Read Sehwi Yoel 2 Bible Online

Yoel 2 - Sehwi bible

Yoel 2

¹Ɛ́mɔhu totorobɛndo wɔ Sion, ɛ́mɔbɔ ese wɔ me bokaa krongron ne aso! Aseɛ ne aso ama amukoraa, odi kyɛ ɛmɔma ɛmɔ nwo wosowoso ɛmɔ, ofikyɛ AWURADE kyẽa ne ɔ́ba, na wapingye.

²Ɔte awosii ne (ewienu) kusuuyɛlɛ kyẽa, munungum ne awosii kabii kyẽa; koɛhonɛfoɛ anwoserɛfoɛ pee bɛkɔwa, bɔ ɔte kyɛ awosii bɔ wakata mmokaa nemɔ aso ɔ; bɛ sɛso ɔwwale le, ná bɛ si koso, ebie ngɔwa ko, wɔ aworɛ ndoatoasoɛ pee bɛ mmerɛ so.

³See bie yera nningyein di bɛ nyunu, na see bɔ ogye ɔ wɔ bɛ si. Aseɛ ne te kyɛ Eden turo ne wɔ bɛ nyunu, nakoso bɛ si de, ɔkakyi ɛserɛ pralaa. Amba, nikye fee ngɔfa ye nwo ngoli tɔtorɔtɔɔ wɔ bɛ sa nu.

⁴ Bɛ nwo te kyɛ mbɔngɔ, na betu amirika kyɛ pɔngɔhanɛfoɛ mɔ.

⁵Behuruhuru kyɛ teaseɛnam mɔ bɔ bɛyɛ dede wɔ mmokaa so ɔ, kyɛ see bɔ ɔyera ngyɛngyɛma bɔ ɔyɛ tetɛtetɛ ɔ, kyɛ koɛhonɛfoɛ anwoserɛfoɛ bɔ begyi koɛ noa ɔ.

⁶Amaenmaen mɔ, bɛ nwo dwiri bɛ wɔ bɛ nyunu, mmenia amukoraa nyunu yɛ bosaa.

⁷Betu amirika kyɛ koɛhonɛfoɛ anwoserɛfoɛ, bɛfo fasue kyɛ koɛhonɛfoɛ; ebiala fa ye atimbire so, na bɛmmakye bɛmvi b’atee so.

⁸Ebiala nzumu obiɛngo, na ebiala nate ye atee so; bɛbɔ bewura akodeɛ mɔ nu bɔ nikye fee nzi bɛ ate ɔ.

⁹Betwi bɛfa kuro ne aso, betu amirika wɔ fasue nemɔ aso, bɛfo bɛkɔ awuro mɔ nu, na bɛfa mboma nu bewura nu kyɛ awuefoɛ.

¹⁰ Aseɛ woso wɔ bɛ nyunu, anwuro kekã; eyia ne ɛsraen yɛ tunn, na nzramaa yakyi talɛ.

¹¹ AWURADE tea nu serɛserɛ wɔ ye koɛhonɛfoɛ nyunu, ofikyɛ ye lɔen ne te piri paa, na bɔ odi ye dwirɛ so ne, ye nwo yɛ se. Ofikyɛ AWURADE kyẽa ne te piri, ɔyɛ suro paa, na nwa yeɛ ɔkɔhora ye noa gyina ɔ?

¹²“Na afei, odi kyɛ ɛmɔfa ɛmɔ ahone amukoraa ne akɔngyere ne esuɛ ne aworabɔlɛlilɛ besa bɛba me berɛ,” AWURADE noa dwirɛ ɛne.

¹³Ɛ́mɔsunzua ɛmɔ ahone nu,[1] na nna ɛmɔ ndaadeɛ nu ɔ, ná ɛ́mɔsa bɛbra AWURADE ɛmɔ Nyameɛ berɛ. Ofikyɛ ɔdo mmenia na ɔse anwumvoin; ye ahone nhu ndɛ, ye ɔdɔ bɔ onni ngasi ne ɔsone, na ɔsesã ye adwene ɔtwe bɔne nwo asohwenɛ sa.

¹⁴Nwa yeɛ ɔse ɔ? Ebiaa okosa ye si kɔsesã ye adwene, ná wayakyi saleɛ wama ɛmɔ bɔ ɛmɔkɔfa bɛkɔbɔ aleɛ afɔleɛ ne anonneɛ afɔleɛ bɛkɔma AWURADE ɛmɔ Nyameɛ ɔ.

¹⁵Ɛ́mɔhu totorobɛndo wɔ Sion, ɛ́mɔyɛ akɔngyere krongron, ɛ́mɔfrɛ nyianu krongron;

¹⁶ɛ́mɔboaboa maen ne anoa, ɛ́mɔte mmenia nemɔ anwo, ɛ́mɔboaboa mbanyi nemɔ noa, ɛ́mɔboaboa ngwadaa nemɔ noa, yeɛ bɛ bɔ betua nyɔfone noa ne koso. Odi kyɛ atɔmvorɛ biaa ofi ye pia nu ba, ná atɔmvorɛ braa koso ofi ye pumbu nu ba.

¹⁷Asɔfo nemɔ, bɔ bɛ yeɛ bɛte AWURADE somvoɛ mɔ ne, odi kyɛ besu wɔ abrannaa ne, ɔne afɔleɛ bokyea ne b’afia, ná bɛkã kyɛ, “Ao AWURADE, nwu wɔ maen anwumvoin, nnɛma w’agyapadeɛ yɛ nikyee bɔ bebu ye animtia, maen maen mɔ noa nu ngorohoɛ dwirɛ. Nzu ati yeɛ bɛkekã ye wɔ maen maen mɔ nu kyɛ, ‘Bɛ Nyameɛ ne, ɔwɔ nisua?’ ɔ.”

¹⁸Afei AWURADE hwene ye aseɛ nwo nungunɛ, na onwuni ye maen anwumvoin.

¹⁹Amba, AWURADE buale ye maen sele ye kyɛ, “Ɛ́mɔtie, ngɔbrɛ ɛmɔ aburoo, nzaa ne ngoo, na bɛkɔma ɛmɔ ko koyi; mengɔma ɛmɔngɔyɛ nikyee bɔ bebu ye animtia wɔ maen maen mɔ nu ɔ ko,

²⁰na mmom ɛlɔen bɔ ofi sorɔ dɔ ne, ngɔye ye ngofi ɛmɔ so ngɔhɔ dedeede, na ngɔfoa ye ngɔhɔ aseɛ pralaa katerepee bie aso, bɔ ye nye kyire eyia afiteleɛ ɛpo, ná ye si kyire eyia atɔleɛ ɛpo; ye nwo pambaen kotu kɔwa, na ye mvaa ne kɔbɔ kɔwa, ofikyɛ wayɔ bɔne mbiri mbiri.

²¹Ao aseɛ, nnɛsuro; ma wɔ nye gye, ná di ahurusi, ofikyɛ AWURADE ayɔ nningyein mbiri mbiri.

²²Ɛmɔ, eburo ngaka, nnɛma ɛmɔsuro, ofikyɛ ɛserɛ so ngaka aleɛ afefɛ; mmakaa su bɛ mma, borɔdoma ne bobe su biribiraa.

²³Ɛmɔ, Sion mma mɔ, ɛ́mɔma ɛmɔ nye gye, ná ɛmɔli AWURADE ɛmɔ Nyameɛ nu ahurusi, ofikyɛ wama asuso atikye wama ɛmɔ wɔ mmerɛ bɔ ɔsɛ ɔ nu, na wama bamborɔ watɔ wama ɛmɔ, asuso ɔne bamborɔ kyɛ daa ne ala.

²⁴Nekaa bɔ bɛboro aburoo ne, aburoo koyi berɛ to, na nzaa ne ngoo koyi angora nemɔ maa okobu kɔfa so.

²⁵Na afoɛ mɔ bɔ nzomane mmɛbɛ, mmɛbɛ mbiri, ɛsaa ne aketekyire, bɔ bɛte me koɛhonɛfoɛ anwoserɛfoɛ maa bɛwale ɛmɔ berɛ bɛɛsɛkyele nningyein ne, ngosa ngɔfa ngosi ɛmɔ gya nu.

²⁶Na ɛmɔkodidi paa kɔma ɛmɔ ko koyi, ná ɛmɔaye AWURADE ɛmɔ Nyameɛ dumaa ayɛ, ofikyɛ wayɔ anwanwadeɛ wama ɛmɔ, na me maen nyunu ngogua ase le ko.

²⁷Ɛmɔkonwu kyɛ nwɔ Yisrael nu, na me ole AWURADE ɛmɔ Nyameɛ, ebiala nne berɛ ko, na me maen nyunu ngogua ase le.

²⁸ Na ɛhe asi ne, ngohwie me Sunzum ngogua anwoɔnaen amukoraa so, na ɛmɔ mma mmienzua ne ɛmɔ mma mmrasua kɔhyehyɛ ngɔm; ɛmɔ mbanyi mɔ kɔhyehye laleɛ, na ɛmɔ mmerandeɛ konwu nyekyire;

²⁹yeɛ ngohwie me Sunzum ngogua ngoaa mɔ ne afaneɛ mɔ so wɔ sɔ mmerɛ ne anu.

³⁰Ngɔyɔ anwanwadeɛ wɔ anwuro ne aseɛ so, mogya ne see ne nwosina ningɔnn.

³¹ Eyia kɔkakyi awosii, na ɛsraen kɔkakyi mogya koraka né AWURADE kyẽa kandinga bɔ ɔyɛ suro ne wawa.

³² Na ɔkɔwa kyɛ ebiala bɔ ɔkɔfa ye nwo kɔto AWURADE dumaa so ne, okonya ye ti kodidi nu, ofikyɛ Sion bokaa so ne Yerusalem yeɛ bɛ bɔ banya bɛ ti badidi nu ne bɛkɔtena ɔ, kyɛbɔ AWURADE ahã ne ala, na bɛ bɔ AWURADE frɛ bɛ ne, bɛkɔboka bɛ bɔ banya bɛ ti badidi nu ne aso.”