Read Sehwi Daniel 6 Bible Online

Daniel 6 - Sehwi bible

Daniel 6

¹Dario yɛle ye adwene kyɛ ɔkɔye mbɔtam mbanyi ɛyaa ko ne aburanyɔ maa bɛkɔnea ahennie ne aso, wɔ ahennie ne anu amukoraa.

²Afei ɔyele mbanyi mɔ so neafoɛ nza bɔ bɛkɔnea mbɔtam mbanyi nemɔ aso ɔ, bɔ né Daniel te mmenia nza nemɔ anu ko ɔ. Né odi kyɛ sɔ mbɔtam mbanyi nemɔ bebu b’adwuma nwo ngondaa bekyire bɛ, amaa ɔnate so ɛhene ne anhwere ye nikyee bie.

³Na Daniel he, ɔyɔle adwuma sonongo trale mbanyi so neafoɛ nemɔ ne mbɔtam mbanyi nemɔ, ofikyɛ né sunzum sonongo wɔ ye nu. Na ɛhene ne yɛle ye adwene kyɛ ɔkɔmaa ɔkɔnea ye ahennie ne amukoraa so.

⁴Yeɛ mbanyi so neafoɛ nemɔ ne mbɔtam mbanyi nemɔ, bɛpenane ahennie ne bulɛ nwo dwirɛ bɔ ɔkɔma Daniel nwo kɔhyere ye ɔ, nakoso bannya mvomsoɛ anaa ye nwo dwirɛ tɛɛ biala, ofikyɛ né odi nahorɛ, na bannya ye nwo mvomsoɛ anaa bɔne biala.

⁵Na sɔ mmenia nemɔ sele kyɛ, “Sɔ Daniel he, yɛngonya ye nwo dwirɛ tɛɛ biala ngɔfa ngɔbɔ ye kwaadu, sana ye Nyameɛ mmeraa nwo yeɛ yɛkonya bie ɔ.”

⁶Yeɛ mbanyi so neafoɛ nemɔ ne mbɔtam mbanyi nemɔ, bɛbɔle nu bɛhɔle ɛhene ne berɛ, na besele ye kyɛ, “Nana Dario, wɔ ngoa so oo!

⁷Yɛ, ahennie ye anu mbanyi so neafoɛ mɔ, mbanyi, mbɔtam mbanyi, foɛtulɛfoɛ ne amrado mɔ amukoraa bahã bɛ ti bapura, kyɛ odi kyɛ Nana hyɛ mmeraa, ná ɔbra ye kitii kyɛ, eleburasa ye anu, sona biala bɔ ɔkɔfa ye abisadeɛ kɔto nyameɛ bie anaa sona bie nyunu ne, odi kyɛ begyi ye bɛto gyata nemɔ bɛ tuin ne anu; Nana, sana wɔ ngome wɔ nyunu yeɛ odi kyɛ ɔfa to ɔ.

⁸Yiti Nana, hyɛ mmeraa ne, ná fa wɔ sa wura ye bo bɔ ebiala ngɔhora ye sesã ɔ, kyɛbɔ Medese ne Pɛsia mmeraa bɔ bɛngora ye sesã ne ɔte ne.”

⁹Yiti Nana Dario fale ye sa wurale krataa ne ne mmeraa ne abo.

¹⁰Na Daniel tele kyɛ wafa ye sa wawura mmeraa ne abo nen, ɔhɔle ye awuro aborɔsaen ne aso, nekaa bɔ ye pia nu mboma mɔ bebukye a bɛ nye kyire Yerusalem ne. Na kyɛbɔ né daa ne ɔyɔ ne ala, ɛlɛho biala oguale ndwerɛ pɛen nza ɔbɔle mbaeɛ lale ase wɔ ye Nyameɛ nyunu.

¹¹Yeɛ sɔ mmenia nemɔ bɛboale bɛ noa, na beenwuni Daniel kyɛ ɔbɔ mbaeɛ ɔfa ye abisadeɛ ɔto ye Nyameɛ nyunu ɔ.

¹²Yiti bɛhɔle ɛhene ne berɛ beebisale ye mmeraa ne anwo dwirɛ kyɛ, “Nana, aso amva wɔ sa anwura mmeraa bo, kyɛ eleburasa ye anu, sona biala bɔ ɔkɔfa ye abisadeɛ kɔto nyameɛ bie anaa sona bie nyunu ne, odi kyɛ begyi ye bɛto gyata nemɔ bɛ tuin ne anu ɔ; bɔ Nana, sana wɔ ngome wɔ nyunu yeɛ odi kyɛ ɔfa to ɔ?” Yeɛ ɛhene ne buale kyɛ, “Ye ala ɛne, kyɛbɔ Medese ne Pɛsia mmeraa bɔ bɛnzesã ye ne ɔte ne.”

¹³Yeɛ besele ɛhene ne kyɛ, “Sɔ Daniel ne, bɔ ɔte mmenia bɔ bɛhyele bɛ nnure befili Yuda nemɔ anu ko ne, Nana, ommu wɔ, yeɛ ɔmva mmeraa bɔ wɔ sa wura ye bo ne nyɛ huu, na mmom ɛlɛho biala ɔbɔ ye mbaeɛ ne pɛen nza.”

¹⁴Na ɛhene ne tele sɔ dwirɛ nen, ɔhale ye paa, na ɔyɛle ye adwene kyɛ ɔkɔpepɛ kole Daniel. Na ɔbɔle ye nwo mmɔden penane atee bɔ ɔkɔfa so kole ye ɔ maa oodwuli kyɛ eyia tɔle ɔ.

¹⁵Yeɛ sɔ mmenia nemɔ boale bɛ noa bɛhɔle ɛhene ne berɛ beesele ye kyɛ, “Nana, nwu ye kyɛ, Medese ne Pɛsia mmeraa nu, sɛ Nana hyɛ mmeraa anaa ahyɛdeɛ biala a, bɛngora bɛnzesã ye.”

¹⁶Yeɛ ɛhene ne hyɛle maa bɛɛfale Daniel bɛwale, na begyili ye bɛtole gyata mɔ tuin ne anu. Na ɛhene ne sele Daniel kyɛ, “Wɔ Nyameɛ bɔ ɛso ye daa ne, ɔpepɛ le wɔ!”

¹⁷Yeɛ bɛfale nyɔboɛ bie beenwini tuin ne anoa, na ɛhene ne fale ye bɔbɔ ye nzɔanoɛ pɛteaa ne ye mbanyi mɔ nzɔanoɛ mbɛteaa sɔle nyɔboɛ ne noa, kyɛbɔ ɔkɔyɛ bɔ ebiala sesã bɔ wato Daniel a ɔngɔyɛ yee ɔ.

¹⁸Yeɛ ɛhene ne sa hɔle ye ahemvie berɛ, obualale kɔngɔen ne, na wamma bamva bɔ ɔkɔfa kɔgyegye ye nye ɔ biala bammrɛ ye, na ye nye sorole.

¹⁹Na alebahyene ne, ɛhene ne dwɔsole, na ɔhane ye nwo hɔle gyata nemɔ bɛ tuin ne anwo berɛ.

²⁰Na opingyele tuin ne anwo berɛ nen, ole ahunundetelɛ teane nu frɛle Daniel, na osele Daniel kyɛ, “Daniel, Nyameɛ teasefoɛ somvoɛ ee, wɔ Nyameɛ bɔ ɛso ye daa ne, wahora wapepɛ wale wɔ wafi gyata nemɔ bɛ sa nu anaa?”

²¹Yeɛ Daniel buale ɛhene ne kyɛ, “Nana, wɔ ngoa so oo!

²² Me Nyameɛ wasoma ye abɔfo maa waahã gyata nemɔ bɛ noa wato nu, yiti banyɔ me huu, ofikyɛ wanwu me kyɛ medi be wɔ ye nyunu; yeɛ Nana, wɔ nyunu koso nnyɔle bɔne biala.”

²³Yeɛ ɔyɛle ɛhene ne fɛ paa, na ɔhyɛle kyɛ bɛye Daniel befi tuin ne anu. Yiti bɛyele Daniel befili tuin ne anu, na bannwu kyɛ ye nwo nekaa biala wapuropuro ɔ, ofikyɛ ɔfale ye wora wurale ye Nyameɛ nu.

²⁴Yeɛ ɛhene ne hyɛle maa bɛɛfale mmenia bɔ bɛbɔle Daniel kwaadu ne bɛwale, na ɔmaa beegyili bɛ beguale gyata mɔ bɛ tuin ne anu, bɛ ne bɛ mma ne bɛ ye mɔ; na bandwu tuin ne abo dɔ po yeɛ gyata nemɔ hyele bɛ ɔ, na bɛgorɔgorɔle bɛ mmowue mukoraa nu pasapasa.

²⁵Yeɛ Nana Dario hyerɛle krataa ɔɔmane maen maen, mmenia ne edwudwolɛ amukoraa bɔ bɛwɔ aseɛ so amukoraa ɔ kyɛ, “Ngɔsoɛ pee ɔbra ɛmɔ asetena oo!

²⁶Mahyɛ mmeraa kyɛ, m’ahennie maen bɔ medi so tumi ne amukoraa nu, odi kyɛ mmenia bɛma bɛ nwo wosowoso bɛ, ná besuro wɔ Daniel Nyameɛ ne nyunu, ofikyɛ ye yeɛ ɔte Nyameɛ teasefoɛ bɔ ɔwɔ berɛ afebɔɔ ɔ; ye ahennie ne, ɔngɔbɔ le, na ye tumi ne kɔtena berɛ afebɔɔ.

²⁷Ode ngoa, na ɔpepɛ de mmenia, na ɔyɔ nzɛngyerɛnneɛ ne anwanwadeɛ wɔ nyameɛso ne aseɛ so, na ye yeɛ wapepɛ wale Daniel wafi gyata mɔ bɛ sa nu ɔ.”

²⁸Yiti Daniel he, onyane ngɔsoɛ wɔ Dario ahennie aberɛ so ne Pɛsianiɛ Karose ahennie aberɛ so.