Read Sehwi Amose 8 Bible Online

Amose 8 - Sehwi bible

Amose 8

¹Ɛhe yeɛ AWURADE Nyameɛ ye hyirele me ɔ: na tie, né ɔte borɔdoma bɔ waboro ɔ kɛndɛen ko.

²Obisale me kyɛ, “Amose, bɔ enwu ye e, nzikyɛ ɛne?” Na mmuale kyɛ, “Borɔdoma bɔ waboro ɔ kɛndɛen ko.” Yeɛ AWURADE sele me kyɛ, “Me maen Yisrael, b’ayieleɛ ato bɛ. Mengobu me nye mengogua bɛ bɔne so ko.”

³Na asɔneyɛɛ sua ne anu dwein kɔkakyi awuyebɔlɛ sɔ kyẽa ne, AWURADE Nyameɛ noa dwirɛ ɛne. Efuin pee kogua nekaa biala; na bekogyi bɛ bekogua nekaa biala konn!”

⁴Ɛ́mɔtie ɛhe, ɛmɔ bɔ ɛmɔsisi mmenia bɔ bɛyɛ anwumvo ɔ, kyɛ ɛmɔfa so ma aseɛ ne aso ehiafoɛ bedi amia,

⁵ná ɛmɔkã kyɛ, “Kyinzu yeɛ ɛsraen foforɛ ne kɔpɛ nu maa yɛkɔtɔne aburoo ɔ; yeɛ mmerɛ beni yeɛ afofikyẽa ne kɔpɛ nu kɔhɔ, maa yɛkobukyebukye atokoɔ pata anoa nemɔ ɔ? Yɛkosi olonka ne abo, ná yama sekel ne ayɛ piri, ná yafa tonyi bɔ bawura nu ɔ yasisi mmenia ɔ.

⁶Ɛhe kɔmaa yɛkɔfa ɛdwetɛ yɛkɔtɔ ehiafoɛ, yɛkɔfa mmaboa yɛkɔtɔ bɛ bɔ bɛyɛ anwumvo ɔ, ná yatɔne atokoɔ boso bɔ ɔtte mayee ne.

⁷AWURADE ata Yakob anwomasoɛ ne anwo ndaen kyɛ, “Amba, me wora ngofi bɛ yɔleɛ nemɔ anu biala.

⁸Ɔnate sɔ ati, aso aseɛ ngɔwoso anaa, na so ama amukoraa, aso bengoli aworabɔlɛ anaa? Aseɛ ne amukoraa kohuhu kyɛ asue Naele bɔ wayi ɔ, bekohuruhuru ye, na afei ɔkɔhwe kyɛ Misraim asue Naele.

⁹Na AWURADE nwa nyoo, “Ɔkɔwa kyɛ, sɔ kyẽa ne, ngɔma eyia kɔɔtɔ eyiagyina, na ngɔma awosii kɔwa aseɛ so eyia petee.

¹⁰Ngɔkakyi ɛmɔ poentolɛ nemɔ aworabɔlɛlilɛ, yeɛ ɛmɔ dwein amukoraa awuyebɔlɛ; ngɔma ebiala kɔhera ɛsɛen tena, ná mama ebiala abɔ tikwa. Ngɔmaa ɔkɔyɛ kyɛ bahorɛ wue nwo aworabɔlɛlilɛ, ayieleɛ ne kɔyɛ kyɛ aworabɔlɛ kyẽa.

¹¹“Tie, mmerɛ bie ɔ́ba, bɔ ngɔma ɛhɔen kandinga bie kɔwa aseɛ ne aso, bɔ nna aleɛ hɔen ɔ, yeɛ nna nzuhɔen ɔ, na mmom AWURADE dwirɛ tiele nwo hɔen ɔ”, AWURADE noa dwirɛ ɛne.

¹²Mmenia kohyini kofi mboanoa bɛkɔɔhã mboanoa, bekofi sorɔ bekoodwu eyia afiteleɛ; bekoli akɔneaba bɛkɔpena AWURADE dwirɛ si atee, nakoso bengonwu ye.

¹³Sɔ kyẽa ne, nzuhɔen kɔma ndaluwa anwonyemene ne mmerandeɛ bɛ nye so koburu bɛ.

¹⁴Bɛ bɔ bɛfa Samaria mmosoen bɛteta ndaen bɛkã kyɛ, ‘Ao Dan, kyɛ wɔ nyameɛ te ase ye e’, yeɛ ‘Kyɛ Beɛ Seba atee te ase ye’ ne, bekofifi ase bɔ bengodwɔso ko ɔ.”