Read Sehwi Daniel 7 Bible Online

Daniel 7 - Sehwi bible

Daniel 7

¹Babilɔn hene Bɛlsasa ahennie afoɛ bɔ oli moa ne anu, Daniel hyene laleɛ, na onyane nyekyire wɔ mmerɛ bɔ né ɔla ye bɛen so ɔ. Na afei ɔhyerɛle laleɛ ne, na ɔbɔle nu dwirɛ ne porɛ.

²Daniel nwa nyoo, “Nwuni ye wɔ me nyekyire ne anu kɔngɔen ne, yieee, nyameɛso mvrama nna nemɔ betuli ɛpo piri ne aso bɛmaa ɔyɛle bagyabagya.

³ Yeɛ ngaka ngandinga nna befili ɛpo ne anu befitele, asora kyɛbɔ ko biala osi te ɔ.

⁴Né bɔ oli moa ne te kyɛ gyata, na né ole kɔleɛ ndaa. Na ngu so bɔ menea ne, betutuli ye ndaa nemɔ, bɛmane ye so befili aseɛnwo, bɛmaa ogyinane agyirɛ nyɔ so kyɛ sona, na bɛmane ye sona adwene.

⁵Nwuni kaka bɔ ɔtɔ so nyɔ ɔ, na né ɔte kyɛ kwabrafo. Né wadwɔso wagyina berɛ watɔ wahɔ ye bue ko; né amveɛ mbaleɛ nza wura ye noa nu, wɔ ye gye nemɔ b’afia. Na besele ye kyɛ, ‘Dwɔso di naen pee!’

⁶Na ɛhe asi ne, nneane, na nwuni kaka foforɛ bɔ ɔte kyɛ aboa ɔ. Né ole anomaa ndaa nna wɔ ye si; né kaka ne ti te nna, na bɛmane ye tumi.

⁷ Na ɛhe asi ne, nwuni kaka bɔ ɔtɔ so nna ɔ wɔ kɔngɔen laleɛ ne anu. Ye nwo yɛ suro, nwanwa, na ye nwo yɛ se paa. Né ole buralɛ agyee mbiri mbiri; oku na ɔtete nu pasapasa, na otiatia ye ngaa ne aso. Nzonzoleɛ wɔ ye ne ngaka mukoraa bɔ belili ye nyunu ne anu, na né ye mmɛen te buru.

⁸Na ngu so menea mmɛen nemɔ nen, yieee, nwuni kyɛ mmɛen kaaba foforɛ bie wafifi mmɛen nemɔ b’afia ɔ. Na mmɛen bɔ beli moa nemɔ, bɛ nu nza bo tutuli maa sɔ mmɛen ne ootuale berɛ. Na nwuni kyɛ sɔ mmɛen ne ole anyeɛ bɔ ɔte kyɛ sona deɛ ɔ, ɔne noa bɔ ɔkekã edwirɛ mbiri mbiri ɔ.

⁹ Na ngu so bɔ menea ne, nwuni kyɛ bafa ahennie bia mɔ baasiesie berɛ, na Bɔ Ɔwɔ Berɛ Fi Tetetete ne ɔɔtenane ase, ye tena ne te fufue kyɛ nwera, yeɛ ye ti nwiaa te horaenn kyɛ gyese; ye bia ne te see bɔ ogye wuronyiwuronyi ɔ, na ye bia kɔba nemɔ, bɛte see bɔ ɔsɔ ɔ.

¹⁰ See bɔ ɔsẽ kyɛ asue ɔ opu wale, opu fili ye nyunu berɛ wale, apee apee sole ye, yeɛ apee buru apee buru buburugyaa gyinagyinane ye nyunu; ndɛenbualɛ badwa ne tenane ase, na bebukyebukyele nwomaa nemɔ anu.

¹¹Ngɔle so nneane, ɔnate edwirɛ mbiri mbiri bɔ né mmɛen ne ɔkekã ne ati. Na nneane alaa kɔpem kyɛ behuni kaka ne ɔ, bɛsɛkyele ye fuin ne, na befindini bɛtole see bɔ ogye ɔ nu.

¹²Na ngaka ngaa nemɔ koso de, belele bɛ sa nu tumi ne, nakoso bɛhyɛle mmerɛ kãa bɛmane bɛ maa bɛtenane ase.

¹³ Kɔngɔen nu nyekyire nemɔ anu, nwuni ebie bɔ ɔte kyɛ Sona Awa, kyɛ ɔnate nyameɛso munungum nu ɔba ɔ, ɔhɔle Bɔ Ɔwɔ Berɛ Fi Tetetete ne nwo berɛ, na bɛmaa ɔhɔle ye nyunu berɛ.

¹⁴Na ye yeɛ bɛmane ye tumi, animnyam ne ahennie, amaa ɔnate so maen maen mukoraa, mmenia mukoraa ne edwudwolɛ amukoraa baso ye. Ye tumi ne, ɔte tumi bɔ olle ayieleɛ bɔ ɔngɔpɛ nu le ɔ, na ye ahennie ne, ɔte ahennie bɔ ɔngɔbɔ le ɔ.

¹⁵“Me, Daniel, me sunzum wora bɔle wɔ me nu, na nyekyire bɔ nwuni ye ne hale me.

¹⁶Mbingyele bɛ bɔ begyigyi berɛ nemɔ anu ko, na mmisale ye kyɛbɔ ɛhemɔ amukoraa bɛ bo kyire ɔ. Yiti ɔhã hyirele me, na ohyirehyirele nningyein ne anu hyirele me kyɛ,

¹⁷‘Sɔ ngaka mbiri nna nemɔ, bɛ ole ahemvo nna bɔ bɛbaadwɔso aseɛ so ɔ.

¹⁸ Nakoso Anwuro Anwuroniɛ ne, ye anwoteefoɛ nemɔ bekonya ahennie ne, na bɛ sa kɔhã ahennie ne afebɔɔ mmerɛ bɔ olle ayieleɛ ɔ.’

¹⁹“Na kaka bɔ ɔtɔ so nna, bɔ nzonzoleɛ wɔ ye ne bɛ ngaa ne amukoraa nu, bɔ ye nwo yɛ suro paa, bɔ ye gye te buralɛ, bɔ ye gya ne ye sa boen te kɔɔbere, bɔ oku ná ɔtete nu pasapasa, ná otiatia ye ngaa ne aso ne, né mepena kyɛ menwu kyɛbɔ ye bo kyire ɔ.

²⁰ Yeɛ ye ti so mmɛen buru nemɔ, mmɛen ko ne bɔ ofifili, bɔ bɛ nu nza bo tutuli maa ootuale berɛ, sɔ mmɛen ne bɔ ole anyeɛ ne noa bɔ ɔkekã edwirɛ mbiri mbiri, bɔ ye piri tra mmɛen ngaa nemɔ ne, né mepena kyɛ menwu kyɛbɔ ye bo kyire ɔ.

²¹ Na ngu so bɔ menea ne, sɔ mmɛen ne fale koɛ toale anwoteefoɛ nemɔ, na olili bɛ so ngonim,

²²kɔpem kyɛ Bɔ Ɔwɔ Berɛ Fi Tetetete ne wale ɔ, na obuale Anwuro Anwuroniɛ n’anwoteefoɛ nemɔ be, na mmerɛ ne dwuli maa anwoteefoɛ nemɔ bɛ sa hane ahennie ne.

²³“Na ohyirele ye bo kyɛ, ‘Kaka bɔ ɔtɔ so nna ne, ɔkɔyɛ ahennie bɔ ɔtɔ so nna wɔ aseɛ so, nzonzoleɛ kɔwa ye ne ahennie amukoraa nu, okoli aseɛ amukoraa so ngonim, okotiatia so ná wasɛkye ye pasapasa.

²⁴Na mmɛen buru nemɔ, ahemvo buru kodwɔso wɔ sɔ ahennie ne anu, na nziɛ ye, ɛhene foforɛ kodwɔso wɔ bɛ si; nzonzoleɛ kɔwa ye ne bɛ bɔ beli moa ne anu, na okoli ahemvo nza so ngonim.

²⁵ Okodwudwo kotia Anwuro Anwuroniɛ ne, ɔkɔmaa Anwuro Anwuroniɛ n’anwoteefoɛ nemɔ bekoli amia, na ɔkɔyɛ ye adwene kyɛ ɔkɔsesã mmerɛ ne mmeraa, na bɛkɔfa anwoteefoɛ nemɔ bekowura ye sa afoɛ ko, afoɛ nyɔ ne bosome nzia.[2]

²⁶Nakoso badwafoɛ nemɔ bɛkɔtena ase kobua ndɛen, bekole ye tumi ne bekofi ye sa nu, ná bahu ye bama ye boso amini bɔkɔɔ waadwu ayieleɛ.

²⁷ Na bɛkɔfa ahennie ne tumi ɔne ahennie mɔ bɛ tumi bɔ ɔwɔ anwuro amukoraa bo bɛkɔma Anwuro Anwuroniɛ n’anwoteefoɛ maen ne. Ye ahennie ne te ahennie afebɔɔ, na tumi amukoraa kɔso ye, ná bayɛ sotie bama ye.’

²⁸“Edwirɛ ne, ye ayieleɛ ɛne. Na me, Daniel de, edwirɛ ne hale me paa, me nwo yɛle me basaa, nakoso mvale edwirɛ ne nziele me ti anu.”