Read Sehwi Hosea 10 Bible Online

Hosea 10 - Sehwi bible

Hosea 10

¹Yisrael te bobe paa bɔ osu ye mma ɔ; kyɛbɔ ye mma begu so bɛsone ne, sɔ ala yeɛ ye afɔleɛ mmokyea begu so bɛsone ɔ; kyɛbɔ ye aseɛ ne osi yɛ nyemene ne, sɔ ala yeɛ bɛyɛle b’amoen mɔ nyemenenyemene ɔ.

²B’adwene ayɛ ndaa ndaa, afei odi kyɛ bɛsoa bɛ mvomsoɛ; AWURADE kobubu b’afɔleɛ mmokyea mɔ, na ɔkɔsɛkye b’amoen nemɔ.

³Na afei de, bɛkɔhã kyɛ, “Yɛlle hene biala, ofikyɛ yanzuro AWURADE, na ɛhene de, nzikyɛ yeɛ ɔkɔhora kɔyɔ kɔma yɛ ɔ?”

⁴Bɛkekã edwirɛ mbaen mbaen; bɛta ndaen mbaen mbaen bɛfa bɛyeyɛ apam; yiti ndɛenbualɛ fifi wɔ bɛ nu kyɛ anafranaku, bɔ ofifi kofie so wɔ fieso ɔ.

⁵Bete Awen nandwie mmaa nemɔ ati, ahunundetelɛ kɔtɔ Samariafoɛ so. Ofikyɛ ye mmenia koli ye nwo aworabɔlɛ, yeɛ ye ahɔmeɛ mɔ bɔ né bedi ye animnyam nwo ahurusi ne, bɛ koso sɔ ala, ɔnate kyɛ ye animnyam ne watu wamini wafi ye nu.

⁶Bɛkɔsoa bɛkɔhɔ Asiria bɛkɔɔyɛ akyɛdeɛ bɛkɔma Nana Yarebo; Efraim nyunu kogua ase, na Yisrael kɔfɛre ye bɔbɔ ye agyirɛ bɔ watu ɔ nwo.[11]

⁷Samaria de, bɛkɔpɛ ye hene asue kyɛ asue nye ahure.

⁸ Yisrael bɔne, bɔ ye ole Awen asɔneyɛɛ nemɔ ne, bɛkɔsɛkye bɛ. Mmowue ne ɛfone kofifi b’afɔleɛ mmokyea nemɔ aso; na bekose mmokaa nemɔ kyɛ, “Ɛ́mɔkata yɛ so”, ná base pambaa nemɔ kyɛ, “Ɛ́mɔdwiri begua yɛ so.”

⁹Ao Yisrael, ayɔ bɔne fi Gibea mmerɛ ne; berɛ yeɛ bɛtoale bɔne ne aso ɔ. Aso koɛ ammu amva amumuyɛɛfoɛ nemɔ aso wɔ Gibea?

¹⁰Mepena kyɛ metwe bɛ so, na maen maen mɔ bɛkɔboa bɛ noa, bekodwɔso bekotia bɛ, ɔnate b’amumuyɛɛ mmɔhoɛ ne ati.

¹¹Né Efraim te nandwie akrɔngrɔma bɔ batete ye bɔ aburoo borolɛ yeɛ okuro ɔ. Nakoso ngɔfa kɔnnua ngɔto ye kɔme nyemenenyemene ne anu, ngɔma Efraim kɔhwe nningyein ne, Yuda kofundam aseɛ ne, na Yakob kofurofuro nnɛterɛ ne anu.

¹² Ɛmɔlua tenenee bɛ́ma ɛmɔ nwo, ɛ́mɔbu ye wɔ anwumvoinnwunɛ nu, ɛ́mɔso ɛmɔ hɔayeɛ too ne. Ofikyɛ mmerɛ aso kyɛ ɛmɔpena AWURADE si atee ɔ, kɔpem kyɛ ɔkɔwa kɔɔtɔ tenenee nzue kogua ɛmɔ so ɔ.

¹³Ɛmɔafundam bɔne yɔleɛ, ɛmɔapɛ amumuyɛɛ; ɛmɔali ngondombo mmaa. Ofikyɛ ɛfale wɔ nwo tole w’anwoserɛ so, wɔ koɛhonɛfoɛ ahoneserɛfoɛ nemɔ bɛ somaa so.

¹⁴Yiti koɛ nu bagyabagya kodwɔso wɔ wɔ maen ne anu, na bɛkɔsɛkye w’anwoserɛ afealeɛ ne amukoraa, kyɛbɔ Salman sɛkyele Bete Arabel wɔ koɛhonɛ kyẽa ne anu ne; bɛtele niɛ mɔ beefini mmaa mɔ so maa niɛ nemɔ anu tetele pasapasa.

¹⁵Ao Betel, sɔ ala yeɛ bɛkɔfa bekoli ɛmɔ ɔ, ɔnate ɛmɔ bɔne kandinga ne ati. Ngyerɛmɔ tutuutu yeɛ bɛkɔpɛ Yisrael hene asue koraa ɔ.