Read Sehwi Hosea 8 Bible Online

Hosea 8 - Sehwi bible

Hosea 8

¹“Fa totorobɛndo ne tua wɔ noa! Ɔkɔyɛ kyɛ kɔleɛ kɔwa AWURADE awuro ne aso, ofikyɛ babu m’apam ne aso, na bato me mmeraa ne.

²Bekosu bɛkɔfrɛ me kyɛ, ‘Me Nyameɛ, yɛ Yisraelfoɛ, yɛse wɔ.’

³Yisrael agyi nikye paa ne wato, na pɔfoɛ ne kɔfoa ye.

⁴Basisi ahemvo bɔ nna me yeɛ nzili ɔ, babobɔ mbanyi bɔ menze ye nwo hwee ɔ; bafa b’ɛdwetɛ ne esikaa kɔkorɛ bayɔ mmosoen bama bɛ nwo, bɔ ɔnate so ɔngɔma ongoyie bɛ yé ɔ.

⁵Ao Samaria, wapo wɔ nandwie ba ne, m’ahone ahu bɛ so; ɔkwaadwu kyinzu yeɛ bɛngɔbɔ anwotelɛ bra ɔ?

⁶Ofikyɛ ye koso ofi Yisrael: dwumvoɛ yeɛ ɔyɔle ɔ, yiti nna Nyameɛ ɔ. Samaria nandwie ba ne, bekobubu ye nu pasapasa.

⁷Ofikyɛ bedua mvrama, na mvrama bɔ ɔpɛ ye nwo ɔ yeɛ bɛkɔpɛ ɔ. Aburoo ne wambɛnzɛ, na ɔngɔfa mmaa. Sɛ ɔfa mmaa po a, ɛwɔfoɛ mɔ yeɛ bekoli ɔ.

⁸Bahye Yisrael bame; afei bɛte kyɛ kukue bɔ mvasoɛ nne so ɔ, wɔ maen maen mɔ nu.

⁹Ofikyɛ baapena mmokalɛ wɔ Asiria, eburo afunum bɔ ye ngome okyinikyini ɔ. Efraim abɔ bɛ bɔ bekuro ye ɔ mɔ paa.

¹⁰Amba, ɔwɔ nu kyɛ bɛbɔ abiɛngoɛ mɔ paa wɔ maen maen nemɔ nu de, nakoso ngɔboa bɛ noa; na ahemvo mmaa mmaa mɔ hene ne, ye nhyɛsoɛ ne ati, bekoli aworabɔlɛ kãa.

¹¹Efraim asisi bɔne nwo afɔleɛ mmokyea pee, nakoso bakakyi ye so bɔneyɔlɛ afɔleɛ mmokyea.

¹²Mahyerɛ me mmeraa ne anu dwirɛ apee apee pee mama ye, nakoso bebuli bɛ kyɛ amanvrafoɛ nikye.

¹³M’ayɛyelɛ afɔleɛ ne, bɛfa naen bɛbɔ, bedi, nakoso AWURADE onne bɛ ndo nu. Afei ɔkɔkaye b’amumuyɛɛ, ɔkɔhwe bɛ so wɔ bɛ bɔne nwo, na bekosa bɛkɔhɔ Misraim.

¹⁴ Ofikyɛ Yisrael wora afi (Nyameɛ) bɔ ɔbɔle ye ɔ, wasisi asɔneyɛɛ sua mɔ; Yuda akyekye nguro pee bɔ bato bɛ nwo fasue ɔ, nakoso ngɔtɔ see ngogua ye nguro nemɔ aso, na ɔkɔyera ye anwoserɛ afealeɛ nemɔ.