Read Sehwi Hosea 2 Bible Online

Hosea 2 - Sehwi bible

Hosea 2

¹Ɛmɔhã behyire ɛmɔ aliɛma mmienzua mɔ kyɛ, “Ami”[3] yeɛ ɛmɔ aliɛma mmrasua mɔ kyɛ, “Ruhama.”[4]

²Ɛ́mɔdwudwo behyire ɛmɔ ani, ɛ́mɔdwudwo behyire ye, ofikyɛ nna me ye ɔ, yeɛ ye koso nna ohu ole me. Odi kyɛ ɔye ye gyanderabɔlɛ ne fi ye nye so, na ɔye ye agyaasɛkyelɛ ne fi ye nyɔfone mɔ b’afia.

³Wamma ye sɔ a, ngɔpa ye nwo maa ye nwo kɔla so kyɛ kyẽa bɔ bɛwole ye ɔ; ngɔmaa ɔkɔyɛ kyɛ aseɛ pralaa so, ná wayɛ kyɛ aseɛ katerepee, na ngɔmaa nzuhɔen kohũ ye maa okowu.

⁴Na mengonwu ye mma mɔ anwumvoin kaala, ofikyɛ bɛte gyandera mmaa.

⁵Ofikyɛ bɛ maame abɔ gyandera; bɔ ɔnwonzɛle bɛ ne wabɔ nyanzoen bra, ofikyɛ ɔnwa, ‘Me kurofoɛ mɔ bɔ bɛma me me noa aleɛ, me nzue, me boaen nwiaa ne me gyese, me ngoo ne me nzaa ne, ngogu bɛ so.’

⁶Yiti, tie, ngɔfa mmowue ngotua w’atee. Ngɔto waen ngɔfa ye nwo, amaa ɔnate so wannwu ye atee nemɔ.

⁷Ɔkɔpo ye kurofoɛ nemɔ aso, nakoso ɔngɔto bɛ; ɔkɔpena bɛ, nakoso ongonwu bɛ. Na ɔkɔhã kyɛ, ‘Ngosa ngɔhɔ ngoogya me hu daa ne, ofikyɛ né nningyein kɔ so yé ma me tra ɛnɛ.’

⁸Hmmm, né ɔnze kyɛ me yeɛ mane ye aburoo ne nzaa ne ngoo, kyɛ me yeɛ mmaa onyane ɛdwetɛ ne esikaa kɔkorɛ pee, bɔ bɛfa bɛbɔle afɔleɛ bɛmane Baal ne ɔ.

⁹Yiti ngosa ngɔwa ngoole m’aburoo wɔ ye buberɛ nu, yeɛ me nzaa wɔ ye mmerɛ nu, na ngosa ngole me kundu ne me gyese bɔ mva ngatale ye nwo ne.

¹⁰Na afei ngɔla ye nyanzoen bra ne ali wɔ ye kurofoɛ nemɔ nyunu, na ebiala ngɔpepɛ ngole ye ngofi me sa nu.

¹¹Ngɔma ye ahurusililɛ ne amukoraa bo kɔpɛ, yeɛ ye aluolue ngyẽa mɔ, ye ɛsraen foforɛ mɔ, ye afofingyẽa ne ye aluolue bɔ bahyehyɛ amukoraa.

¹²Ngɔsɛkye ye bobe ne ye borɔdoma mmakaa nemɔ, bɔ wahã wafa bɛ nwo kyɛ, ‘M’akatuaa bɔ me kurofoɛ mɔ bafa bama me ne, ye ɛhe’ ne; ngɔkakyi bɛ ɛhɔayeɛ, na eburo ngaka koli.

¹³Ngyẽa bɔ ɔfa sɔnene Baal mɔ ne, ngɔhwe ye so wɔ ye nwo, mmerɛ bɔ ɔyerale ɛyɛɛ mane bɛ, bɔ ɔfale ye asomade ne ye mbembenanneɛ mɔ siesiele ye nwo, oolili ye kurofoɛ nemɔ asi mane ye wora fili me ne, AWURADE noa dwirɛ ɛne.

¹⁴Yiti tie, ngɔma me hurolɛ kɔwa ye nu, ngɔfa ye ngɔhɔ ɛserɛ so, na ngɔhã ɛkorɔkorɔlɛ dwirɛ ngohyire ye.

¹⁵ Ngɔfa ye bobe boo mɔ ngɔma ye wɔ berɛ, na ngɔma Akɔre bɔnza ne kɔyɛ anyelasoɛ anoa. Berɛ yeɛ ɔkɔma mmuayɛɛ kyɛ ye ndaluwa nu ɔ, kyɛ mmerɛ bɔ ofi Misraim aseɛ so wale ne.

¹⁶Na sɔ kyẽa ne, ɛkɔfrɛ me ‘Yisi’,[5] na ɛngɔfrɛ me ‘Baali’[6] ko, AWURADE noa dwirɛ ɛne.

¹⁷Ofikyɛ ngɔye Baal mɔ dumaa ngofi ye noa nu, na bɛngɔbɔ bɛ dumaa bɛngɔkaye bɛ ko.

¹⁸Na sɔ kyẽa ne, ngɔyɛ apam ngɔma bɛ, me ne eburo ngaka, ewienu nnomaa, yeɛ ngaka bɔ bɛtwe bɛ nwo ase ɔ. Ngobubu agyaen, ngrandɛ ne koɛhonɛ nu ngofi aseɛ ye aso, na ngɔmaa bɛkɔlela berɛ asomdwee nu.

¹⁹Na ngɔbɔ wɔ asiwa ngɔma me nwo afebɔɔ; amba, ngɔbɔ wɔ asiwa ngɔma me nwo wɔ tenenee nu, pɛpɛɛpɛyɛlɛ nu, ɔdɔ ne anwumvoinnwunɛ nu.

²⁰Ngɔbɔ wɔ asiwa ngɔma me nwo wɔ nahorɛlilɛ nu, na ekonwu AWURADE.

²¹“Na sɔ kyẽa ne, ngotie, ngɔfa mmuayɛɛ ngɔma nyameɛso, na bɛ koso bɛkɔfa mmuayɛɛ bɛkɔma aseɛ, AWURADE noa dwirɛ ɛne.

²²Na aseɛ kɔfa mmuayɛɛ kɔma aburoo, nzaa ne ngoo, na bɛ koso bɛkɔfa mmuayɛɛ bɛkɔma Yesreel.

²³ Ngolua ye ngɔma me nwo wɔ aseɛ ne aso. Ngonwu bɔ mannwu ye anwumvoin ne anwumvoin, na ngose bɔ ɔtte me maen ne kyɛ, ‘Ɛte me maen,’ na bɛ koso bɛkɔhã kyɛ, ‘Ɛte me Nyameɛ.’ ”