Read Sehwi Numeri 12 Bible Online

Numeri 12 - Sehwi bible

Numeri 12

¹Mmerɛ bɔ né bɛwɔ Haserote né, Miriam ne Aarɔn dwudwo tiale Mose, ɔnate kyɛ né Mose waagya Kuseniɛ braa bie (né wagya Kuseniɛ braa amba).

²Na besele kyɛ, “Aso Mose ngome yeɛ AWURADE afa ye so wadwudwo anaa? Aso yɛ koso, ɔffale yɛ so oddwudwole anaa?” Na AWURADE tele sɔ dwirɛ ne.

³Né Mose odwo tra sona biala bɔ ɔwɔ aseɛ ye aso ɔ.

⁴Mvum nu, AWURADE sele Mose, Aarɔn ɔne Miriam kyɛ, “Ɛmɔ amɛsa, ɛmɔbra ɛtena sua atenaleɛ ne anu.” Yiti bɛ mmɛsa befite bɛwale.

⁵AWURADE nate munungum ningɔnn nu dwu wale ase, na oogyinane ɛtena sua ne anoa nu berɛ. Ɔfrɛle Aarɔn ne Miriam, na bɛ munyɔ bɛwale anyunu.

⁶Na AWURADE sele kyɛ, “Ɛ́mɔtie edwirɛ bɔ meka ye: Sɛ ngɔmhyɛlɛniɛ bie wɔ ɛmɔ nu a, me AWURADE yeɛ mefa nyekyire nu meye me nwo ali mekyire ye ɔ; medwudwo mekyire ye wɔ laleɛ nu.

⁷ Nakoso Mose deɛ de, ɔtte sɔ; me maen amukoraati wura ye sa.

⁸ Ye de megyina ye nyunu me ne ye yɛdwudwo pefee; mendwudwo mengyire ye anyandera nu; na onwu kyɛbɔ AWURADE ye sue te ɔ. Nzu ati yeɛ ɛmɔanzuro kyɛ ɛmɔkodwudwo bekotia me somvoɛ Mose ɔ?”

⁹AWURADE fɛle bɛ so yaa paa, na ofili bɛ berɛ hɔle.

¹⁰Munungum ne fili ɛtena sua ne aso hɔle ne, né kwata anwonyerɛ ayɛ Miriam maa ye nwo ayɛ horaenn kyɛ asukɔtwea. Aarɔn pɛnene ye nye neane Miriam, na onwuni kyɛ kwata anwonyerɛ ayɛ ye.

¹¹Yeɛ Aarɔn sele Mose kyɛ, “Ao, me mene, nnɛtwe yɛ so wɔ bɔne bɔ yali ngwaseasɛm yayɔ ye anwo.

¹²Nnɛmaa Miriam yɛ kyɛ baa bɔ bapɔ ye ɔ, bɔ ofi oni kunu wale ne, né ye nwonaen bue asɛkye dada ɔ.”

¹³Na Mose sũ frɛle AWURADE kyɛ, “Ao Nyameɛ, mesrɛ wɔ, sa ye anwonyerɛ.”

¹⁴Nakoso AWURADE buale Mose kyɛ, “Sɛ ɔse fele nwɔserɛ guale ye nyunu a, aso ahaa ye nyunu ngogua ase ɛlɛsoo? Maa bɛye ye maa ɔɔtena asikyeleɛ ne asi dɔ ɛlɛsoo, ná ye si né basa bafa ye bawa asikyeleɛ ne anu.”

¹⁵Yiti bɛyele Miriam bɛhɔle asikyeleɛ ne asi dɔ ɛlɛsoo; na mmenia ne andoa ateetulɛ ne aso maa odwuli kyɛ besa bɛfale Miriam bɛwale asikyeleɛ ne anu ɔ.

¹⁶Ɛhe asi ye, mmenia ne tuli bɛ bo fili Haserote, na bɛɛkyekyele asikyeleɛ wɔ Paran ɛserɛ ne aso.