Read Sehwi Hosea 7 Bible Online

Hosea 7 - Sehwi bible

Hosea 7

¹Mésa Yisrael anwonyerɛ a, né Efraim amumuyɛɛ ne Samaria bɔne yɔleɛ ɔ́da ali, ofikyɛ benni nahorɛ. Awueniɛ abɔ awura nu, na awerɔm awuefoɛ bɛbɔ apaa wɔ dwaaso.

²Na bɛndwene ye nwo wɔ bɛ ti anu kyɛ mekaye bɛ bɔne yɔleɛ amukoraa ɔ. Afei bɛ bɔbɔ bɛ yɔleɛ apɛ bɛ nwo ayia, na me nye tua.

³Bɛfa bɔne yɔleɛ bɛma ɛhene ne nye gye, na bɛfa bɛ ngondombo bɛma atitirefoɛ mɔ koso bɛ nye gye.

⁴Bɛ mukoraa bɛte agyaasɛkyelɛfoɛ, bɛte kyɛ foonoo bɔ paanootonɛniɛ ne wasɔ nu see maa wayɛ hye ɔ; na ɔyakyi see ne anu hualɛ, ofi mmerɛ bɔ ɔkɔfete paanoo ne kɔpem kyɛ okotu ɔ.

⁵Yɛ hene ne, ye kyẽa ne, ye mbanyi mɔ bɛnone nzaa bɛyɛle tendaenn; ɔne ngorohoɛfoɛ yeɛ betu nu ɔ.

⁶Ofikyɛ basiesie b’ahone kyɛ foonoo, wɔ nnakannaka atee so, b’ahone kɔ so hu kɔngɔen amukoraa, na ngyerɛmɔ ɔsɔ kyɛ see bɔ ógye ɔ.

⁷Bɛ mukoraa bayɛ hye kyɛ foonoo, bekũkũ bɛ maenbulɛfoɛ mɔ; b’ahemvo amukoraa batotɔ, na bɛ nu biala nne berɛ bɔ osũ frɛ me ɔ.

⁸Efraim afa ye nwo wabɔ maen maen mɔ; Efraim te apiti bɔ bangakyi ɔ.

⁹Ɛwɔfoɛ mɔ ale ye anwoserɛ ne, nakoso ɔnze, amba, ye ti so amukoraa afu gyein, nakoso ɔnze.

¹⁰Yisrael anwomasoɛ di adanzeɛ tia ye, nakoso benza bɛmma AWURADE bɛ Nyameɛ berɛ, yeɛ ɛhe amukoraa si ne, bɛmbena ye si ate.

¹¹Efraim te kyɛ abubure kwaseaa bɔ olle adwene ɔ; bɛpena mmokalɛ befi Misraim berɛ, yeɛ bɛkɔ Asiria berɛ.

¹²Sɛ bɛkɔ a, ngɔtrɛ me tɛen nu ngɔkata bɛ so, ngɔtete bɛ ngogua ase kyɛ ewienu nnomaa; ngɔhwe bɛ so, kyɛbɔ bɛ mmenia bate ne ala.

¹³Bɛ yaakɔ oo! Ofikyɛ banwati bafi me nwo bahɔ. Amaneɛ ato bɛ, ofikyɛ bayɛ me nwo lɔen. Ahaa mekuro kyɛ mepepɛ mede bɛ, nakoso bɛpepɛ me nwo ngondombo.

¹⁴Bemvi b’ahone nu benzu bɛmvrɛ me, na mmom bɛbɔ awuye wɔ bɛ bɛen so; bɛpepɛ bɛ nwo naen bɛpena aburoo ne nzaa, na bɛyɛ me nwo lɔen.

¹⁵Ɔwɔ nu kyɛ me yeɛ mama bɛ ndeteyɛɛ, yeɛ mamaa banya anwoserɛ ɔ, nakoso bɛbɔ me nwo porɛ.

¹⁶Besa bɛ si, nakoso bɛmma Anwuro Anwuroniɛ ne berɛ, bayɛ kyɛ nnakannaka agyaen, b’atitirefoɛ mɔ kɔtotɔ ngrandɛ noa; ɔnate bɛ noa dwirɛ mvamva ne ati, mmenia kɔfa ɛhe kɔgoro bɛ nwo wɔ Misraim aseɛ so.