Read Sehwi Amose 4 Bible Online

Amose 4 - Sehwi bible

Amose 4

¹Ɛmɔ, ɛ́mɔtie, Basan nandwie mmeleɛ bɔ ɛmɔwɔ Samaria bokaa so ɔ, ɛmɔ bɔ ɛmɔhyɛ mmenia bɔ bɛyɛ anwumvo ɔ so, ná ɛmɔsisi ehiafoɛ ɔ; ɛmɔ bɔ ɛmɔkã bekyire ɛmɔ ahu mɔ kyɛ, ‘Fa bra maa yɛno’ ɔ.

²AWURADE Nyameɛ afa ye krongronyɛlɛ wata ndaen kyɛ, Ɛ́mɔtie, ngyẽa bie ɔba ɛmɔ so, bɔ bɛkɔfa buralɛ koateɛ bɛkɔhwe ɛmɔ bɛkɔhɔ, yeɛ bɛkɔfa koaa bɛkɔhwe ɛmɔ si ama mɔ bɛkɔhɔ.

³Fasue ndokuro mɔ nu yeɛ ɛmɔkɔfa bekofite ɔ; ebiala kɔfa atee bɔ ɔla ye nyunu tee ɔ so, na bekofindi ɛmɔ bekogua Hamɔn,” AWURADE noa dwirɛ ɛne.

⁴Ɛmɔbra Betel bɛɛto mmeraa, ɛmɔbra Gilgal bɛma ɛmɔ mmeraatolɛ ɔyɛ pee; ɛ́mɔfa ɛmɔ afɔleɛ bɛbra ngyerɛmɔ biala, ná ɛ́mɔfa ɛmɔ buru nu ngyɛmuɛ ko bɛbra ɛlɛsa biala.

⁵Ao ɛmɔ, Yisraelfoɛ, ɛ́mɔfa paanoo harewaa bɛ́bɔ asennaa afɔleɛ. Ɛ́mɔbɔ akyɛdeɛ afɔleɛ nwo dawure, ɛ́mɔfa bɛ́to dwaa, ofikyɛ bɔ ɛmɔkuro kyɛ ɛmɔyɔ hɔ ɛne,” AWURADE Nyameɛ noa dwirɛ ɛne.

⁶“Mmane ɛmɔ noa aleɛ bɔle ɛmɔ wɔ ɛmɔ nguro nemɔ amukoraa so, yeɛ ɛhɔen wale ɛmɔ atenaleɛ nemɔ amukoraa nu, nakoso ɛmɔanza bamma me berɛ, AWURADE noa dwirɛ ɛne.

⁷“Asa koso, mama esue ayakyi tɔlɛ wama ɛmɔ wɔ aberɛ bɔ wahã bosome nza koraka né buberɛ adwu ɔ; mama esue watɔ wagua kuro ko aso, yeɛ mamma wandɔ wangua kuro ko aso. Esue tɔ guale eboo ko aso, na eboo bɔ esue wandɔ wangua so ne, nu nningyein yerale.

⁸Yiti nguro nyɔ anaa nza so ama behyinihyinini bɛhɔle kuro ko aso bɛɛnone nzue, nakoso nzue ne wande bɛ; nakoso ɛmɔanza bamma me berɛ,” AWURADE noa dwirɛ ɛne.

⁹“Mafa fieso nningyein kesenɛ ne asukuo nwo amaneɛ mato ɛmɔ so. Mmerɛ bɔ ɛmɔ turo mɔ, ɛmɔ bobe boo mɔ, ɛmɔ borɔdoma mmakaa ne ɛmɔ olive mmakaa yɛle pee ne, mmɛbɛ sɛkyele bɛ, nakoso ɛmɔanza bamma me berɛ,” AWURADE noa dwirɛ ɛne.

¹⁰“Anwonyerɛ mɔ bɔ mva mmɔle Misraim ne, nzomane maa ɔɔbɔle ɛmɔ; mvale ngrandɛ ngukuni ɛmɔ mmerandeɛ mɔ; nzesale ɛmɔ mbɔngɔ mɔ ngɔle, mmane ɛmɔ asikyeleɛ nu pambaen ne wurale ɛmɔ bonyi anu, nakoso ɛmɔanza bamma me berɛ,” AWURADE noa dwirɛ ɛne.

¹¹“Nnuane ɛmɔ nu biemɔ boso kyɛbɔ me, Nyameɛ, nnuane Sodom ne Gomora bɛ boso ne. Na né ɛmɔte kyɛ gyetia bɔ baye bafi see bɔ ogye nu ɔ, nakoso ɛmɔanza bamma me berɛ,” AWURADE noa dwirɛ ɛne.

¹²“Ao Yisrael, yiti bɔ ngɔfa ngɔyɔ wɔ ɛhe; ao Yisrael, ɔnate kyɛ ngɔfa ɛhe ngɔyɔ wɔ ne ati, boaboa wɔ nwo koyia wɔ Nyameɛ.”

¹³Ofikyɛ tie, bɔ ɔhyehyɛle mmokaa mɔ, ná ɔbɔle mvrama ne, ye bɔ ɔye ye ti anu adwene kyire adasa mmaa, ɔma ngyerɛmɔ kakyi awosii, ná otiatia aseɛ ye aso asɔneyɛɛ mɔ so ne, ye dumaa ole AWURADE, Asafo Nyameɛ.