛ ne, odi kyɛ ɔyɛ ahinanan, bɔ ye bue ko biala te agyirɛ apee aburanyɔ ne nnu ɔ. Odi kyɛ ɛmɔpɛ aseɛ krongron ne ɔne kuro deɛ ne bɛto berɛ.

²¹Na aseɛ bɔ waha berɛ bɔ ɔla aseɛ krongron ne bue nyɔ ne anwo, ɔne bɔ ɔla kuro deɛ ne anwo ne, ɔte ɛhene ne deɛ. Aseɛ bɔ ɔla aseɛ krongron ne anwo ne, ɔtrɛ fi agyirɛ apee aburanyɔ ne nnu okodwu eyia afiteleɛ ɛwɛen ne; yeɛ ɔtrɛ agyirɛ apee aburanyɔ ne nnu okodwu eyia atɔleɛ ɛwɛen ne; ɔwɔ mmusua kure nemɔ bɛ kyɛfa ne ndendeneɛ so, na ɔkɔyɛ ɛhene ne deɛ. Aseɛ krongron ne, yeɛ awuro berɛ nekaa krongron ne, bɛkɔwa ye afia.

²²Yiti Lewifoɛ b’aseɛ ne kuro berɛ aseɛ ne, bɛkɔla ɛhene n’aseɛ deɛ n’afia. Na ɛhene ne, ye aseɛ deɛ kɔla Yuda wɛen ne Benyamin wɛen deɛ b’afia.

²³“Na mmusua kure ngaa nemɔ deɛ ɛhe: Ofi eyia afiteleɛ so kodwu eyia atɔleɛ so, ɔte Benyamin deɛ, bue ko ɛne.

²⁴Bɔ ɔtoa Benyamin aseɛ deɛ aso, ofi eyia afiteleɛ so kodwu eyia atɔleɛ so ne, ɔte Simeon deɛ, bue ko ɛne.

²⁵Bɔ ɔtoa Simeon aseɛ deɛ aso, ofi eyia afiteleɛ so kodwu eyia atɔleɛ so ne, ɔte Yisaka deɛ, bue ko ɛne.

²⁶Bɔ ɔtoa Yisaka aseɛ deɛ aso, ofi eyia afiteleɛ so kodwu eyia atɔleɛ so ne, ɔte Sebulɔn deɛ, bue ko ɛne.

²⁷Bɔ ɔtoa Sebulɔn aseɛ deɛ aso, ofi eyia afiteleɛ so kodwu eyia atɔleɛ so ne, ɔte Gade deɛ, bue ko ɛne.

²⁸Bɔ ɔtoa Gade aseɛ deɛ aso wɔ ngwaen dɔ, ye ngwaen dɔ paa ne, ɛwɛen ne fi Tamar ɔkɔ alaa kodwu nzue bɔ ɔwɔ Meriba Kadese, na ɔfa Misraim bɔnza ne anwo kodwu ɛpo piri ne.

²⁹Sɔ aseɛ ne yeɛ odi kyɛ ɛmɔfa serewagualɛ so bɛkyɛ bɛma Yisrael mmusua kure mɔ maa ɔyɛ b’agyapadeɛ ɔ, na ebiala bue deɛ bɔ okonya ye hɔ ɛne, AWURADE Nyameɛ noa dwirɛ ɛne.

³⁰ “Kuro berɛ anoa mɔ bɔ bɛfa nu befite ne, bɛ ɛhe: Ye sorɔ dɔ deɛ ne, esusu a, ɔte agyirɛ apee nna ne ɛyaa nnu.

³¹Yisrael mmusua kure nemɔ dumaa yeɛ ɔkɔla anoa mbiri nemɔ aso ɔ. Sorɔ dɔ anoa mbiri nemɔ bɛte nza: Ruben anoa piri ko, Yuda anoa piri ko, yeɛ Lewi anoa piri ko.

³²Eyia afiteleɛ bue nu dɔ deɛ ne, ɔte agyirɛ apee apee nna ne ɛyaa nnu. Bɛte anoa mbiri nza: Yosef anoa piri ko, Benyamin anoa piri ko, yeɛ Dan anoa piri ko.

³³Ye ngwaen dɔ deɛ ne, esusu a, ɔte agyirɛ apee nna ne ɛyaa nnu. Bɛte anoa mbiri nza: Simeon anoa piri ko, Yisaka anoa piri ko, yeɛ Sebulɔn anoa piri ko.

³⁴Eyia atɔleɛ bue nu dɔ deɛ ne, ɔte agyirɛ apee nna ne ɛyaa nnu. B’anoa mbiri nza: Gade anoa piri ko, Asɛ anoa piri ko, yeɛ Nafetali anoa piri ko.

³⁵Ɛpɛ kuro ne anwo kango bra yia a, ɔte agyirɛ apee buru ne mmɔtwɛ. Na ofi sɔ kyẽa ne bɔ ɔkɔ ɔ, kuro ne dumaa li: “AWURADE wɔ berɛ.”