Read Sehwi Amose 7 Bible Online

Amose 7 - Sehwi bible

Amose 7

¹Edwirɛ he yeɛ AWURADE Nyameɛ ye hyirele me ɔ: Yieee, né ɔnwo mmɛbɛ wɔ mmerɛ bɔ nningyein bɔ beluale ye nziɛ ne ɔhyɛ ye bo ofifi ɔ. (Ɔte mmerɛ bɔ sɛ bɛpɛ ngaka aleɛ bɛkɔma Nana ngaka mɔ beyie a, ndire ne bie fifi ye si ɔ).

²Na belili aseɛ ne aso ndire amukoraa beyiele nen yeɛ ngane kyɛ, “Ao AWURADE Nyameɛ, mesrɛ wɔ, fa kyɛ! Ɔkɔyɛ sɛɛ né Yakob wahora wagyina ye noa? Ofikyɛ ɔte kãa paa.”

³AWURADE hwe sale, “Ɔngɔwa ye sɔ,” AWURADE noa dwirɛ ɛne.

⁴Ɛhe yeɛ AWURADE Nyameɛ ye hyirele me ɔ: Tie, AWURADE Nyameɛ fale see kyɛ ɔbaafa bua ndɛen. Ɔyerale buma piri ne, na ɔyerale aseɛ nekaa bie koso.

⁵Yeɛ ngane kyɛ, “Ao AWURADE Nyameɛ, mesrɛ wɔ, nnɛma ɛhe ba nu! Ɔkɔyɛ sɛɛ né Yakob wahora wagyina ye noa? Ofikyɛ ɔte kãa paa.”

⁶AWURADE hwe sale: “Ɔngɔwa ye sɔ,” AWURADE Nyameɛ noa dwirɛ ɛne.

⁷Ɛhe yeɛ ɔye hyirele me ɔ: Tie, né AWURADE gyi fasue bie bɔ bafa ɛtengyɛlɛ susulɛ nyamaa basusu bato ɔ so. Né otira ɛtengyɛlɛ susulɛ nyamaa.

⁸Na AWURADE bisale me kyɛ, “Amose, bɔ enwu ye e, nzikyɛ ɛne?” Na mmuale kyɛ, “Ɛtengyɛlɛ susulɛ nyamaa.” Yeɛ AWURADE sele kyɛ, “Tie, ngɔfa ɛtengyɛlɛ susulɛ nyamaa ngɔto me maen Yisrael b’afia, mengobu me nye mengogua bɛ bɔne so ko.”

⁹Yisake asɔneyɛɛ nemɔ kɔkakyi kurofoen, Yisrael nekaa krongron nemɔ kɔkakyi aseɛ pralaa, na ngɔfa ngrandɛ ngɔho ngotia Yeroboam awuro ama.”

¹⁰Afei Betel sɔfo Amasia tole ngraa ɔɔmane Yisrael hene Yeroboam kyɛ, “Amose abɔ wɔ nwo porɛ wɔ Yisrael awuro ama mɔ nu. Ye noa dwirɛ ne amukoraa kɔbɔ maen ne.

¹¹Ofikyɛ Amose nwa: ‘Yeroboam kɔtɔ ngrandɛ noa, na bɛkɔhye Yisrael nnure bekofi bɛ bɔbɔ b’aseɛ so bɛkɔhɔ amba.’ ”

¹²Yeɛ Amasia sele Amose kyɛ, “Ao, wɔ bɔ ɛse ase ɔ, nwati kɔ Yuda aseɛ so, ma wɔ sa hã wɔ noa aleɛ wɔ dɔ, ná hyɛ ngɔm wɔ dɔ,

¹³na mmom nnɛhyɛ ngɔm wɔ Betel ko. Ofikyɛ berɛ te Nana nekaa krongron, na osa te ahemvie.”

¹⁴Yeɛ Amose buale Amasia kyɛ, “Me de, nnde ngɔmhyɛlɛniɛ oo, yeɛ nnde ngɔmhyɛlɛniɛ awa oo; na mmom nde mmoaenneafoɛ ne akyea mmakaa so hwɛsoniɛ,

¹⁵na AWURADE yele me maa nyakyili mmoaen so nealɛ, na AWURADE sele me kyɛ, ‘Kɔ ná kɔhyɛ ngɔm kyire me maen Yisrael.’

¹⁶“Na afei tie AWURADE noa dwirɛ. Ɛnwa, ‘Nnɛhyɛ ngɔm tia Yisrael, yeɛ Yisake boso ama nwo dwirɛ bɔ ɔte mayee ne, nnɛbɔ ye dawure.’

¹⁷Yiti AWURADE nwa nyoo, ‘Ɛye kɔyɛ gyanderaniɛ wɔ kuro ne anu, na wɔ mma mmienzua ne wɔ mma mmrasua kɔtotɔ ngrandɛ noa, bɛkɔfa ɛwɛen bɛkɔto w’aseɛ nu bɛkɔhyɛ bɛkɔfa, ekowu wɔ aseɛ bɔ ye nwo agua fiɛ ɔ so, na amba, bɛkɔhye Yisrael nnure bekofi ye aseɛ so bɛkɔhɔ.’ ”