Read Sehwi Daniel 1 Bible Online

Daniel 1 - Sehwi bible

Daniel 1

¹ Yuda hene Yehoakim ahennie afoɛ bɔ ɔtɔ so nza ne anu, Babilɔn hene Nebukadenesa wale Yerusalem ootuale kuro ne.

² Na AWURADE fale Yuda hene Yehoakim wurale ye sa, bɔ Nyameɛ awuro berɛ nningyein ne biemɔ boka so ɔ. Ɔsesale nningyein ne wale ye bosoen awuro wɔ Sinari aseɛ so, na ɔfale nningyein ne ooguale ye bosoen awuro berɛ nekaa bɔ besie nningyein ne.

³Yeɛ Nana Nebukadenesa sele ye sayɛɛ panyi Asepenase kyɛ ɔyeye Yisraelfoɛ ne biemɔ, bɔ bɛte ahemvo mɔ bɛ bosofoɛ ɔne atitirefoɛ ɔ,

⁴mmerandeɛ bɔ bellili nnɛen ɔ, anwonyemenefoɛ bɔ bɛse nworɛ, bɔ nimdeɛ ali bɛ ti, bɔ bɛkɔhora bekosua nwomaa, bɔ bɛkɔhora bɛkɔyɔ ɛsolɛ adwuma wɔ Nana ahemvie ɔ, ná ohyirehyire bɛ Kaldeafoɛ dwudwolɛ ne ye hyerɛlɛ.

⁵Na Nana hyehyɛle kyɛ ɛlɛho biala, odi kyɛ bɛma bɛ ye aleɛ bɔ odi, ɔne ye nzaa bɔ ɔno ne bie; kyɛ bɛ́tete bɛ afoɛ nza, na beyie a, ye si ye baagyina Nana nyunu baso ye.

⁶Bɛ nu biemɔ ole: Daniel, Hanania, Misael ne Asaria bɔ befi Yuda abusua kure nu ɔ.

⁷Yeɛ sayɛɛ panyi ne totole bɛ dumaa: Ɔtole Daniel dumaa Beltesasa, ɔtole Hanania dumaa Sadrake, ɔtole Misael dumaa Mesake, yeɛ ɔtole Asaria dumaa Abedinego.

⁸Nakoso Daniel yɛle ye adwene kyɛ ongoli Nana aleɛ ngɔno ye nzaa ne, ná ɔngɔfa ngogua ye nwo fiɛ. Yiti ɔsrɛle sayɛɛ panyi ne kyɛ ɔma ye ate, amaa ɔnate so wangua ye nwo fiɛ.

⁹Na Nyameɛ mane sayɛɛ panyi ne lole Daniel onwuni ye anwumvoin.

¹⁰Yeɛ sayɛɛ panyi ne sele Daniel kyɛ, “Mesuro me mene Nana bɔ wahyire aleɛ horɛ ne anonneɛ horɛ bɔ bɛfa bɛma ɛmɔ ne, ofikyɛ annea a né wanwu kyɛ ɛmɔ nyunu ayɛ bosabosaa watra mmerandeɛ bɔ ɛmɔ ne bɛ bɛbɔ tipɛen ne. Na ɔnate so ɛmɔkɔma Nana kɔte me ti kofi so.”

¹¹Yeɛ Daniel sele neafoɛ bɔ sayɛɛ panyi ne aye ye kyɛ ɔnea ye Daniel, Hanania, Misael ne Asaria so ne kyɛ,

¹²“Mesrɛ wɔ, maa bɛma yɛ nyaanyaa ma yɛli ɔne nzue ma yɛno sɔ alaa eleburu, ná wɔ de nea kyɛbɔ wɔ somvoɛ mɔ bekosi bɛkɔyɛ ɔ.

¹³Na afei yɛ sonaluwaa ne, fa toto mmerandeɛ bɔ bedi Nana aleɛ ne bie ne, bɛ deɛ nwo nea. Na afei gyina bɔ ekonwu ye ne aso maa ohyire kyɛbɔ ekosi kɔnea yɛ, wɔ somvoɛ mɔ yɛ so ɔ.”

¹⁴Yiti ɔpenene bɛ nzusuleɛ ne aso, na ɔmaa bɛfale sɔ tebea ne anu ɔneane alaa eleburu.

¹⁵Na eleburu ne dwuli nen, né bayɛ branoa tukutukuu batra mmerandeɛ amukoraa bɔ belili Nana aleɛ ne bie ne.

¹⁶Na ɔnate sɔ ati, somvoɛ ne amva aleɛ bɔ ɔsɛ kyɛ bedi, ɔne nzaa bɔ ɔsɛ kyɛ bɛno ne wamma bɛ, na mmom ɔmane bɛ nyaanyaa.

¹⁷Na sɔ mmerandeɛ nna hemɔ de, Nyameɛ mane bɛ nimdeɛ ne ndeaseɛ wɔ nwomaasualɛ ne nworɛ amukoraa nu, na Daniel nyane nyekyire ne laleɛ mukoraa nu ndeaseɛ.

¹⁸Na mmerɛ bɔ Nana Nebukadenesa hyɛle kyɛ, sɛ odwu a bɛfa bɛ bɛbra ne odwuli nen, sayɛɛ panyi ne fale bɛ hɔle Nebukadenesa nyunu.

¹⁹Yeɛ Nana ne bɛ lili ngɔmɔ, na onwuni kyɛ ebiala nne berɛ bɔ ɔte kyɛ Daniel, Hanania, Misael ne Asaria wɔ bɛ mukoraa bɛ nu ɔ; yiti bɛmaa begyinane Nana nyunu bɛsole ye.

²⁰Na nworɛ dwirɛ ne edwirɛ bɔ ɔkye adwene biala bɔ Nana bisale bɛ ne, onwuni kyɛ bɛ mmuayɛɛ ne, ɔbo ngonyaayelɛfoɛ ne bɛ bɔ bɛnea nzramaa nu bɛkã nu dwirɛ amukoraa, bɔ bɛwɔ ye ahennie ne amukoraa nu ɔ bɛ deɛ so pɛen buru.

²¹Na Daniel tenane berɛ maa oodwuli Nana Karose ahennie afoɛ bɔ oli moa ne.