Read Sehwi Yona 2 Bible Online

Yona 2 - Sehwi bible

Yona 2

¹Yeɛ Yona bɔle mbaeɛ hyirele AWURADE ye Nyameɛ wɔ tiré ne akunu dɔ kyɛ,

²“Nzu mvrɛle AWURADE wɔ m’amaneɛnwunɛ nu, na otiele me; ndeane nu mvili ɛborɔ kunu dɔ, na etiele me sufrɛ.

³Ofikyɛ egyili me tole buma nu, wɔ ɛpo afia, na nzue bɔ wayi ne pɛle me nwo yiale; w’asorɔkye amukoraa ne wɔ nzue wuruwuru ne, obu fale me so.

⁴Yeɛ ngane kyɛ, ‘Afoa me afi wɔ nyunu, nakoso ngosa ngɔto me nye ngɔnea w’asɔneyɛɛ sua krongron ne.’

⁵Nzue ne pɛle me nwo bra yiale oodwuli me kra po, buma ne mene me, yeɛ ɛpo nu ndire brabrale me ti.

⁶Ndwu ngɔle mmokaa nemɔ abo dɔ paa, ndwu ngɔle aseɛ ne aso; aseɛ bɔ ye mmuralɛ bɔ ɔbrambram ye pambim mɔ asi ne, ɔhane me miane afebɔɔ ne. Nakoso ao AWURADE me Nyameɛ, ɛyele me ngoa fili ɛborɔ kumaa nu dɔ fite wale.

⁷Na mmerɛ bɔ me kra botole wɔ me nu ne, ngayele AWURADE, na me mbaeɛ dwuli wɔ berɛ, wɔ w’asɔneyɛɛ sua krongron ne anu.

⁸Bɛ bɔ bɛsɔne mmosoen bɔ bɛtte huu ne, bɛpo bɛ bɔbɔ b’anwumvoinnwunɛ.

⁹Nakoso ngɔfa asennaa komviɛ ngɔbɔ afɔleɛ ngɔma wɔ. Ngotua m’aboadeɛ bɔ maboa ne. AWURADE berɛ yeɛ ngoalelɛ fi ɔ!”

¹⁰Yeɛ AWURADE dwudwo hyirele tiré ne, na ɔɔfele Yona tole etii so.