Read Sehwi Numeri 18 Bible Online

Numeri 18 - Sehwi bible

Numeri 18

¹AWURADE sele Aarɔn kyɛ, “Nekaa krongron ne anu ɛsɔnenɛ ne, bɔne biala ba ye nwo a, ɛne wɔ mma mɔ ne wɔ nana mɔ sasofoɛ yeɛ odi kyɛ ɛmɔnea bedi ye nwo dwumaa ɔ, yeɛ asɔfo adwuma ne koso, bɔne biala ba ye nwo a, ɛne wɔ mma mɔ ngome yeɛ odi kyɛ ɛmɔnea bedi ye nwo dwumaa ɔ.

²Yiti fa eliɛma mɔ bɔ bɛte wɔ nana Lewi abusua kure nu ama ne bra maa bɛɛboka wɔ so, ná bɛso wɔ mmerɛ bɔ yeɛ ɛne wɔ mma mɔ ɛmɔwɔ apam ɛtena sua ne anyunu ɔ.

³ Odi kyɛ bɛso wɔ ná bɛyɔ ɛtena sua ne anu adwuma amukoraa. Nakoso onni kyɛ bepingye nekaa krongron berɛ nningyein nemɔ, anaakyɛ afɔleɛ bokyea ne, amaa ɔnate so bɛ ne ɛmɔ, ɛmɔanwuwu.

⁴Odi kyɛ bɛboka wɔ so bɛyɔ ɛtena sua atenaleɛ ne anu adwuma, ná bɛ́yɔ adwuma biala bɔ ɔfa ɛtena sua ne anwo ɔ. Nnɛmaa ebiala bɔ nna Lewiniɛ ahɔ ɔ opingye ɛmɔ.

⁵Odi kyɛ ɛmɔ bɔbɔ ɛmɔyɔ nekaa krongron berɛ adwuma ne ɔne afɔleɛ bokyea ne anwo adwuma, amaa ɛyaafɛlɛ piri amma Yisraelfoɛ so ko le.

⁶Me yeɛ maneanea Yisraelfoɛ nu maye ɛmɔ aliɛma mɔ Lewifoɛ ɔ. Bɛte akyɛdeɛ bɛma ɛmɔ, bɔ me AWURADE matu bɛ masie berɛ mama me nwo, kyɛ bɛyɔ ɛtena sua atenaleɛ ne anu adwuma ɔ.

⁷Nakoso ɛne wɔ mma mɔ bɔ bɛboka wɔ so de, ɛ́mɔye ɛmɔ kunu bɛ́yɔ ɛmɔ asɔfo adwuma wɔ nikyee biala bɔ ɔfa afɔleɛ bokyea ne anwo, ɔne mbɛmuɛ tena ne asi dɔ nwo ɔ. Mafa asɔfo adwuma ne mahyɛ ɛmɔ. Ebiala bɔ nna Lewiniɛ ahɔ ɔ bɔ ɔkɔwa adwuma ne anwo ne de, odi kyɛ beku ye.”

⁸AWURADE sele Aarɔn kyɛ, “Afɔleɛ bɔ bɛfa bɛbrɛ me ne, bɔ ɔte Yisraelfoɛ akyɛdeɛ krongron amukoraa ne, mafa mawura wɔ sa. Mafa mama wɔ ne wɔ mma kyɛ ɔsɔfo kyɛfa bɔ ɔte ɛmɔ deɛ afebɔɔ ɔ.

⁹Afɔleɛ krongron paa bɔ banyera bɛ wɔ see nu ne, ɛhe yeɛ ɔkɔyɛ wɔ kyɛfa ɔ: b’akyɛdeɛ biala bɔ bɛkɔfa bɛkɔbrɛ me kyɛ nikyee krongron paa ne, kyɛ ɔte aburoo afɔleɛ oo, bɔne nwo afɔleɛ oo, anaa foɛlilɛ afɔleɛ oo, ɔkɔyɛ wɔ ne wɔ mma mɔ deɛ.

¹⁰Ɔte nikyee krongron paa, na ɛmɔli. Bienzua biala kora odi bie; ɔkɔyɛ krongron kɔma ɛmɔ.

¹¹Ɛhe koso te wɔ deɛ: akyɛdeɛ biala bɔ baye bafi Yisraelfoɛ ɛnwahanɛ afɔleɛ amukoraa nu ɔ. Mafa mama wɔ ne wɔ mma mmienzua ne wɔ mma mmrasua. Ɔte akyɛdeɛ afebɔɔ, ebiala bɔ ye nwo te wɔ w’awuro berɛ ne, ɔkora odi bie.

¹²Ngoo ne anu paa paa, nzaa ne anu paa paa, ɔne aburoo ne anu paa paa, fieso aleɛ paa paa bɔ bɛfa bɛma AWURADE ne, mafa mama wɔ.

¹³Fieso aleɛ amukoraa bɔ bekoli moa bɛkɔfa wɔ b’aseɛ ne aso, bɔ bɛfa bɛbrɛ AWURADE ne, ɔte wɔ deɛ. Ebiala bɔ ye nwo te wɔ w’awuro berɛ ne ɔkora odi bie.

¹⁴ Nikyee biala bɔ batu basie berɛ bama AWURADE wɔ Yisrael ne, ɔte wɔ deɛ.

¹⁵Abɔdeɛ biala, kyɛ sona oo, kyɛ kaka oo, ye bamuɛbaa bɔ bɛkɔfa bɛkɔma AWURADE ne, ɔte wɔ deɛ. Nakoso kuro sona bamuɛbaa mɔ de, odi kyɛ ɛpɔ bɛ, yeɛ ngaka bɔ bɛ nwo nde mɔ bamuɛbaa mɔ koso, odi kyɛ ɛpɔ bɛ.

¹⁶Sɛ wali ofi bosome ko bɔ ɔkɔ ne a, ye ti nyɔboɛ ne, sese ye ɛdwetɛ sekel nnu kyɛbɔ nekaa krongron berɛ sekel te ɔ (ɔte gyera aburanyɔ).

¹⁷Nakoso nandwie bamuɛbaa, anaa boaen bamuɛbaa, anaa abɔngye bamuɛbaa de, nnɛpɔ bɛ; bɛte krongron. To bɛ mogya ne pete afɔleɛ bokyea ne aso, ná yera bɛ loe ne ma ɔyɛ afɔleɛ bɔ bɛfa see bɛyera ye, bɔ ɔbo AWURADE fona ɔ.

¹⁸Nakoso bɛ naen de, ɔte wɔ deɛ, kyɛbɔ ye sa bɔ banwaha ne, ɔne ye sɔ famaa ne te wɔ deɛ ne.

¹⁹Afɔleɛ krongron amukoraa bɔ Yisraelfoɛ bɔ ma AWURADE ne, mafa mama wɔ ne wɔ mma mmienzua ne wɔ mma mmrasua mɔ. Ɔte ɛmɔ deɛ afebɔɔ. Ɔte ngyee apam afebɔɔ wɔ AWURADE nyunu ma wɔ ne wɔ bosofoɛ koso.”

²⁰Na AWURADE sele Aarɔn kyɛ, “Engonya b’aseɛ ne bie, yeɛ engonya b’agyapadeɛ ne bie. Me yeɛ nde wɔ kyɛfa ne w’agyapadeɛ wɔ Yisraelfoɛ nu ɔ.

²¹“Nikyee biala bɔ ɔwɔ Yisrael ne, mafa nu buru nu ngyɛmuɛ ko mama Lewifoɛ. Ɛsolɛ bɔ bɛso wɔ ɛtena sua atenaleɛ ne anu ne, ye nwo akatuaa ɛne.

²²Ofi ɛnɛ bɔ ɔkɔ ɔ, nnɛma Yisraelfoɛ bepingye ɛtena sua atenaleɛ ne, anyɔ a musue kɔbɔ bɛ ti so maa bekowuwu.

²³Nakoso odi kyɛ Lewifoɛ yeɛ bɛyɔ ɛtena sua atenaleɛ nu berɛ adwuma ne ɔ, na bɛ bɔbɔ bɛ mvomsoɛ nwo musue kɔbɔ bɛ ti so. Ɔkɔyɛ daa ahyɛdeɛ wɔ ɛmɔ aworɛ ndoatoasoɛ mukoraati nu. Nakoso bengonya agyapadeɛ biala wɔ Yisraelfoɛ nu,

²⁴ofikyɛ Yisraelfoɛ bɛ nningyein nu buru nu ngyɛmuɛ ko bɔ baye basie berɛ bafa babɔ afɔleɛ bama AWURADE ne, mafa mama Lewifoɛ kyɛ b’agyapadeɛ ɛne. Yiti mahã mafa bɛ nwo kyɛ bengonya agyapadeɛ wɔ Yisraelfoɛ nu.”

²⁵Na AWURADE sele Mose kyɛ,

²⁶“Ka kyire Lewifoɛ kyɛ, sɛ ɛmɔ sa ka buru nu ngyɛmuɛ ko ne befi Yisraelfoɛ berɛ, bɔ male mafi bɛ berɛ mama ɛmɔ kyɛ ɛmɔ agyapadeɛ ɛne ne a, odi kyɛ ɛmɔfa nu bie bɛbɔ afɔleɛ bɛma AWURADE, maa ɔyɛ buru nu ngyɛmuɛ ko ne anu buru nu ngyɛmuɛ ko.

²⁷Odi kyɛ bebu sɔ afɔleɛ ne kyɛ ɛmɔ akyɛdeɛ ɛne. Ɔte kyɛ aburoo afɔleɛ bɔ mmenia fa fi nekaa bɔ bɛboro aburoo, ɔne anonneɛ afɔleɛ bɔ ofi kumaa bɔ betwi nu nzaa ne ala.

²⁸Yiti buru nu ngyɛmuɛ ko amukoraa bɔ ɛmɔde befi Yisraelfoɛ berɛ ne, odi kyɛ ɛmɔye bie bésie berɛ bɛbɔ afɔleɛ bɛma AWURADE. Nu bie yeɛ odi kyɛ ɛmɔfa bɛbɔ AWURADE afɔleɛ ma ɔsɔfo Aarɔn ye sa ka ye ɔ.

²⁹Akyɛdeɛ amukoraa bɔ ɛmɔkonya ye ne, nu yeɛ odi kyɛ ɛmɔye AWURADE afɔleɛ amukoraa befi ɔ; na nu bɔ ɔte paa paa ne yeɛ odi kyɛ ɛmɔtu besie berɛ bɛma AWURADE ɔ.

³⁰Sa ka kyire bɛ kyɛ, Sɛ ɛmɔtu nu bie bɔ ɔte paa paa ne besie berɛ bɛma AWURADE beyie a, ye ngaa ne de ɛ́mɔfa bɛma Lewifoɛ. Ɔte kyɛ aburoo bɔ ofi nekaa bɔ bɛboro aburoo, ɔne nzaa bɔ ofi kumaa bɔ betwi nu nzaa ne ala.

³¹Ɛmɔkɔhora bekoli ye wɔ nekaa biala, ɛmɔ ne ɛmɔ awuro ama; ofikyɛ ɛmɔ adwuma bɔ ɛmɔyɔ ye wɔ ɛtena sua atenaleɛ ne anu ne, ye nwo akatuaa ɛne.

³²Sɛ ɛmɔfa bɔ ɔte paa paa ne bɛma AWURADE a, ye de foɛlilɛ biala ɔnne ɛmɔ so. Nakoso nnɛma ɛmɔgua Yisraelfoɛ akyɛdeɛ krongron nemɔ anwo fiɛ, ná ɛmɔanwuwu.”