Read Sehwi Hesekiel 5 Bible Online

Hesekiel 5 - Sehwi bible

Hesekiel 5

¹“Na wɔ, Sona awa, fa ngrandɛ nnaennaen, fa yɛ sona bɔ ɔye tire ɔ ye dɛmaa, ná fa poa wɔ ti nwiaa ne wɔ kanza. Fa tonyi kari nwiaa ne, ná kyɛ nu.

²Nu ngyɛmuɛ nza nu ko ne, mmerɛ bɔ kuro ne tualɛ ne kɔwa ayieleɛ ne, fa see yera ye wɔ kuro n’afia berɛ. Ngyɛmuɛ nza nu ko wora, fa ngrandɛ pepɛ nu wɔ kuro ne anwo bra yia. Yeɛ ngyɛmuɛ nza bɔ waha ne koso, pete gua mvrama nu, na ngɔhwe ngrandɛ ngɔfa ngɔfoa bɛ.

³Fa enwiaa ne anu kãa bie, ná fa kyekye w’ataadeɛ ne noa.

⁴Sa fa enwiaa ne anu bie, gyi gua see ne anu yera ye wɔ nu. Na see kofi nu kɔsɔ kɔhɔ Yisrael awuro ama amukoraa so.

⁵AWURADE Nyameɛ nwa nyoo: Yerusalem ɛhe; mafa ye magyina maen maen mɔ b’afia, bɔ aseɛ mɔ bapɛ ye nwo bayia ɔ.

⁶Ɔnate amumuyɛɛ so wayɛ me nhyehyɛleɛ nwo lɔen watra maen maen mɔ; yeɛ m’ahyɛdeɛ koso, wayɛ ye nwo lɔen watra aseɛ mɔ bɔ bapɛ ye nwo bayia ne; ofikyɛ wapo me mmeraa, yeɛ wanni me dwirɛ so.

⁷Yiti AWURADE Nyameɛ nwa nyoo: Ɔnate kyɛ ɛmɔayɛ lɔen piri batra maen maen mɔ bɔ bapɛ ɛmɔ nwo bayia, ná ɛmɔanni me dwirɛ so, anaa me mmeraa so, na mmom ɛmɔali maen maen mɔ bɔ bapɛ ɛmɔ nwo bayia ne bɛ mmeraa so ne ati,

⁸yiti AWURADE Nyameɛ nwa nyoo: Tie, me ne wɔ yɛkoli, na ngɔhwe wɔ so bɔ maen maen mɔ bɛ nye tua ɔ

⁹Na ɔnate w’akyiwadeɛ yɔleɛ ne amukoraa ne ati, kyɛbɔ ngosi ngɔhwe wɔ so ne, nnyɔle sɔ bie le, yeɛ mengɔyɔ sɔ bie le ko.

¹⁰ Yiti seɛ mɔ bekoli bɛ mma mmienzua mɔ naen wɔ wɔ nu, yeɛ mmaa mmienzua wora bekoli seɛ mɔ naen. Ngɔhwe wɔ so, na bɛ bɔ bekonya bɛ ti bekodidi nu ne amukoraa, ngɔto bɛ ngɔpete mvrama mukoraa nu.

¹¹Na kyɛbɔ nde ase ye de, nahorɛ nu, ɔnate kyɛ afa wɔ bra fiɛ amukoraa ne akyiwadeɛ yɔleɛ amukoraa agua me nekaa krongron ne anwo fiɛ ne ati, me koso ngɔye me sa ngofi wɔ bo, bɔ mengɔkorɔkorɔ wɔ anaa mengonwu wɔ anwumvoin ɔ, AWURADE Nyameɛ noa dwirɛ ɛne.

¹²Ewue anwonyerɛ ne ɛhɔen kohũhũ ngyɛmuɛ nza nu ko wɔ wɔ nu; ngyɛmuɛ nza nu ko koso bɛkɔtotɔ ngrandɛ noa wɔ wɔ fasue ne asi; yeɛ ngyɛmuɛ nza bɔ waha ne wora, ngɔbɔ bɛ ngɔpete mvrama mukoraa nu, na ngɔhwe ngrandɛ ngɔfoa bɛ.

¹³“Sɔ yeɛ me yaafɛlɛ ne kɔyɔ bɛ nwo adwuma koyie ɔ, m’ahone kohu bɛ so maa m’ahone kɔtɔ nzue nu. Na sɛ m’ahone hu bɛ so a, yeɛ bekonwu ye kyɛ me, AWURADE, me nungunɛhwenɛ nu yeɛ mahã ɔ.

¹⁴Afei koso, ngɔbɔ wɔ tɔɔ, yeɛ ngogua wɔ nyunu ase wɔ maen maen bɔ bapɛ wɔ nwo bayia nemɔ anu, ɔne ebiala bɔ ɔpɛ nu kɔ ɔ ye nyunu.

¹⁵Na sɛ mebua wɔ ndɛen wɔ ahonehulɛ ne anyeborolɛ so, ná metwe wɔ so serɛserɛ a, ɛkɔkakyi animguaseɛ, ngorohoɛ nikye, kɔkɔbɔlɛ ne edwirɛ nwanwa kɔma maen maen bɔ bapɛ wɔ nwo bayia nemɔ; me AWURADE, me yeɛ mahã ɔ.

¹⁶Na sɛ mema ɛhɔen ba bɛ so kyɛ agyaen suronyisuronyi, bɔ okohũhũ bɛ, bɔ ngɔto ngohũ ɛmɔ ne: ngɔma ɛmɔkɔhɔ so bekoli hɔen, na ngɔma nekaa bɔ ɛmɔnya b’aleɛ ɔ ye bo kɔpɛ.

¹⁷ Ngɔsoma ɛhɔen piri ne ngaka aboyaa maa bɛkɔwa ɛmɔ so, bɛkɔma ɛmɔ mma mɔ bekofi ɛmɔ sa, ɛmɔkonwu ewue anwonyerɛ ne mogya, na ngɔfa ngrandɛ ne ngɔwa ɛmɔ so. Me, AWURADE, me yeɛ mahã sɔ ɔ.”