Read Sehwi Amose 3 Bible Online

Amose 3 - Sehwi bible

Amose 3

¹Ao Yisraelfoɛ, ɛ́mɔtie edwirɛ he bɔ AWURADE wahã wafa ɛmɔ nwo ɔ: bɔ mahã mafa abusua amukoraa bɔ nyele ɛmɔ mvili Misraim aseɛ so mmale ne nwo ɔ, kyɛ,

²“Aseɛ ye aso mmusua amukoraa, ɛmɔ angome yeɛ mese ɛmɔ ɔ; yiti ɔnate ɛmɔ amumuyɛɛ amukoraa ne ati, ngɔhwe ɛmɔ so.

³“Aso mmenia nyɔ bɛkora betu nu, wɔ aberɛ bɔ bɛnyɛ adwene ɔ?

⁴Aso gyata opo wɔ ɛhɔayeɛ nu, wɔ aberɛ bɔ onnyane kaka biala bɔ ɔkye ye di ɔ? Aso gyata akrɔngrɔma kɔtea nu wɔ nekaa bɔ ɔla ɔ, wɔ aberɛ bɔ onnyane kaka biala bɔ wahye ye ɔ?

⁵Aso anomaa kɔtɔ ngaen nu wɔ ase, wɔ aberɛ bɔ aleɛ biala nne berɛ bɔ bafa basua ye ngaen ɔ? Aso ngaen fandi fi aseɛnwo, wɔ aberɛ bɔ wangye hwee ɔ?

⁶Aso behu totorobɛndo wɔ kuro so, bɔ ɛserɛ nga berɛ ama ɔ? Aso amaneɛ to kuro, bɔ nna AWURADE yeɛ wamaa wawa ɔ?

⁷Amba, AWURADE Nyameɛ ngɔyɔ nikyee biala, bɔ ɔngɔla ye mvealeɛ nu dwirɛ ne ali ngohyire ye somvoɛ mɔ ngɔmhyɛlɛfoɛ nemɔ ɔ.

⁸Gyata bobɔ nu, na nwa yeɛ ongosuro ɔ? AWURADE Nyameɛ adwudwo, nwa yeɛ ɔngɔhyɛ ngɔm ɔ?”

⁹Ɛ́mɔbɔ ye dawure wɔ Asedɔde anwoserɛ afealeɛ nemɔ anu, yeɛ Misraim aseɛ so anwoserɛ afealeɛ nemɔ anu, ná ɛmɔhã kyɛ, “Ɛ́mɔboaboa ɛmɔ noa wɔ Samaria mmokaa nemɔ aso, ɛ́mɔnea basabasa mbiri mbiri bɔ ɔkɔ so wɔ nu ɔ, ɔne nhyɛsoɛ bɔ ɔkɔ so wɔ nu ɔ.”

¹⁰“Ofikyɛ bɛ bɔ bɛboaboa atianuserɛ ne awerɔm awue noa wɔ b’anwoserɛ afealeɛ mɔ anu ne, bɛnze kyɛbɔ bɛyɔ bɔ ɔtengyɛ ɔ,” AWURADE noa dwirɛ ɛne.

¹¹Yiti AWURADE Nyameɛ nwa nyoo, “Pɔfoɛ bie kɔpɛ aseɛ ne anwo koyia, okole w’anwoserɛ kofi wɔ sa nu, na ɔkɔfẽ w’anwoserɛ afealeɛ nemɔ anu nningyein.”

¹²Bɔ AWURADE kã hɔ ɛhe: “Kyɛbɔ mmoaenneafoɛ ɔpepɛ de agyirɛ nyɔ anaa asoɛ bue fi gyata noa nu ne, sɔ ala yeɛ bɛkɔpepɛ bekole Yisraelfoɛ bɔ bɛtete Samaria wɔ mba ndweasoɛ so ne bɛen bue so ɔ.

¹³AWURADE Nyameɛ, Asafo Nyameɛ nwa, “Ɛ́mɔtie, ná ɛ́mɔbɔ Yakob awuro kɔkɔ kyɛ,

¹⁴“Kyẽa bɔ ngɔhwe Yisrael so wɔ ye mmeraatolɛ nwo ne, ngɔhwe Betel afɔleɛ mmokyea nemɔ koso bɛ so, na bɛkɔpepɛ afɔleɛ mmokyea mmɛen nemɔ maa bekogua ase.

¹⁵Ngobubu prakasua mmerɛ sua ne ahuhuro mmerɛ sua nemɔ ngogua ase, ɛsoen gye sua nemɔ kɔsɛkyesɛkye, na awuro mbiri mbiri nemɔ kobubu kogua ase gyirigorɔɔ,” AWURADE noa dwirɛ ɛne.