Read Sehwi Hesekiel 7 Bible Online

Hesekiel 7 - Sehwi bible

Hesekiel 7

¹AWURADE lale ye dwirɛ ali hyirele me kyɛ,

² “Wɔ, Sona awa, bɔ AWURADE Nyameɛ ɔkã kyire Yisrael maen hɔ ɛhe: Ayieleɛ! Aseɛ ndweasoɛ nna ne, b’ayieleɛ yeɛ wato bɛ ne.

³Kekesaala ye de, ayieleɛ yeɛ wato wɔ ɔ, ngɔma me yaafɛlɛ ne kɔwa wɔ so; ngobua wɔ ndɛen kyɛbɔ wɔ yɔleɛ te ɔ, na ngɔhwe wɔ so wɔ w’akyiwadeɛ yɔleɛ amukoraa nwo.

⁴Mengɔkorɔkorɔ wɔ, yeɛ mengonwu wɔ anwumvoin, na mmom ngɔhwe wɔ so wɔ wɔ yɔleɛ nwo, wɔ mmerɛ bɔ w’akyiwadeɛ yɔleɛ tɛwɔ wɔ nu ɔ, na afei ɛmɔkonwu kyɛ me ole AWURADE.

⁵“AWURADE Nyameɛ nwa nyoo: Musue! Nea, musue yeɛ ɔ́ba ne!

⁶Ayieleɛ awa, ayieleɛ ne awa! Wadwɔso ɔ́ba wɔ so, nea kyɛ ɔ́ba ɔ!

⁷Ao, wɔ bɔ ɛte aseɛ ne aso ɔ, w’ayieleɛ ne awa. Mmerɛ ne adwu, kyẽa ne apingye, ɔte amaneɛ mmerɛ, na mmom ɔtte mmokaa so ahurusililɛ mmerɛ ko.

⁸Ɔngɔhyɛ biala, ngɔma m’ahone bɔ wahu ne kɔwa wɔ so, ngɔfɛ wɔ so yaa, ngobua wɔ ndɛen kyɛbɔ wɔ yɔleɛ te ɔ, na ngɔhwe wɔ so wɔ w’akyiwadeɛ yɔleɛ amukoraa nwo.

⁹Mengɔkorɔkorɔ wɔ, yeɛ mengonwu wɔ anwumvoin, na mmom ngɔhwe wɔ so wɔ wɔ yɔleɛ nwo, wɔ mmerɛ bɔ w’akyiwadeɛ yɔleɛ tɛwɔ wɔ nu ɔ, na afei ɛmɔkonwu kyɛ me ole AWURADE bɔ metwe asoɛ ɔ.

¹⁰Nea, kyẽa ne ɛhe! Nea kyɛ ɔ́ba ɔ! W’ayieleɛ ne adwu. Mbire ne afifi, yeɛ anwomasoɛ afefɛ.

¹¹Atutureasɛm wanyi wakakyi amumuyɛɛ mbire; bɛ nu biala ngonya ye ti ngodidi nu, b’ɛlɔen ne anu ko po, b’anwonyadeɛ ne anu ko po, na bɛngɔyɛ nhyɛsoɛ ko.

¹²Mmerɛ ne adwu, kyẽa ne apingye; bɔ ɔtɔ nikyee ne, nnɛma ye nye gye, yeɛ bɔ ɔyɛ ye atɔen wora, nnɛma ye wora bɔ, ofikyɛ ahone ne ahu b’anwonya ne amukoraa so.

¹³Sona bɔ ɔyɛ nningyein atɔen ne, sɛ ɔtɛ te ase a, ye sa ngɔhã bɔ watɔne ye ne ko, ofikyɛ nyekyire bɔ ɔfa b’anwonya mukoraa nwo ne, ɔngɔsesã. Na ɔnate b’amumuyɛɛ ti, ebiala ngonya ye ti ngoa.

¹⁴“Bahu totorobɛndo ne basiesie nikyee biala yé de, nakoso ebiala ngɔhɔ koɛ, ofikyɛ m’ahone ahu b’anwonya ne amukoraa so.

¹⁵Ngrandɛ wɔ eburo, yeɛ ewue anwonyerɛ ne ɛhɔen wɔ kuro; bɔ ɔwɔ buro ne, ɔkɔtɔ ngrandɛ noa; yeɛ bɔ ɔwɔ kuro ne koso, ɛhɔen ne ewue anwonyerɛ kohũ ye.

¹⁶Na bɛ bɔ bɛkɔnwati bekonya bɛ ti bekodidi nu ne, bɛkɔhɔ mmokaa nemɔ aso kyɛ bɔnza nu mmubure, na ɔnate bɛ mukoraa b’amumuyɛɛ ti, ebiala kɔpene.

¹⁷Asaa mukoraa nu kɔyɛ hodwoo, nangoroma mukoraa kɔyɛ mmerɛ kyɛ nzue.

¹⁸Bɛkɔhera ɛsɛen tena, na ahunundetelɛ kɔtɔ bɛ so. Bɛ mukoraa bɛ nyunu kogua ase, na bɛ mukoraa bɛ ti so kɔpa.

¹⁹Bekogyi b’ɛdwetɛ bekogua mmorɔnoɛ so, bekobu bɛ sikaa kɔkorɛ kyɛ ye nwo agua fiɛ. Na b’ɛdwetɛ ne bɛ sikaa kɔkorɛ ne, ɔngɔhora ngɔpepɛ ngole bɛ wɔ AWURADE ahonehulɛ kyẽa ne. Bɛngɔhora ngɔma bɛ kra ko ngoyi, anaa ɔngɔma bɛ ko ngoyi; ofikyɛ ɔte amumuyɛɛ bɔ ɔto bɛ sundidua ɔ.

²⁰Bɛfale bɛ mbembenanneɛ nyemene nemɔ bɛhoahoale bɛ nwo, bɛfa bɛyɔle akyiwadeɛ amoen mɔ, bɔ ɔte bɛ nningyein bɔ mekyi ne. Ye sɔ ati, ngɔmaa ɔkɔkakyi bɛ so akyiwadeɛ nikye.

²¹Ngɔfa ngowura ɛwɔfoɛ mɔ sa maa bɛkɔbɔ apaa bɛkɔfa, ɔne aseɛ so nzɛmmɔnefoɛ maa ɔkɔyɛ bɛ koɛ nu nzesadeɛ; na bekogua ye nwo fiɛ.

²²Ngɔye me nye ngɔto buro bɔ mengɔtɛ bɛ so ɔ, amaa ɔnate so bagua me nekaa krongron ne anwo fiɛ, na awerɔm awuefoɛ kowura nu kogua ye nwo fiɛ.

²³Yɔ ngɔnzɔngɔnzɔ, ofikyɛ awuelilɛ ayi aseɛ ne aso to, nzɛmmɔnelilɛ ayi kuro ne anu to.

²⁴Ngɔfa maen maen bɔ bɛ ti anu yɛ se paa ɔ ngɔwa maa bɛkɔɔfa b’awuro nemɔ. Ngɔma anwoserɛfoɛ b’anwomasoɛ ne bo kɔpɛ, na ngogua bɛ nekaa krongron nemɔ nwo fiɛ.

²⁵Amaneɛ ɔ́ba, na bɛkɔpena asomdwee si atee, nakoso bengonya bie.

²⁶Musue kɔwa kɔtoatoa so, yeɛ ngunga kɔwa kɔtoatoa so; bɛkɔpena nyekyire bekofi ngɔmhyɛlɛniɛ ne berɛ, mmeraa ne anwo nimdeɛ kɔbɔ ɔsɔfo, yeɛ foɛtulɛ kɔbɔ mbanyi mɔ.

²⁷Ɛhene ne koli yealɛ, aworabɔlɛ kotira atitirefoɛ, na aseɛ ne aso ama mɔ b’abasa nu kodwo. Ngotua bɛ so kerɛ kyɛbɔ bɛ yɔleɛ te ɔ, bɔ bayɔ ɔ so yeɛ ngogyina ngɔhwe bɛ so ɔ, na bekonwu ye kyɛ me ole AWURADE.”