Read Sehwi Yoel 1 Bible Online

Yoel 1 - Sehwi bible

Yoel 1

¹AWURADE dwirɛ bɔ ɔlale ye ali hyirele Petuel awa Yowel ne, ye ɛhe.

²Ɛmɔ, mbanyi mɔ, ɛ́mɔtie ɛhe, ɛmɔ, aseɛ ne aso ama amukoraa, ɛ́mɔyɛ asoɛ betie! Aso sɔ dwirɛ he, wasi ɛmɔ aberɛ so le, anaa ɛmɔ nana mɔ b’aberɛ so po le?

³Ɛ́mɔhã ye nwo dwirɛ behyire ɛmɔ mma mɔ, ná ɛmɔ mma mɔ bɛhã behyire bɛ mma mɔ, ná bɛ mma mɔ koso bɛhã behyire aworɛ ndoatoasoɛ bɔ ɔkɔwa ɔ.

⁴Bɔ aketekyire ali maa waha ne, mmɛbɛ ali; bɔ mmɛbɛ bali maa waha ne, mmɛbɛ mbiri ali; bɔ mmɛbɛ mbiri bali maa waha ne, ɛsaa ali.

⁵Ɛmɔ, akɔnomnzafoɛ, ɛ́mɔdwɔso ná ɛmɔsu, ɛmɔ amukoraa bɔ ɛmɔno nzaa ɔ, ɛ́mɔbɔ awuye, ɔnate nzaa foforɛ ne ati, ofikyɛ batu bafi ɛmɔ noa.

⁶ Ofikyɛ maen bie wafa koɛ waateta m’aseɛ ne, bɛ nwo yɛ se, na bɛka bɛ a, bennwu bɛ noa. Bɛ gye te gyata gye, na b’awogyee te kyɛ gyata beleɛ.

⁷Wasɛkye me bobe ne pasaa, wapomba me borɔdoma mmaen nemɔ: wawɔngyewɔngye ye si boen ne wagua; ye maen nemɔ nwo ayɛ hoyaa.

⁸Bɔ awuye kyɛ ababunu bɔ wahera ɛsɛen tena, bɔ odi ye ndaluwa nu biaa nwo kuna ɔ.

⁹Bayakyi aleɛ afɔleɛ ne anonneɛ afɔleɛ bɔlɛ wɔ AWURADE awuro. Asɔfo bɔ bɛ yeɛ bɛte AWURADE somvoɛ mɔ ne, bedi aworabɔlɛ.

¹⁰Eboo mɔ asɛkye, aseɛ di aworabɔlɛ, ofikyɛ fieso nningyein asɛkye, nzaa foforɛ bo apɛ, yeɛ ngoo so ate.

¹¹Ɛmɔ, akuafoɛ, ɛ́mɔma ɔyɛ ɛmɔ fɛre, ɛmɔ, bobe boo so neafoɛ, ayuo ne atokoɔ ti odi kyɛ ɛmɔbɔ awuye, ofikyɛ fieso aleɛ mɔ asɛkye.

¹²Bobe ne akese, borɔdoma bakaa ne atwindwam, yeɛ akengaa, ayee ne aprɛ bakaa nemɔ koso sɔ ala; eburo mmakaa amukoraa bakese; ofikyɛ anigye atu amini afi adasa mmaa mɔ nu.

¹³Ɛmɔ, asɔfo mɔ, ɛ́mɔhera ɛsɛen tena ná ɛ́mɔbɔ awuye; ɛmɔ, afɔleɛ bokyea nwo somvoɛ mɔ, ɛ́mɔsu. Ɛmɔ, me Nyameɛ somvoɛ mɔ, ɛmɔbra nu, ɛ́mɔhera ɛsɛen tena kɔngɔen ne amukoraa, ofikyɛ bayakyi aleɛ afɔleɛ ne anonneɛ afɔleɛ bɔlɛ wɔ ɛmɔ Nyameɛ awuro.

¹⁴Ɛ́mɔyɛ akɔngyere krongron, ɛ́mɔyɛ nyianu krongron. Ɛ́mɔboaboa mbanyi ne aseɛ ne aso mma amukoraa bɛ noa wɔ AWURADE ɛmɔ Nyameɛ awuro, ná ɛ́mɔsu bɛfrɛ AWURADE.

¹⁵ Eh, sɔ kyẽa ne! Ofikyɛ AWURADE kyẽa ne wapingye, na ɔkɔwa kyɛ ɛsɛkyelɛ bɔ ofi Tuminiɛ ne berɛ ɔ.

¹⁶Aso aleɛ omminini bɔ yɛ nye tua ɔ, aso anigye ne ahurusi omminini offili yɛ Nyameɛ awuro anaa?

¹⁷Nningyein bɔ balua ne, bakese wɔ aseɛ nwo, pata nemɔ lela berɛ too, aburoo pata nemɔ badwiri bagua, ofikyɛ aburoo anyɛ yé.

¹⁸Nea kyɛbɔ nyɛmmoa nemɔ bɛpenepene ɔ! Nandwie kure nemɔ bɛteetee, ofikyɛ bennya aleɛ benni; amba, mmoaen kure nemɔ benwu amaneɛ.

¹⁹Ao AWURADE, wɔ yeɛ mesu mefrɛ wɔ ɔ, ofikyɛ see ayera ngaka aleɛ wɔ ɛserɛ so, na see bɔ ogye ne wayera eburo mmakaa amukoraa.

²⁰Eburo ngaka koso besu bɛfrɛ wɔ, ofikyɛ asue mɔ nu nzue awewe, na see ayera ngaka aleɛ wɔ ɛserɛ so.