Read Sehwi Yona 4 Bible Online

Yona 4 - Sehwi bible

Yona 4

¹Nakoso edwirɛ ne anyɛ Yona fɛ koraa, na ɔfɛle yaa hahii.

² Na ɔbɔle mbaeɛ bisale AWURADE kyɛ, “Ao AWURADE, mesrɛ wɔ, mmerɛ bɔ né nwɔ me maen nu ne, aso nna edwirɛ he yeɛ ngane ɔ? Ye sɔ ti yeɛ nwatili kyɛ ahaa mekɔ Tasise ne, ofikyɛ mese kyɛ ɛte Nyameɛ bɔ ɛdo mmenia ná ɛse anwumvoin ɔ, w’ahone nhu ndɛ, wɔ ɔdɔ bɔ onni ngasi ne ɔte piri, na ɛsesã w’adwene wɔ musue bɔ ɛbaafa ba ɔ nwo.

³ Na afei, ao AWURADE, mesrɛ wɔ, de me ngoa fi me sa nu, ofikyɛ ɔte paa ma me kyɛ ngowu tra kyɛ ngɔtena ngoa nu ɔ.”

⁴Yeɛ AWURADE buale kyɛ, “Aso ɔte paa kyɛ ɛfɛ yaa ɔ?”

⁵Yiti Yona fili kuro ne anu, na ɔɔtenane kuro ne eyia afiteleɛ so. Ɔbɔle asese wɔ berɛ, na ɔtenane ye bo fɔnwoo ne abo, kyɛ ɔnea bɔ ɔkɔto kuro ne ɔ.

⁶Na AWURADE Nyameɛ siesiele ngomvo bakaa bie maa onyi katale Yona so, kyɛ ɔyɛ fɔnwoo ɔkata ye ti so, ná ɔye ye ofi ye amaneɛ ne anu. Yiti Yona nye gyele ngomvo bakaa ne anwo paa.

⁷Nakoso aleɛ hyene bɔ eyia opukye ne, Nyameɛ siesiele anyinaboa bie maa olili ngomvo bakaa ne maa bakaa ne wuli.

⁸Na eyia pukyele ne, Nyameɛ somane eyia afiteleɛ mvrama hyerɛhyerɛ bie; eyia ne bɔle Yona ti afia maa ɔyɛle mmerɛ, bɔ ɔhale ye ngome a ahaa né wawu ɔ. Na ɔhane kyɛ, “Ɔte paa ma me kyɛ ngowu tra kyɛ ngɔtena ngoa nu ɔ.”

⁹Yeɛ Nyameɛ bisale Yona kyɛ, “Aso ɔte paa kyɛ ngomvo bakaa ne ati ɛfɛ yaa ɔ?” Na obuale kyɛ, “Yoo, odi kyɛ mefɛ yaa bɔ mewu po a ahaa mekuro ɔ.”

¹⁰Yeɛ AWURADE sele kyɛ, “Ngomvo bakaa bɔ nna wɔ yeɛ ɛfɛle ye nwo, bɔ nna wɔ yeɛ ɛmaa onyini ɔ, bɔ oogyinane berɛ kɔngɔen, ná owuli kɔngɔen ne, ye po anwu ye anwumvoin.

¹¹Na Ninewe, sɔ kuro piri ne, bɔ nu mmenia bɛ somaa bo apee ɛyaa ko aburanyɔ, bɔ bɛnze bɛ sa bɛen ne bɛ sa famaa nu nzonzoleɛ, kuro bɔ nyɛmmoa pee wɔ nu ne, aso onni kyɛ menwu ye anwumvoin anaa?”