Read Sehwi Amose 5 Bible Online

Amose 5 - Sehwi bible

Amose 5

¹Ao Yisrael awuro ama, ɛ́mɔtie edwirɛ he bɔ mékã mefa ɛmɔ nwo, bɔ ɔte awuyebɔlɛ ye.

²“Ababunu Yisrael wafi ase bɔ ongodwɔso ko ɔ; bapo ye wɔ ye aseɛ so, bɔ ebiala nne berɛ bɔ ɔkɔma ye so ɔ.”

³Ofikyɛ AWURADE Nyameɛ nwa nyoo, “Kuro bɔ ɔfale koɛhonɛfoɛ apee ko hɔle koɛ ne, ɛyaa ko yeɛ bekonya bɛ ti bekodidi nu ɔ; yeɛ kuro bɔ ɔfale koɛhonɛfoɛ ɛyaa ko hɔle koɛ ne, buru yeɛ bekonya bɛ ti bekodidi nu bɛkɔha Yisrael awuro ama mɔ nu ɔ.”

⁴Ofikyɛ bɔ AWURADE kã kyire Yisrael awuro ama ɛhe, “Ɛ́mɔpena me si ate, na ɛmɔkonya ngoa.

⁵Nnɛma ɛmɔpena Betel si ate, yeɛ nnɛma ɛmɔkɔ Gilgal, yeɛ nnɛma ɛmɔpɛ nu bɛkɔ Beɛ Seba; ofikyɛ bɛkɔhye Gilgal nnure bɛkɔhɔ amba, yeɛ Betel kɔbɔ.”

⁶“Ɛ́mɔpena AWURADE si ate, na ɛmɔkonya ngoa; wamma ye sɔ a, ɔkɔwa Yosef awuro ama so kyɛ see, na ɔkɔyera ye, bɔ ebiala nne Betel bɔ okonua ye ɔ.

⁷Ah, ɛmɔ bɔ ɛmɔkakyi ndɛenbualɛ turoloo maa ɔyɛ kyɛ abɔwee, ná ɛmɔgyi tenenee bɛto ase ɔ!

⁸Ye bɔ ɔbɔle nzramaa kure ne Akɔtaen-ne-ye-mma, ye bɔ ɔkakyi awosii tunn maa ɔyɛ ngyerɛmɔ, ná ɔma eyia yɛ tunn kyɛ kɔngɔen, ye bɔ ɔfrɛfrɛ ɛpo nu nzue, ná ohwie gua aseɛ nyunu ne, ye dumaa ole AWURADE.

⁹Ye bɔ obubu anwoserɛfoɛ maa bɛyɛ mmerɛ ndɛndɛ so, ná obubu anwoserɛ afealeɛ mɔ ɔ.

¹⁰Bekyi bɔ ɔtengyɛtengyɛ mmenia wɔ nekaa bɔ bedi dwirɛ ɔ, bɛpɔ bɔ ɔkã nahorɛ ɔ.

¹¹Ɔnate kyɛ ɛmɔsisi bɛ bɔ bɛyɛ anwumvo, ná ɛmɔbɔ bɛ apoo bede atokoɔ befi bɛ berɛ ne ati, nyɔboɛ bɔ badwa ɔ yeɛ ɛmɔafa basisi sua ɔ, nakoso ɛmɔngɔtena nu. Ɛmɔayɔ bobe boo nyemene mɔ de, nakoso ɛmɔngɔno nu bobe nzaa ne bie.

¹²Ofikyɛ mese ɛmɔ mmeraatolɛ worawora ne, ɔne ɛmɔ bɔne mbiri mbiri ne. Ɛmɔ bɔ ɛmɔteetee teneneefoɛ, ná ɛmɔde fea-ase-ma, ná ɛmɔbua bɛ bɔ bɛyɛ anwumvo ɔ ndɛengyea wɔ nekaa bɔ bedi dwirɛ ɔ.

¹³Ɔnate sɔ ati, nworɛfoɛ komua bɛ noa wɔ sɔ mmerɛ ne anu, ofikyɛ ɔte mmerɛ tɛɛ.

¹⁴Bɔ ɔte paa mmom yeɛ odi kyɛ ɛmɔpena ye si atee ɔ, na nna bɔ ɔte bɔne ɔ, amaa ɔnate so ɛmɔanya ngoa, na AWURADE Asafo Nyameɛ kogyina ɛmɔ si, kyɛbɔ ɛmɔahã ne.

¹⁵Ɛmɔhyi bɔne ná ɛmɔhuro bɔ ɔte paa ɔ. Ɛ́mɔbua ndɛen turoloo wɔ nekaa bɔ bedi dwirɛ ne. Ebiaa AWURADE Asafo Nyameɛ, okonwu Yosef boso ama ngaa nemɔ anwumvoin.

¹⁶Yiti AWURADE, Asafo Nyameɛ, AWURADE, ɔnwa, “Bɛkɔbɔ awuye wɔ dwaa nemɔ amukoraa so, yeɛ bɛkɔkekã ye wɔ atimbire nemɔ amukoraa so kyɛ, ‘Ayaa! Ayaa!’ Na bɛkɔfrɛ kuafoɛ maa bekoosu, ɔne bɛ bɔ bɛse sũ ɔ maa bɛkɔɔbɔ awuye.

¹⁷Na bɛkɔbɔ awuye wɔ bobe boo nemɔ amukoraa nu, ofikyɛ ngɔɔpɛ nu ngɔfa wɔ nu,” AWURADE noa dwirɛ ɛne.

¹⁸Ɛmɔ yaakɔ, ɛmɔ bɔ ɛmɔnea AWURADE kyẽa ne ate ɔ! Nzikyɛ yeɛ kyẽa ne kɔyɔ kɔma ɛmɔ ɔ? AWURADE kyẽa ne, ɔte awosii, na ɔtte hyireinn.

¹⁹Wayɛ kyɛ sona bɔ wanwati gyata bɔ kwabrafo waayia ye ɔ; anaa wahɔ awuro waafa ye sa wafua fasue so, ná ewoo aha ye ɔ.

²⁰Aso AWURADE kyẽa ne ɔngɔyɛ awosii? Aso ɔngɔyɛ awosii tuu bɔ hyireinn nne nu ɔ?

²¹Mekyi ɛmɔ aluolue nemɔ, na mebu bɛ animtia, na me nye ngye ɛmɔ aluolue nyianu nemɔ anwo.

²²Ɔwɔ nu kyɛ ɛmɔbɔ naen yeralɛ afɔleɛ ne aleɛ afɔleɛ bɛma me, nakoso menne mendo nu; yeɛ ɛmɔ nandwie sayɛɛ asomdwee afɔleɛ ne, mengɔfa me nye mengɔnea.

²³Fa wɔ dweintolɛ nwo gyegyegyegye ne fi me so kɔ; ofikyɛ mengotie wɔ sangoo dwein ne.

²⁴Na mmom odi kyɛ ɛmɔma ndɛenbualɛ turoloo tengyɛ kyɛ asue, ná tenenee ɔsẽ kyɛ asue piri.

²⁵“Ao Yisrael awuro ama, afoɛ aburanna bɔ né ɛmɔwɔ ɛserɛ so ne, aso ɛmɔbɔle naen yeralɛ afɔleɛ ne aleɛ afɔleɛ bɛmane me?

²⁶Nakoso ɛmɔsoale ɛmɔ hene Sakute[3], ɔne ɛmɔ nzramaa amoen Kiyun bɔ ɛmɔayɔ bama ɛmɔ nwo ne.

²⁷Yiti ngɔpɛ ɛmɔ asue ngɔhɔ Damasko si dɔ,” AWURADE bɔ ye dumaa ole Asafo Nyameɛ ne, ye noa dwirɛ ɛne.