Read Sehwi Daniel 12 Bible Online

Daniel 12 - Sehwi bible

Daniel 12

¹ “Sɔ mmerɛ ne, Mikayɛl, bɔ ɔte abɔfo safohene bɔ ogyi wɔ maen mmaa nemɔ asi ne, okodwɔso. Amaneɛnwunɛ mmerɛ kɔwa, bɔ ofi mmerɛ bɔ maen wale bɔ ɔbaadwu sɔ mmerɛ ne ɔ, ebie ɔwwale le ɔ. Nakoso sɔ mmerɛ ne, bɛkɔpepɛ bekole wɔ maen ne, ebiala bɔ bekonwu kyɛ bahyerɛ ye dumaa wɔ nwomaa ne anu ɔ.

² Na bɛ bɔ balela wɔ aseɛnwo nnɛterɛ nu[9] ne, bɛ nu pee kotingye, ebiemɔ kɔhɔ daa ngoa nu, yeɛ ebiemɔ wora bɛkɔhɔ animguaseɛ ne nyanzoen bɔ olle ayieleɛ ɔ nu.

³ Bɛ bɔ bɛte mmadwemma ne, bɛkɔta kyɛbɔ ewienu ta ɔ; yeɛ bɛ bɔ behyirehyirele mmeni pee maa bɛfale tenenee atee so ne, bɛ wora bɛkɔta kyɛ nzramaa afebɔɔ.

⁴ Nakoso wɔ, Daniel, nnɛbɔ edwirɛ ne aso, na fa nzɔanoɛ sɔ nwomaa ne noa kɔpem kyɛ ayieleɛ ne kɔwa ɔ. Mmeni pee kɔpere bɛ nwo bekoli akɔneaba, na nimdeɛ kɔsone.”

⁵Afei me, Daniel, nneane, na yieee, né mmienzua nyɔ foforɛ begyigyi berɛ. Ko wɔ asue ne noa bue ko, yeɛ ko wora ɔwɔ asue ne noa bue ko.

⁶Na ko bisale biaa bɔ ɔhera nwera, bɔ ɔwɔ asue ne anye ne kyɛ, “Ɔkwaadwu kyinzu yeɛ sɔ anwanwadeɛ hemɔ bɛkɔwa ayieleɛ ɔ?”

⁷ Na biaa bɔ ɔhera nwera, bɔ ɔwɔ asue ne anye ne, ndele ye mmuayɛɛ ne. Ɔpagyale ye sa famaa ne ye sa bɛen hyirele nyameɛso, na ɔfale Ɛdangama bɔ ɔte ase daa ne tale ndaen kyɛ, “Okoodwu afoɛ nza ne bue; na sɛ bede maen krongron ne tumi befi ye sa nu beyie a, yeɛ ɛhemɔ amukoraa kɔwa nu ɔ.

⁸Ndele, nakoso mande ye bo, yiti mmisale kyɛ, “O me mene, sɛɛ yeɛ ɛhemɔ bekooyie ɔ?”

⁹Na obuale kyɛ, “Daniel, wɔ de kɔ, ofikyɛ edwirɛ nemɔ te mvealeɛ nu dwirɛ, na bafa nzɔanoɛ basɔ ye noa kɔpem ayieleɛ mmerɛ ne.

¹⁰ Bɛkɔte mmeni pee nwo bɛkɔyɛ bɛ nwo fitaa kɔma bɛ nwo kɔyɛ sannwuu; nakoso bɔnefoɛ de, bɔ ɔtte mayee yeɛ bɛkɔyɔ ɔ, na bɔnefoɛ nemɔ anu biala ngɔte ye bo; nakoso badwemmafoɛ de, bɛkɔte ye bo.

¹¹ Na ofi mmerɛ bɔ bɛkɔbera daa biala naen yeralɛ afɔleɛ ne, ɔne mmerɛ bɔ bekogyina akyiwadeɛ bɔ ɔbɔ maen ne nen, ɔkɔyɛ ngyẽa apee ko ɛyaa nyɔ ne aburahona.

¹²Na sona bɔ ɔkɔnwondɛ toonn okoodwu ngyẽa apee ko ɛyaa nza ne aburasa ne nnu ne aso nen, ɔte saleɛ ma ye.

¹³Nakoso wɔ de, kɔ w’atee maa oodwu ayieleɛ ne; ekole wɔ nwome, na ayieleɛ mmerɛ ne dwu a, ekodwɔso konya wɔ kyɛfa bɔ bahyehyɛ bato berɛ bama wɔ ne.”