Read Sehwi Numeri 10 Bible Online

Numeri 10 - Sehwi bible

Numeri 10

¹AWURADE sele Mose kyɛ,

²“Boro ɛdwetɛ fa yɔ totorobɛndo nyɔ bɔ ɛkɔfa kɔfrɛ maen ne maa bɛkɔbɔ dwaa, ná asa ahu amaa batu bɛ bo bafi asikyeleɛ ne anu ɔ.

³Sɛ behu bɛ munyɔ ne a, odi kyɛ maen ne amukoraa babɔ dwaa wɔ wɔ nyunu wɔ ɛtena sua atenaleɛ anoa nu berɛ.

⁴Nakoso sɛ behu komapɛ a, mbanyi mɔ bɔ bɛlela Yisrael mmusua kure nemɔ anoa ne yeɛ beeyia wɔ wɔ nyunu ɔ.

⁵Sɛ ɛmɔhu maa okyire kyɛ edwirɛ asi a, odi kyɛ asikyeleɛ mɔ bɔ bɛwɔ eyia afiteleɛ ne betu bɛ bo.

⁶Na sɛ ɛmɔhu ye bɔ ɔtɔ so pɛen nyɔ maa okyire kyɛ edwirɛ asi a, odi kyɛ asikyeleɛ mɔ bɔ bɛwɔ ngwaen ne betu bɛ bo. Mmerɛ biala bɔ ɔsɛ kyɛ betu bɛ bo ne, odi kyɛ behu maa okyire kyɛ edwirɛ asi.

⁷Nakoso sɛ odi kyɛ maen ne amu bɛbɔ dwaa a, ye de ɛ́mɔhu, nakoso nnɛma ɛ́mɔhu maa okyire kyɛ edwirɛ asi.

⁸Aarɔn mma mmienzua nemɔ bɔ bɛ yeɛ bɛte asɔfo ne yeɛ odi kyɛ behu totorobɛndo ne ɔ. Ɛ́mɔma ɔyɛ daa ahyɛdeɛ ɔma ɛmɔ wɔ ɛmɔ aworɛ ndoatoasoɛ amukoraa nu.

⁹Sɛ ɛmɔ ne ɛmɔ pɔfoɛ mɔ bɔ bɛtane ɛmɔ nye bɛko koɛ wɔ ɛmɔ aseɛ ne aso a, ɛ́mɔhu totorobɛndo nemɔ maa ohyire kyɛ edwirɛ asi, amaa ɔnate so AWURADE ɛmɔ Nyameɛ waboka ɛmɔ, ná ɛmɔanya ɛmɔ ti badidi nu bafi ɛmɔ pɔfoɛ mɔ sa nu.

¹⁰Afei koso, ngyẽa bɔ ɛmɔfa bɛgye bɛ nye, ɔne ɛmɔ aluolue ngyẽa, ɔne kyẽa bɔ bosome kofi ne, ɛ́mɔhu totorobɛndo nemɔ wɔ mmerɛ bɔ ɛmɔbɔ ɛmɔ naen yeralɛ afɔleɛ ɔne ɛmɔ asomdwee afɔleɛ ɔ. Bɛkɔyɛ ngayeɛ nikyee bɛkɔma ɛmɔ wɔ AWURADE ɛmɔ Nyameɛ nyunu: Me ole AWURADE ɛmɔ Nyameɛ.

¹¹Befili Misraim ne, afoɛ bɔ ɔtɔ so nyɔ ne, ye bosome bɔ ɔtɔ so nyɔ ne, ye kyẽa bɔ ɔtɔ so aburanyɔ ne, munungum ne mane ye nwo so fili adanzeɛ ɛtena sua ne aso.

¹²Afei Yisraelfoɛ sili nu kure kure fili Sinai ɛserɛ ne aso, na munungum ne oogyinane Paran ɛserɛ ne aso.

¹³Betuli bɛ bo bɔ oli moa ne, begyinane AWURADE dwirɛ bɔ ɔnate Mose so hane ne aso yeɛ betuli ɔ.

¹⁴Yuda asikyeleɛ ne anu ama yeɛ bɛfale bɛ frangaa belili moa betuli bɛ bo kure kure ɔ. Aminadabo awa Nason yeɛ né otua Yuda ɛlɔen ne amukoraa bɛ noa ɔ.

¹⁵Né Suare awa Netanɛl yeɛ otua Yisaka abusua kure ɛlɔen ne noa ɔ;

¹⁶yeɛ né Helon awa Eliabo yeɛ otua Sebulɔn abusua kure ɛlɔen ne noa ɔ.

¹⁷Afei betutuli nyianu sua ne, na Gɛsɔnfoɛ ne Merarifoɛ bɔ bɛ yeɛ bɛsoa nyianu sua ne, betuli bɛ bo.

¹⁸Ruben asikyeleɛ ne anu ama bɛfale bɛ frangaa ne betuli bɛ bo kure kure, na Sedɛre awa Elisure yeɛ né otua Ruben ɛlɔen ne amukoraa bɛ noa ɔ.

¹⁹Né Surisadai awa Selumiɛl yeɛ otua Simeon abusua kure ɛlɔen ne noa ɔ;

²⁰yeɛ né Dewel awa Eliasafe yeɛ otua Gade abusua kure ɛlɔen ne noa ɔ.

²¹Yeɛ Kohatefoɛ bɔ bɛ yeɛ bɛsoa nningyein krongron ne, betuli bɛ bo, na Gɛsɔnfoɛ ne Merarifoɛ bɛhyehyɛle nyianu sua ne koraka yeɛ Kohatefoɛ bedwu berɛ ɔ.

²²Afei, Efraim asikyeleɛ ne anu ama bɛfale bɛ frangaa betuli bɛ bo kure kure, na Amihude awa Elisama yeɛ né otua Efraim ɛlɔen ne amukoraa bɛ noa ɔ.

²³Né Pedasure awa Gamaliɛl yeɛ otua Manase abusua kure ɛlɔen ne noa ɔ;

²⁴yeɛ né Gideoni awa Abidan yeɛ otua Benyamin abusua kure ɛlɔen ne noa ɔ.

²⁵Afei Dan asikyeleɛ ne anu ama, bɔ bɛ yeɛ bɛte koɛhonɛfoɛ bɔ beli nziɛ bɛbɔ ɛlɔen ne amukoraati bɛ nwo waen ne, bɛfale bɛ frangaa betuli bɛ bo kure kure. Né Amisadae awa Ahiesa yeɛ otua Dan ɛlɔen ne amukoraa bɛ noa ɔ.

²⁶Né Okran awa Pagyiɛl yeɛ otua Asɛ abusua kure ɛlɔen ne noa ɔ;

²⁷yeɛ né Enan awa Ahira yeɛ otua Nafetali abusua kure ɛlɔen ne noa ɔ.

²⁸Mmerɛ biala, sɛ né Yisraelfoɛ betu bɛ bo befi asikyeleɛ ne anu a, bɛ koɛhonɛfoɛ kure kure nemɔ, sɔ nhyehyɛleɛ ne yeɛ né begyina so bɛfa bɛkɔ ɔ.

²⁹Mose sele Midianniɛ Rewel bɔ yeɛ ɔte ye sia bienzua ne, ɔwa Hobabo kyɛ, “Yɛtu yɛkɔ nekaa bɔ AWURADE aha ye nwo dwirɛ kyɛ, ‘Ngɔfa ngɔma ɛmɔ’ ne. Ɛne yɛ hɔ, na yɛkɔnea wɔ yé; ofikyɛ AWURADE ahyɛ Yisrael bɔ kyɛ ɔkɔmaa okoyie ye yé.”

³⁰Nakoso Hobabo buale ye kyɛ, “Mengɔhɔ, na mmom mesa mekɔ me bɔbɔ me maen nu ne m’abusuafoɛ dɔ.”

³¹Yeɛ Mose sele kyɛ, “Nnɛyakyi yɛ nu, ofikyɛ wɔ yeɛ ɛse nekaa bɔ odi kyɛ yɛkyekye asikyeleɛ wɔ ɛserɛ ne aso ɔ, na wɔ yeɛ ɛkɔhora kohyire yɛ atee ɔ.

³²Asa koso, sɛ ɛne yɛ kɔ a, nikyee paa biala bɔ AWURADE kɔfa kɔlo yɛ ne, yɛ koso yɛkɔmaa ekonya bie.”

³³Yiti besili nu befili AWURADE bokaa ne aso bɛpɛle atee bɔ bɛfa ɛlɛsa yeɛ bɛpɛ ɔ. Né AWURADE apam alaka ne li bɛ nyunu wɔ sɔ ɛlɛsa ateetulɛ ne anu kyɛ ɔkwaapena nekaa maa bɛkyekye asikyeleɛ.

³⁴Mmerɛ biala sɛ né betu bɛ bo befi asikyeleɛ ne anu a, né AWURADE munungum ne mundu bɛ so eyia.

³⁵ Mmerɛ biala bɔ alaka ne kotu ye bo ne, Mose ka kyɛ, “O AWURADE dwɔso, ná ma wɔ pɔfoɛ mɔ bɛbɔ aya, ná ma bɛ bɔ bekyi wɔ ɔ bɛnwati befi wɔ nyunu.”

³⁶Mmerɛ biala bɔ apam alaka ne kogyina neka horɛ ne, Mose ka kyɛ, “Sá bra, O Yisraelfoɛ apee apee b’AWURADE.”