Read Sehwi Daniel 11 Bible Online

Daniel 11 - Sehwi bible

Daniel 11

¹Na me de, Medeseniɛ Dario ahennie afoɛ bɔ oli moa ne anu, ngyinane ye si kyɛ memaa otindim.

²“Afei, ngohyire wɔ nahorɛ ne: Tie, ahemvo nza bieku kodwɔso wɔ Pɛsia, na bɔ ɔtɔ so nna ne, okonya ye nwo kɔtra bɛ mukoraa. Na sɛ ɔnate ye anwonya ne ati onya anwoserɛ a, okosi ebiala adua maa okodwɔso kotia Hela ahennie maen ne.

³Afei ɛhene katakyie bie kodwɔso, ɔkɔfa tumi piri koli hene, na bɔ okuro biala yeɛ ɔkɔyɔ ɔ.

⁴Na sɛ onya nyinasoɛ yie a, afei ye ahennie ne kɔbɔ, na nu kɔhyehyɛ kɔhɔ nyameɛso mvrama nna nemɔ anu; nakoso ongooli ye bosofoɛ mɔ sa, yeɛ tumi bɔ bɛkɔfa bekoli hene ne ɔngɔyɛ kyɛ ye deɛ ne; ofikyɛ ye ahennie ne kogyigya, na okooli ebiemɔ mbaen bɛ sa nu.

⁵“Na ngwaen dɔ hene ne konya tumi, nakoso ye safohene nemɔ anu ko konya tumi kɔtra ye, na ye tumi ne kɔyɛ tumi piri.

⁶Na afoɛ biemɔ asi ne, bɛkɔyɛ apam, na ngwaen dɔ hene ne, ɔwa brasua kɔwa sorɔ dɔ hene ne berɛ kyɛ ɔne ye bɛbaayɛ asomdwee apam; nakoso braa ne, ye tumi ne ngoli gyina, yeɛ biaa ne ne ye tumi koso ngoli gyina. Bɛkɔye braa ne bɛkɔma, ɔne sona bɔ ɔwole ye ɔ, ɔne bɔ ɔhyɛle ye nguraen wɔ sɔ mmerɛ ne anu ne.

⁷“Nakoso braa ne boso ndii ne bie ye nye kofifi kosi ye gya nu, na ɔkɔfa ɛlɔen kɔwa, ɔkɔhɔ sorɔ dɔ hene n’ahemvie, ɔkɔfa koɛ kɔteta bɛ, na okoli bɛ so ngonim.

⁸Okosa kɔsesa bɛ mmosoen, b’amoen mɔ bɔ bahuro nikyee bafa bayɔ ɔ,[7] b’ɛdwetɛ ne sikaa kɔkorɛ mbembenanneɛ kɔhɔ Misraim. Na afei afoɛ pee kɔpɛ nu bɔ ɔngɔfa koɛ ngɔtoa sorɔ dɔ hene ne ɔ.

⁹Yiti ɔkɔhɔ ngwaen dɔ hene n’ahennie ne anu, na afei okosa kɔhɔ ye bɔbɔ ye aseɛ so.

¹⁰“Ye mma mɔ bekodwɔso kyɛ bɛkɔ koɛ, bɛkɔboaboa ɛlɔen kandinga yuu noa. Bɛ nu ko kɔwa wii kyɛ asue bɔ wayi ɔ, na okosa kɔho koɛ ne alaa koodwu ye ahemvie.

¹¹Ngwaen dɔ hene ne, ole ɛyaa kɔwa, na ɔkɔfa koɛ kɔɔteta sorɔ dɔ hene ne. Na ɛhe kɔma sorɔ dɔ hene ne kɔboaboa ɛlɔen kandinga noa, nakoso okoli ngoguo wɔ ye nyunu.

¹²Na sɛ ɔkye ɛlɔen ne nnure ɔfa bɛ kɔ a, anwomasoɛ kɔwa ye nu, na okohũhũ mmenia apee buru pee, nakoso ongoli ngonim ngɔhyɛ.

¹³Ofikyɛ sorɔ dɔ hene ne kɔboaboa ɛlɔen pee noa bɔ ye somaa tra daa deɛ ne ɔ, na okosa kɔwa; na afoɛ biemɔ asi ne, ɔkɔfa ɛlɔen kandinga ne koɛhonɛ nningyein pee kɔwa.

¹⁴“Na sɔ mmerɛ ne anu, mmeni pee kodwɔso kotia ngwaen dɔ hene ne, na wɔ bɔbɔ wɔ maen ne anu patapaafoɛ nemɔ, bɛkɔmoma bɛ nwo so kyɛ bɛma nyekyire ne ɔba nu, nakoso bekoli ngoguo.

¹⁵Afei, sorɔ dɔ hene ne kɔwa, ɔkɔkyekye nyinasoɛ bɔ begyina so bɛfo fasue ɔ, na okoli nguro mɔ bɔ bato bɛ nwo fasue nemɔ so ngonim. Ngwaen dɔ lɔen nemɔ ngɔhora ye noa gyina, koɛhonɛfoɛ paa paa nemɔ po bengonya anwoserɛ bengogyina ye noa.

¹⁶Na ebiala bɔ ɔkɔfa koɛ kɔɔtoa ye nen, bɔ okuro biala yeɛ ɔkɔyɔ ɔ, ebiala ngɔhora ye nyunu gyina, okoogyina aseɛ nyemenenyemene ne aso, na ɔkɔfa ye tumi kɔsɛkye aseɛ ne.

¹⁷Ɔkɔfa kosie ye nye so kyɛ ɔkɔfa ye ahennie ne amukoraa nu tumi kɔwa; na ɔne bɛ bɔ bɛtengyɛ ɔ kɔwa,[8] ɔkɔma ye brasua maa okogya, amaa ɔnate so wanya atee wabɔ ahennie maen ne; nakoso apam ne ngogyina, yeɛ so ngɔwa mvasoɛ ngɔma ye.

¹⁸Ye si ye, ɔkɔfa ye nye kohyire nzuenoa maen nemɔ, na okoli bɛ nu pee so ngonim; nakoso safohene bie kɔbrɛ ye ahandaen ne ase, na ɔkɔma ye ahandaen ne kɔsa ye noa nu.

¹⁹Afei ɔkɔkakyi ye nye kohyire ye bɔbɔ ye aseɛ so anwoserɛ afealeɛ ne, nakoso okosoti kofi ase, na bengonwu ye ko.

²⁰“Na ebie kodwɔso kosi ye gya nu bɔ ɔkɔsoma ɛtoɔdidelɛniɛ bie maa ɔkɔfa ɛtoɔ kɔtaataa ahennie n’animnyam, nakoso mmerɛ kãa bie asi ne, bekohu ye bɔ ɔngɔyɛ ɛyaa so anaa koɛ nu ɔ.”

²¹“Busueniɛ bie kodwɔso kosi ye gya nu, bɔ ɔte sona bɔ bamva ahennie animnyam bia ne bamma ye ɔ. Okofu bɛ nu kɔwa, na ɔnate ye noa dwirɛ menemene so okole ahennie ne.

²²Ɔkɔprapra ye pɔfoɛ koɛhonɛfoɛ nemɔ bɛ boso bɔkɔɔ, okohũhũ bɛ ne apam ne anu sona titire ne.

²³Na sɛ maen maen mɔ bɛ ne ye bɛyɛ apam beyie a, ɔkɔfa nnakannaka atee so; na ɔwɔ nu kyɛ mmenia kãa bie yeɛ bekoli ye si ɔ de, nakoso okonya tumi.

²⁴Mvum nu, ɔkɔwa aseɛ ne aso nekaa mɔ bɔ aseɛ ne kye aleɛ ɔ, na ɔkɔyɔ bɔ ye baba mɔ ne ye nana mɔ banyɔ ye le ɔ. Ɔkɔhyɛ koɛ nu nningyein, koɛ nu nzesadeɛ ne anwodeɛ kɔma ye mmenia. Ɔkɔbɔ anwoserɛ afealeɛ mɔ nwo porɛ, nakoso ɛhe kɔhɔ so mmerɛ kãa bie.

²⁵Na ɔkɔfa koɛhonɛfoɛ pee kɔkanyane ye tumi ne ye ahoneserɛ kotia ngwaen dɔ hene ne. Ngwaen dɔ hene ne, ɔkɔfa koɛhonɛfoɛ anwoserɛfoɛ pee kɔhɔ koɛ, nakoso ɔngɔhora gyina, ofikyɛ bɛkɔbɔ ye ti so porɛ.

²⁶Bɛ bɔ ye yeɛ ɔma bɛ aleɛ ne po, bɛkɔpena ye asefinɛ, bekopia ye koɛhonɛfoɛ nemɔ boso bɛkɔhɔ, na bekohũhũ koɛhonɛfoɛ nemɔ pee.

²⁷Nakoso ahemvo nyɔ nemɔ de, nzɛmmɔne yeɛ ɔkɔwa bɛ ti anu ɔ, na bɛkɔtena didipono ko anwo bɛkɔhã ngondombo dwirɛ; nakoso bɛ porɛbɔlɛ ne kɔyɛ mbaen, ofikyɛ mmerɛ bɔ bahyehyɛ bato berɛ ne dwu a, yeɛ b’ayieleɛ kɔwa ɔ.

²⁸Ɔkɔfa nningyein bɔ wasesa ɔ pee kosa kɔhɔ ye aseɛ so, na okotu ye nye kosie apam krongron ne aso, bɔ okuro yeɛ ɔkɔyɔ ɔ, ná afei okosa kɔhɔ ye bɔbɔ ye aseɛ so.

²⁹“Na mmerɛ bɔ bahyehyɛ bato berɛ ne dwu a, okosa kɔwa ngwaen dɔ, nakoso sɔ mmerɛ he de, ɔngɔyɔ kyɛbɔ ɔyɔle ye daa ne.

³⁰Ofikyɛ Kitim ɛlɛen mɔ kɔho kotia ye, na ye abasa nu kobu maa okosa ye si. Osa ye si a, ɔkɔfa ye anyeborolɛ kogua apam krongron ne aso. Osa ye si a, ɔne mmenia bɔ bayakyi apam krongron ne aso lilɛ ne bɛkɔbɔ nu bɛkɔyɛ ko.

³¹ Ɔkɔma ye koɛhonɛfoɛ mɔ bɛkɔfa efiɛ bɛkɔhã nekaa krongron ne, bɔ ɔte anwoserɛ ne; bɛkɔbera daa biala naen yeralɛ afɔleɛ ne, na bekogyina akyiwadeɛ bɔ ɔbɔ maen ne.

³²Na bɛ bɔ bebu apam ne aso ne, ɔkɔfa ye noa dwirɛ menemene kɔhwehwe bɛ kɔsɛkye b’adwene; nakoso bɛ bɔ bɛse bɛ Nyameɛ ne de, bekosi bɛ hue bɛkɔho bekotia sɔ nikyee ne.

³³Na maen ne anu mmenia bɔ b’adwene nu pi ne, bekohyirehyire nu bekohyire mmeni pee maa bɛkɔte ye bo; ɔwɔ nu kyɛ bɛkɔtotɔ ngrandɛ noa de, bɛkɔyera bɛ, bɛkɔhye bɛ nnure, yeɛ bɛkɔbɔ bɛ nningyein apaa mmerɛ kãa.

³⁴Na sɛ bɛtotɔ a, mmokalɛ kãa bie yeɛ bekonya ɔ, na mmeni pee bɔ bɛ noa dwirɛ te menemene ɔ bɛkɔɔfa bɛ nwo bɛkɔbɔ bɛ.

³⁵Bɛ bɔ bɛte badwemma ne, nu biemɔ kɔtotɔ, maa ɔnate so bɛkɔfa bekosale bɛ nwo, bɛkɔfa bɛkɔte bɛ nwo, bɛkɔfa bɛkɔma bɛ nwo kɔyɛ fitaa koodwu ayieleɛ mmerɛ ne; ofikyɛ sɔ mmerɛ ne kɔwa kyɛbɔ bahyehyɛ bato berɛ ne ala.

³⁶ “Ɛhene ne kɔyɔ bɔ okuro ɔ; ɔkɔmoma ye nwo so kɔyɛ ye nwo konguronn kohyire kyɛ ɔtra nyameɛ biala, na ɔkɔhã edwirɛ nwanwa kotia nyameɛ mɔ nu Nyameɛ ne, na okonya ngɔsoɛ koodwu kyɛ ahonehulɛ ne kɔwa nu ɔ, ofikyɛ bɔ bahyehyɛ bato berɛ ne, ɔkɔwa nu.

³⁷Ɔngɔfa ye nana mɔ nyameɛ nemɔ ngɔyɛ huu, ongobu bɔ mmrasua kuro ye dwirɛ ne, yeɛ ɔngɔfa nyameɛ foforɛ biala ngɔyɛ huu, ofikyɛ ɔkɔmoma ye nwo so kɔtra bɛ mukoraa.

³⁸Ɔkɔfa anidie kɔma nyameɛ bie bɔ ɔbɔ nguro mɔ nwo waen ɔ mmom okosi bɛ gya nu. Na nyameɛ bie bɔ ye nana mɔ bɛnze ye ne, ɔkɔfa sikaa kɔkorɛ ne ɛdwetɛ, nyɔboɛ bɔ ye nyɔboɛ yɛ se ɔ, ɔne mbembenanneɛ yeɛ okoli ye ni ɔ.

³⁹Sɛ ɔkwaateta kuro bɔ ye nwo yɛ se a, maen bie aso nyameɛ yeɛ ɔkɔfa ye wora kowura ye nu ɔ; na bɛ bɔ bekole ye bɛkɔto nu ne, ɔkɔfa anidie kɔhyɛ bɛ animnyam. Ɔkɔmaa bekoli mmeni pee so tumi, na ɔkɔhyɛ aseɛ ne anu kɔma bɛ maa ɔkɔyɛ b’akatuaa.

⁴⁰“Na ayieleɛ mmerɛ ne dwu a, ngwaen dɔ hene ne kɔfa koɛ kɔɔteta ye. Nakoso sorɔ dɔ hene ne kɔfa teaseɛnam mɔ ne pɔngɔhanɛfoɛ ne ɛlɛen pee kɔhɔ ye so kyɛ mvrama bɔ ɔpɛ ye nwo ɔ, na ɔkɔfa koɛ kɔteta maen maen pee kohwi kɔfa bɛ so kyɛ asue bɔ wayi ɔ.

⁴¹Ɔkɔwa aseɛ nyemenenyemene ne aso, na mmenia pee kɔtotɔ, nakoso ɛhemɔ de, bekonya bɛ ti bekodidi nu bekofi ye sa nu: Edom, Moabo ne Amonfoɛ atitirefoɛ nemɔ.

⁴²Ɔkɔfa koɛ kɔɔteta maen maen mɔ, na Misraim aseɛ ngɔfa ye nwo ngoli.

⁴³Ɔkɔsesa sikaa kɔkorɛ ne ɛdwetɛ mbembenanneɛ ne Misraim mbembenanneɛ amukoraa, na Libiafoɛ ne Yitiopiafoɛ bekoowura ye bo.

⁴⁴Nakoso ngraa bɔ ɔkɔte kofi eyia afiteleɛ bue nu dɔ ɔne sorɔ dɔ ne, ɔkɔma ye kunu kɔtete ye, na okotu kɔtengyɛ kɔhɔ mmenia pee so anyeborolɛ so, kyɛ ɔkwaahũhũ bɛ onua bɛ boso.

⁴⁵Na okosisi ye ahemvie ɛtena sua mɔ wɔ ɛpo ne, ɔne bokaa krongron nyemenenyemene ne b’afia; nakoso ye ayieleɛ kɔto ye bɔ ongonya ebiala ma ɔngɔboka ye ɔ.”