Read Sehwi Yona 1 Bible Online

Yona 1 - Sehwi bible

Yona 1

¹ Na AWURADE lale ye dwirɛ ali hyirele Amitae awa Yona kyɛ,

²“Dwɔso kɔ Ninewe, sɔ kuro piri ne aso, ná bɔ ye dawure kyire bɛ kyɛ b’amumuyɛɛ wafo waadwu me nyunu.”

³Nakoso Yona dwɔsole kyɛ ɔnwati fi AWURADE nyunu ɔkɔ Tasise. Ɔhɔle Yopa, na onwuni ɛlɛen bie bɔ ɔkɔ Tasise ɔ. Yiti otuale ye ɛlɛen sikaa ne, na ɔfo ɔtenane nu kyɛ ɔnwati fi AWURADE nyunu ɔne bɛ kɔ Tasise.

⁴Nakoso AWURADE somane mvrama bie bɔ ye noa yɛ hye ɔ maa otu fale ɛpo ne aso, na mvrama piri tu fale ɛpo ne aso, bɔ né ɛlɛen ne ɔpena odwudwa ɔ.

⁵Afei né ɛlɛenhanɛfoɛ nemɔ besuro. Yiti bɛ nu biala sũ frɛle ye nyameɛ, na befindini ɛlɛen ne anu nningyein beguale ɛpo ne anu, kyɛbɔ ɔkɔmaa ɛlɛen ne anu kɔyɛ nyera ɔ. Nakoso Yona de, né wadwu wahɔ ɛlɛen ne akunu dɔ paa waala hatee.

⁶Yiti ɛlɛenhanɛfoɛ nemɔ so panyi ne wale ye berɛ oosele ye kyɛ, Hei! Wɔ bɔ alafe hatee ɔ, nzikyɛ yeɛ ɛpena kyire ye? Dwɔso, sũ frɛ wɔ nyameɛ, na ebiaa nyameɛ ne kɔdwene yɛ nwo ná yanwuwu.

⁷Yeɛ besisele bɛ nwo bɛ nwo kyɛ, “Ɛmɔbra maa yɛgua serewa, amaa ɔnate so yanwu sona horɛ bɔ ye ti yeɛ sɔ musue he wato yɛ ye.” Yiti beguale serewa, na serewa ne yele Yona.

⁸Yeɛ besele ye kyɛ, “Yɛsrɛ wɔ, nikye horɛ bɔ ye ti yeɛ musue he ato yɛ ne, kã kyire yɛ. Nzikyɛ adwuma yeɛ ɛyɔ ɔ? Efi nisua? Efi maen beni aso? Wɔ si fi ni?”

⁹Na obuale bɛ kyɛ, “Me, nde Hebriniɛ. Mesɔne AWURADE, nyameɛso Nyameɛ bɔ ɔbɔle ɛpo ne aseɛ wosee ne.”

¹⁰Na afei mmenia nemɔ surole paa, na besele ye kyɛ, “Nzu ati yeɛ ayɔ sɔ nikyee ye?” Né mmenia nemɔ banwu kyɛ wanwati wafi AWURADE nyunu, ofikyɛ né wahã wahyire bɛ.

¹¹Yeɛ bebisale ye kyɛ, “Nzikyɛ yeɛ yɛfa yɛyɔ wɔ ɔ, bɔ ɔkɔmaa ɛpo ne kɔla dinn kɔma yɛ ɔ? Ofikyɛ né ɛpo ne tɛ gu so obu fa so.

¹²Na obuale bɛ kyɛ, “Ɛ́mɔma me so, ɛ́mɔfindi me bɛto ɛpo ne anu, na ɛpo ne kɔla dinn kɔma ɛmɔ; ofikyɛ mese kyɛ ɔnate me ti yeɛ mvrama piri he otu fa ɛmɔ ti anwo ye.”

¹³Nakoso mmenia nemɔ bɔle bɛ nwo mmɔden biala kyɛ bɛkã ɛlɛen ne bekodwu etii so, nakoso bangora, ofikyɛ né ɛpo ne tɛ gu so obu fa so oyia bɛ.

¹⁴Yiti bɛteane nu besu bɛfrɛle AWURADE kyɛ, “Ao AWURADE, yɛsrɛ wɔ, akoaa he wue ne, nnɛmaa yiti yɛwuwu, yeɛ nnɛmaa yɛdi mogya bɔ odi be ɔ nwo fɔ, ofikyɛ wɔ, AWURADE, bɔ ekuro yeɛ ayɔ ɔ.”

¹⁵Yiti bɛmane Yona so begyili ye bɛtole ɛpo ne anu, na ɛpo ne yakyili ebulɛ bɔ obu fa so ne.

¹⁶Yeɛ mmenia nemɔ surole AWURADE paa, na bɛbobɔle afɔleɛ bɛmane AWURADE, na bɛbobɔle ye anohoba.

¹⁷ Na AWURADE siesiele tiré kandinga bie maa ɔmene Yona. Na Yona lili ɛlɛsa eyia ne kɔngɔen wɔ tiré ne kunu.