Read Sehwi Amose 9 Bible Online

Amose 9 - Sehwi bible

Amose 9

¹Nwuni AWURADE kyɛ ogyi afɔleɛ bokyea ne aso, na ɔhane kyɛ, “Bonima abotire ne, fa nikyee bɔ so maa aponnwaa nemɔ bɛwoso, ná dwiri gua bɛ mukoraa bɛ ti so, na ngɔfa ngrandɛ ngohũhũ bɛ bɔ baha ne. Bɔ ɔkɔyɛ kyɛ ɔnwati biala, ɔngɔhora nwati, yeɛ bɔ okofi nu kofite biala, ongonya ye ti ngodidi nu.

²“Sɛ betu bɔen bekodwu ɛborɔ po a, dɔ yeɛ me sa kɔye bɛ kofi ɔ. Sɛ bɛfo bɛkɔ nyameɛso po a, dɔ yeɛ ngɔye bɛ ngofi ngɔwa ase ɔ.

³Sɛ bɛkɔfea Kamɛl ti afia dɔ po a, ngɔpena bɛ ngɔye bɛ ngofi dɔ, na sɛ bɛfa bɛ nwo bɛfea me bekowura ɛpo ye bo dɔ po a, dɔ yeɛ ngɔfa ahyɛdeɛ ngɔma ewoo maa ɔkɔkekã bɛ ɔ.

⁴Sɛ bɛkye bɛ nnure bɛkɔ bɛ pɔfoɛ mɔ nyunu po a, dɔ yeɛ ngɔhyɛ ngrandɛ maa okohũhũ bɛ ɔ; na ngotu me nye ngosie bɛ so ngɔfa bɔ ɔtte mayee ɔ ngoli bɛ, na mmom nna paa ɔ.”

⁵AWURADE, Asafo Nyameɛ, ye yeɛ ɔfa ye sa kã aseɛ maa ohuro, maa aseɛ ne aso ama mukoraa bedi aworabɔlɛ, ná aseɛ ne amukoraa huhu kyɛ asue Naele, ná ɔtwe kyɛ Misraim asue Naele ɔ.

⁶Ye bɔ osi ye aborɔsaen wɔ ewienu, ná ɔfa ye ngatasoɛ obutu aseɛ so; ye bɔ ɔfrɛfrɛ ɛpo nu nzue, ná ohwie bɛ gua aseɛ ye aso ne, ye dumaa ole AWURADE.

⁷“Ao Yisraelfoɛ, ɛmɔ, aso ɛmɔ bɛtte kyɛ Yitiopiafoɛ bɛmma me anaa? AWURADE noa dwirɛ ɛne. Aso manye Yisrael mamvi Misraim aseɛ so anaa? Aso manye Filistifoɛ mamvi Kafito, yeɛ manye Siriafoɛ mamvi Kire anaa?

⁸Tie, AWURADE Nyameɛ watu ye nye wasie ahennie bɔ bɔne ali ye ti ne aso, na ngonua ye boso ngofi aseɛ ye aso. Nakoso mengonua Yakob awuro ama boso bɔkɔɔ,” AWURADE noa dwirɛ ɛne.

⁹“Ofikyɛ tie, ngɔfa ahyɛdeɛ ngɔma, na ngohuhu Yisrael awuro ama so wɔ maen maen amukoraa nu, kyɛbɔ behuhu aburoo so wɔ huhuamoa nu ɔ, nakoso aburoo ne kaaba ko po ngɔtɔ ase.

¹⁰Me maen nu bɔnefoɛ amukoraa bɛkɔtotɔ ngrandɛ noa; bɛ yeɛ bɛkekã kyɛ, ‘Musue biala ngɔto yɛ anaa ɔngɔhora yɛ’ ne.

¹¹“Sɔ kyẽa ne, Dawide ɛtena sua bɔ watɔ ase ne, ngɔpagya ngosie berɛ, na ngɔpomba ye nekaa bɔ wasunzua nemɔ; ngɔpagya bɔ wabubu wagua ase ne ngogyina berɛ, ná masa masi ye kyɛbɔ né ɔte daa tete ne ala;

¹²amaa ɔnate so bafa Edom ngaa ne bayɛ bɛ deɛ, ɔne maen maen amukoraa bɔ me dumaa la bɛ so ne bayɛ bɛ deɛ,” AWURADE bɔ ɔyɔ sɔ ne, ye noa dwirɛ ɛne.

¹³“Tie, mmerɛ bie ɔ́ba bɔ sona bɔ ofundam aseɛ ne, ye nwo kɔyɛ nyera kɔtra bɔ ɔte nnɔbaeɛ ɔ; bɔ otwi bobe nzaa ne, ye nwo kɔyɛ nyera kɔtra bɔ odua mmakaammaa ɔ; mmokaa nemɔ kɔpe nzaa menemene, na ɔkɔtengyɛ kɔfa pambaa nemɔ amukoraa so, AWURADE noa dwirɛ ɛne.

¹⁴Ngosa ngɔfa me maen Yisrael ngofi nnurehyelɛ nu ngɔwa, na bekosa bɛkɔkyekye kurofoen nemɔ bɛkɔtenatena so, bɛkɔyɛ bobe boo mɔ bɛkɔno bobe nzaa, na bɛkɔyɛ turo mɔ bekoli nu mmakaammaa ne.

¹⁵Ngolua bɛ wɔ b’aseɛ so, na bɛ bo ngotutu ko le ngofi b’aseɛ bɔ mafa mama bɛ ne aso,” AWURADE wɔ Nyameɛ noa dwirɛ ɛne.