Read Sehwi Hosea 3 Bible Online

Hosea 3 - Sehwi bible

Hosea 3

¹Yeɛ AWURADE sele me kyɛ, “Sa kohuro braa adwamanbɔlɛniɛ bɔ ɔte agyaasɛkyelɛniɛ ne, kyɛbɔ AWURADE kuro Yisraelfoɛ dwirɛ, nakoso bɛso nyameɛ foforɛ mɔ, ná bekuro borɔdoma bɔ babobɔ ye kunguma[7] ɔ.”

²Yiti nduale ɛdwetɛ sekel buru ne nnu, yeɛ ayuo angora ko ne ayuo angora bue mva ndɔle ye.

³Na nzele ye kyɛ, “Odi kyɛ ɛne me tena mmerɛ tendenn; nnɛbɔ gyandera, yeɛ nnɛfa wɔ nwo ma biaa foforɛ, na me koso sɔ yeɛ ngɔyɔ ngɔma wɔ ɔ.”

⁴Ofikyɛ Yisraelfoɛ kɔtena mmerɛ tendenn bɔ belle hene, bɔ belle dehyeɛ, bɔ bɛmmɔ afɔleɛ, bɔ belle amoen, bɔ belle asɔfo ataadeɛ ne abusua amoen ɔ,

⁵na ye si, Yisraelfoɛ kosa kɔwa bɛkɔɔpena AWURADE bɛ Nyameɛ ne bɛ hene Dawide si atee, na bekosuro AWURADE ne ye anwumvoinnwunɛ wɔ ngyẽa bɔ oli nziɛ nemɔ anu.