Read Sehwi Hosea 13 Bible Online

Hosea 13 - Sehwi bible

Hosea 13

¹Sɛ né Efraim odwudwo a, mmenia nwo wosowoso bɛ; ɔmane ye nwo so wɔ Yisrael, na ɔnate kyɛ ɔsɔnene Baal ne ati, ɔyɔle bɔne, na owuli.

²Afei de, bɛkɔ so bɛyɔ bɔne, na behuro bɛ dwetɛ bɛfa bɛyɔ amoen bɛma bɛ nwo, amoen mɔ bɔ bɛ bɔbɔ bafa ɛdwetɛ bali adwii bayɔ, bɔ ye mukoraa te dwumvoɛ sa noa adwuma ɔ. Bɛkã bɛfa bɛ nwo kyɛ, “Bɛ bɔ bɛbɔ afɔleɛ ne, odi kyɛ bɛfe nandwie nyii akrɔngrɔma nemɔ noa.”

³Yiti bɛkɔyɛ kyɛ ngyerɛmɔ munungum, kyɛ bosue bɔ ɔpɛ nu kɔ ndɛndɛ ɔ, kyɛ afafu bɔ mvrama bɔ ɔpɛ ye nwo ɔ, ɔbɔ ye fi nekaa bɔ bɛboro aburoo ɔ, kyɛ nwosina bɔ otu fa mboma nu kɔ ɔ.

⁴Nakoso ofi Misraim aseɛ so, me ole AWURADE wɔ Nyameɛ; onni kyɛ ɛso nyameɛ biala, sana me, na defoɛ biala nne berɛ, sana me.

⁵Me, me yeɛ nwuni wɔ wɔ ɛserɛ so ɔ, wɔ aseɛ bɔ nzue nne so ɔ so.

⁶Ndire bɔ belili ne, kyɛbɔ né ye paa si te nen, sɔ ala yeɛ bɛ ko yili ɔ; bɛ ko yili, na bɛyɛle anwomasoɛ, yiti bɛ wora fili me.

⁷Yiti ngɔyɛ bɛ so kyɛ gyata, ngɔyɛ kyɛ aboa ngɔtetɛ bɛ wɔ atee noa.

⁸Ngɔto ngɔhye bɛ kyɛ kwabrafo bɔ basesa ye mma mɔ bahɔ ɔ, na ngɔtete bɛ hue bɔ obutu b’ahone so ne anu; berɛ yeɛ ngohũhũ bɛ kyɛ gyata, kyɛbɔ kaka aboyaa kɔtete bɛ nu ɔ.

⁹Ao Yisrael, afrɛfrɛ w’asefinɛ ama wɔ nwo, nakoso me nu yeɛ wɔ mmokalɛ wɔ ɔ.

¹⁰ Me yeɛ ngɔyɛ wɔ hene ɔ, na ebie bieku bɔ ɔkɔpepɛ kole wɔ wɔ wɔ nguro nemɔ amukoraa so ne, ɔwɔ nisua? Yeɛ wɔ maenbulɛfoɛ bɔ ɛhã fale bɛ nwo kyɛ, “Si ɛhene ne mbanyi ma me” ne, bɛwɔ nisua?

¹¹ Mvɛle yaa nzili hene mane ɛmɔ, na nyele ye mvili berɛ wɔ m’ahonehulɛ nu.

¹²Babɔ Efraim amumuyɛɛ ne borɛ; ye bɔne nwo dwirɛ la berɛ.

¹³Yealɛ bɔ brasua fo aworɛ so a onwu ye ne, ebie kɔto ye, nakoso ɔte baa bienzua bɔ ɔnze nworɛ ɔ; ofikyɛ odwu mmerɛ bɔ odi kyɛ bɛwo ye a, ɔmva ye ti ndua awodeɛ ne anoa.

¹⁴ Aso mbɔ bɛ mvi ɛborɔ tumi nu anaa? Aso mbepɛ nne bɛ mvi ewue nu anaa? Wɔ, ewue, wɔ yealɛ ne wɔ ni? Wɔ, ɛborɔ, wɔ sɛkyelɛ ne wɔ ni? Anwumvoinnwunɛ atu afi me nye so.

¹⁵Ɔwɔ nu kyɛ okonya ngɔsoɛ wɔ oliɛma mɔ nu, nakoso eyia afiteleɛ mvrama bɔ ɔte AWURADE mvrama ne, okotu kofi ɛserɛ so dɔ kɔwa, ye asue ti kɔwewe, yeɛ ye mbombonzue kɔwewe, na mvrama ne kɔsesa nningyein nyɔboɛ serɛ biala kofi nekaa bɔ osie ye nningyein ɔ.

¹⁶Samaria kɔsoa ye foɛlilɛ, ofikyɛ wayɛ ye Nyameɛ nwo lɔen. Bɛkɔtotɔ ngrandɛ noa, bɛkɔtete bɛ mma nnɔma mɔ ti bɛkɔbobɔ berɛ, na bɛkɔpakyepakye bɛ pemvoɛ mɔ kunu.