Read Sehwi Numeri 17 Bible Online

Numeri 17 - Sehwi bible

Numeri 17

¹Na AWURADE sele Mose kyɛ,

²“Ka kyire Yisraelfoɛ maa bɛma wɔ pɔmaa buru ne nyɔ. Dé fi bɛ bɔ betua bɛ nana mɔ sasofoɛ noa ne amukoraa bɛ dɔ; bɛ bɔ betua bɛ nana mɔ sasofoɛ noa ne, ebiala ye deɛ ko. Kyerɛ ebiala ye dumaa gua ye pɔmaa nwo,

³na kyerɛ Aarɔn dumaa gua Lewi pɔmaa deɛ anwo. Ofikyɛ sona bɔ otua bɛ nana mɔ sasofoɛ noa biala, odi kyɛ onya pɔmaa ko.

⁴Fa gua ɛtena sua atenaleɛ ne anu wɔ Adanzeɛ ne anyunu, nekaa bɔ me ne ɛmɔ yɛyia ne.

⁵Na sona bɔ ngɔneanea nu ngɔye ye ne, ye pɔmaa deɛ kɔfefɛ. Na ɔnate so ngɔma Yisraelfoɛ bɛ komvi bɔ bɛpenepene begua ɛmɔ so daa biala ne, ye bo kɔpɛ.”

⁶Mose ha hyirele Yisraelfoɛ, na bɛ mbanyi nemɔ amu bɛmane ye pɔmaa: panyi biala deɛ ko, pɔmaa buru ne nyɔ kyɛbɔ bɛ nana mɔ sasofoɛ te ɔ, na né Aarɔn pɔmaa deɛ boka bɛ deɛ ne aso.

⁷Yiti Mose fale pɔmaa nemɔ guale AWURADE nyunu wɔ apam ɛtena sua ne anu.

⁸Aleɛ hyene ne, mmerɛ bɔ Mose hɔle apam ɛtena sua ne anu ne, né Aarɔn ye pɔmaa bɔ ɔte Lewi sasofoɛ bɛ pɔmaa ne wafefɛ. Né wabɔ nyerɛen, wanya nyaa, na wasu atonwaa bɔ waboro ɔ.

⁹Yeɛ Mose sesale pɔmaa nemɔ amu fili AWURADE nyunu fitele, na ɔfa brɛle Yisraelfoɛ amu. Bɛneane nu, na ebiala yele ye pɔmaa deɛ.

¹⁰Na AWURADE sele Mose kyɛ, “Sá fa Aarɔn pɔmaa ne baato Adanzeɛ ne nyunu, maa ɔbɔ ɛlɔenyɛlɛfoɛ nemɔ kɔkɔ, bɔ ɔnate so ɛkɔma bɛ komvi bɔ bɛpenepene begua me so ne, ye bo kɔpɛ ɔ, anyɔ sɔ a bekowuwu.”

¹¹Mose yɔle sɔ ala; kyɛbɔ AWURADE hyɛle ye ne ala yeɛ ɔyɔle ɔ.

¹²Yisraelfoɛ sele Mose kyɛ, “Yawu oo, yawu yayie, yɛ mukoraa yawu yayie!

¹³Ebiala bɔ okopingye AWURADE nyianu sua ne, okowu. Aso odi kyɛ yɛ mukoraa yɛtotɔ anaa?”