Read Sehwi Numeri 16 Bible Online

Numeri 16 - Sehwi bible

Numeri 16

¹ Kora baba ole Yisare bɔ ye baba ole Kohate bɔ ye koso ye baba ole Lewi ne. Eliabo mma Datan ne Abiram, yeɛ Pelete awa On bɔ bɛte Ruben bosofoɛ ne, Kora ne bɛ bɛfale

²Yisraelfoɛ mmienzua ɛyaa nyɔ ne aburannu, bɔ bɛte maen mbanyi, bɔ bapa nu baye bɛ, bɔ bɛte atitirefoɛ ɔ, na bɛhɔle Mose so.

³Bɛyɛle lɔen betiale Mose ne Aarɔn, na besele bɛ kyɛ, “Ɛmɔduo boɛ! Maen ne anu mmenia amu te krongron, ebiala te krongron, na AWURADE gyi bɛ si. Nzu ati yeɛ ɛmɔafo batena AWURADE mmenia kɔme so ɔ?”

⁴Mose tele ɛhe ne, ɔfale ye nyunu butuli ase.

⁵ Na osele Kora ne ye lɔen ne amukoraa kyɛ, “Ɛhema ngyerɛmɔ, AWURADE kɔmaa yɛkonwu sona horɛ bɔ ɔte AWURADE deɛ ɔ, bɔ ɔte krongron ɔ, ɔne bɔ ɔkɔpene so maa okopingye ye ɔ. Sona bɔ AWURADE kɔnea nu kɔye ye ne, ɔkɔmaa okopingye ye.

⁶Wɔ Kora, ɛne wɔ lɔen, bɔ odi kyɛ ɛmɔyɔ hɔ ɛhe: ɛ́mɔfa see kulie mɔ.

⁷Ɛhema ɛ́mɔfa see begua bɛ nu, na ɛ́mɔfa ɛyɛɛ bégua so wɔ AWURADE nyunu. Na sona bɔ AWURADE kɔnea nu kɔye ye ne, ye yeɛ ɔte krongronniɛ ne ɔ. Ɛmɔ Lewifoɛ, ɛmɔduo boɛ!”

⁸Yeɛ Mose sele Kora kyɛ, “Afei ɛmɔ Lewifoɛ, ɛ́mɔtie!

⁹Aso ɔte nikyee ba ma ɛmɔ, kyɛ Yisrael Nyameɛ waneanea Yisraelfoɛ nu waye ɛmɔ, ná wama ɛmɔ ate kyɛ ɛmɔbra ye nyunu bɛɛyɔ AWURADE nyianu sua ne anu adwuma, ná ɛmɔgyina maen ne anyunu bɛso bɛ ɔ?

¹⁰Wama wɔ ne eliɛma mɔ Lewifoɛ amukoraa ate ama ɛmɔawa ye nyunu; nakoso afei de ɛmɔpere asɔfo adwuma ne bɛboka so!

¹¹Yiti ɛne wɔ mmenia bɔ bɛboka wɔ so ne amukoraa, ɛmɔayɔ AWURADE nwo lɔen. Aarɔn ole nwa bɔ ɛmɔpenepene bɛ komvi begua ye so ye?”

¹²Mose somane maa bɛɛfrɛle Eliabo mma Datan ne Abiram; nakoso besele kyɛ, “Yɛngɔwa!

¹³Aso ɔte edwirɛ baa kyɛ aaye yɛ afi aseɛ bɔ nyɔfonesue ne woɛ tengyɛ wɔ so ɔ so, kyɛ ɛbaahu yɛ wɔ ɛserɛ ye aso, bɔ yeɛ esa hyɛ yɛ so ɔ?

¹⁴Wala ali pefee kyɛ nna aseɛ bɔ nyɔfonesue ne woɛ tengyɛ wɔ so ɔ so yeɛ afa yɛ awa ɔ, yeɛ ɛmma yɛnnyane agyapadeɛ bɔ ɔte aseɛ ne bobe boo ɔ. Nna ɛlakalɛ yeɛ ɛlakalaka mmenia ye ɔ? Yɛngɔwa!”

¹⁵Mose fɛle yaa paa, na osele AWURADE kyɛ, “Nnɛde b’afɔleɛ ne to nu. Nnnele afunum ko po mmvili bɛ berɛ, yeɛ nnyɔle bɛ nu biala tɛɛ.”

¹⁶Afei Mose sele Kora kyɛ, “Ɛne wɔ lɔen ne amukoraa, ɛhema ɛmɔɔgyina AWURADE nyunu, ɛne bɛ ne Aarɔn;

¹⁷ná ma ɛmɔ nu biala ɔ́fa ye see kulie ne, ɔ́fa ɛyɛɛ ogua so, ná ɛmɔ nu biala ɔ́fa ye see kulie ne ɔ́bra AWURADE nyunu: see kulie ne amu te ɛyaa nyɔ ne aburannu. Wɔ koso, ɛne Aarɔn ebiala ɔ́fa ye see kulie deɛ.”

¹⁸Yiti ebiala fale ye see kulie, bɛfale see beguale nu, bɛfale ɛyɛɛ beguale so, na bɛ ne Mose ne Aarɔn beegyinane ɛtena sua atenaleɛ anoa nu berɛ.

¹⁹Yeɛ Kora boaboale maen ne amukoraa noa maa begyinane Mose ne Aarɔn bɛ ndendeneɛ so wɔ ɛtena sua atenaleɛ anoa nu berɛ. Na AWURADE animnyam yele ye nwo ali hyirele maen ne amu.

²⁰Na AWURADE sele Mose ne Aarɔn kyɛ,

²¹“Nnɛma ɛmɔfa bɛ nwo bɛkɔfra sɔ ɛlɔen he anu, na mebaanua bɛ boso kekesaala ye.”

²²Na Mose ne Aarɔn fale bɛ nyunu bebutubutuli ase, na besele kyɛ, “O Nyameɛ, anwoɔnaen amukoraa bɛ sunzum Nyameɛ, aso sona ko yɔ bɔne maa ɔnate so ɛfɛ maen ne amukoraa so yaa anaa?”

²³Na AWURADE sele Mose kyɛ,

²⁴“Ka kyire ɛlɔen ne kyɛ, Ɛ́mɔhwe ɛmɔ nwo befi Kora, Datan ne Abiram b’atenaleɛ nwo.”

²⁵Yiti Mose dwɔsole hɔle Datan ne Abiram berɛ. Na Yisrael mbanyi lili ye si.

²⁶Mose sele maen ne kyɛ, “Ɛmɔhwe ɛmɔ nwo befi amumuyɛɛfoɛ hemɔ b’ɛtena sua nemɔ anwo. Nnɛmɔma ɛmɔ nwo ka bɛ nikye fee; anyɔ a, ɔnate bɛ bɔne amukoraa ti AWURADE konua ɛmɔ aboso.”

²⁷Yiti bɛhwene bɛ nwo befili Kora, Datan ne Abiram b’atenaleɛ nemɔ anwo. Na Datan ne Abiram ne bɛ ye mɔ, bɛ mma mɔ, ɔne bɛ nnomaa mɔ befitele beegyinane b’ɛtena sua nemɔ anoa nu.

²⁸Yeɛ Mose sele kyɛ, “Ɛhe yeɛ ɔkɔmaa ɛmɔkonwu kyɛ AWURADE yeɛ wasoma me kyɛ mmanyɔ sɔ nningyein he amu ɔ; na mmom nna me bɔbɔ yeɛ medi me ti piri ɔ.

²⁹Sɛ mmenia hemɔ bewu bɛ bɔbɔ b’ɛdangama wue, anaa sɛ bɔ ɔto kuro sona biala yeɛ ɔto bɛ a, ye de nna AWURADE yeɛ wasoma me ɔ.

³⁰Nakoso sɛ AWURADE yɔ anwanwadeɛ bie, ná aseɛ bukye ye noa nu meme bɛ ne bɛ nwo ama amukoraa ɔne bɛ nwo nningyein amukoraa, wɔ aberɛ bɔ bɛ nye gua so maa bɛkɔ ɛborɔ a, ye de ɛmɔkonwu kyɛ mmenia hemɔ abu AWURADE animtia.”

³¹Mose noa pene pɛ, aseɛ bɔ sɔ mmenia nemɔ gyigyi so ne anu dwale.

³²Aseɛ bukyele ye noa nu, na ɔmemene bɛ ne bɛ nwo ama: ebiala bɔ né ɔte Kora nwoniɛ, ɔne nikyee biala bɔ ɔte b’agyapadeɛ ɔ.

³³Yiti bɛ ne bɛ nwo ama amukoraa bɛhɔle ɛborɔ dɔ bɔ né bɛ nye gua so ɔ. Aseɛ ne ha tuale katale bɛ so, na bɛ boso nuane fili maen ne anu.

³⁴Ɔnate kyɛ Kora mɔ né bɛbɔ awuye ne ati, Yisraelfoɛ amukoraa bɔ né bapɛ bayia berɛ ne, bɛnwatili, na bɛhane kyɛ, “Aseɛ ne kɔme yɛ koso!”

³⁵Na see fili AWURADE berɛ ɔɔyerale mmienzua ɛyaa nyɔ ne aburannu bɔ né bɛbɔ ɛyɛɛ afɔleɛ ne.

³⁶AWURADE sele Mose kyɛ,

³⁷“Ka kyire ɔsɔfo Aarɔn awa Eleasa kyɛ ɔyeye see kulie nemɔ ofi see bɔ ogye ne anu; ná to see ne pete dededede.

³⁸Amumuyɛɛfoɛ hemɔ bɛ see kulie nemɔ ayɛ krongron, ofikyɛ bafa bɛ ngoa bapɛ so. Yiti maa bɛboro bɛ ma bɛyɛ taataa ná bɛ́fa bɛ́yɛ afɔleɛ bokyea ne ngatasoɛ, ofikyɛ bafa bawa AWURADE nyunu maa bayɛ krongron. Na ngatasoɛ nemɔ kɔyɛ sɛngyerɛnneɛ kɔma Yisraelfoɛ.

³⁹Yiti mmenia bɔ bɛyerale nemɔ bɛ kɔɔbere kulie mɔ bɔ bɛfa bɛwale ne, ɔsɔfo Eleasa fale, na bɛborole bɛ taataa bɛfa bɛyɛle afɔleɛ bokyea ne ngatasoɛ.

⁴⁰Ɛhe te ngayeɛ ma Yisraelfoɛ kyɛ, kyɛbɔ AWURADE nate Mose so ha hyirele Eleasa ne, nnɛma eboosiniɛ biala bɔ nna Aarɔn bosoniɛ ahɔ ɔ, ɔba afɔleɛ bokyea ne anwo kyɛ ɔbaayera ɛyɛɛ wɔ AWURADE nyunu, amaa bɔ ɔtole Kora ne ye lɔen ne bie wando ye.

⁴¹Nakoso aleɛ hyene ne, maen ne amukoraati bɛpenepenene bɛ komvi beguale Mose ne Aarɔn so kyɛ, “Ɛmɔahu AWURADE mmenia.”

⁴²Na maen ne yɛle bɛ nwo lɔen beyiele nen, Mose ne Aarɔn kakyili bɛ nye behyirele ɛtena sua atenaleɛ ne. Né munungum ne amundu so, na né AWURADE animnyam aye ye nwo ali.

⁴³Yeɛ Mose ne Aarɔn wale ɛtena sua atenaleɛ ne anyunu,

⁴⁴na AWURADE sele Mose kyɛ,

⁴⁵“Ɛmɔhwe ɛmɔ nwo befi sɔ lɔen he anwo maa nua bɛ boso kekesaala ye.” Na Mose ne Aarɔn fale bɛ nyunu bebutubutuli ase.

⁴⁶Yeɛ Mose sele Aarɔn kyɛ, “Fa wɔ see kulie ne, fa afɔleɛ bokyea ne anu see ne bie gua nu, fa ɛyɛɛ gua nu, ná fa kɔ maen ne berɛ ndɛndɛ kɔpata ma bɛ. Ofikyɛ AWURADE afɛ ɛyaa hahii; amaneɛ piri ne ahyɛ ye bo.”

⁴⁷Yiti Aarɔn fale see kulie ne kyɛbɔ Mose hyɛle ye ne, na ole amirika hɔle mmenia ne afia, bɛ nu nekaa bɔ né amaneɛ piri ne ahyɛ ye bo ne. Ɔyerale ɛyɛɛ ne, na ɔpatale mane maen ne.

⁴⁸Ogyinane mmenia bɔ bawu ne mmenia bɔ bɛte ase nemɔ afia; na amaneɛ piri ne bo pɛle.

⁴⁹Bɛ bɔ bewuwuli wɔ amaneɛ piri ne anu ne, bɛ somaa te apee buru ne nna ɔne ɛyaa nzoo, asora bɛ bɔ bewuli wɔ Kora ɛlɔenyɛlɛ ne anu ne.

⁵⁰Amaneɛ piri ne bo pɛle ne, Aarɔn sa wale Mose berɛ wɔ ɛtena sua atenaleɛ ne anoa nu berɛ.