Read Sehwi Numeri 26 Bible Online

Numeri 26 - Sehwi bible

Numeri 26

¹Amaneɛ ne bo pɛle ne, AWURADE sele Mose ne ɔsɔfo Aarɔn awa Eleasa kyɛ,

²“Ɛ́mɔha Yisraelfoɛ amukoraa: Yisraelniɛ biala bɔ wali ofi afoɛ aburanyɔ bɔ ɔkɔ ɔ, bɔ ɔkora kɔ koɛ ɔ, kyɛbɔ bɛ nana mɔ sasofoɛ te ɔ.”

³Na Mose ne ɔsɔfo Eleasa, bɛ ne mmenia nemɔ bedwudwole, wɔ Moabo aseɛ frɛtɛɛ ne aso, wɔ asue Yɔɔdan bue nu dɔ bɔ opingye Yeriko ne kyɛ,

⁴“Ɛ́mɔha mmenia ne: ebiala bɔ wali ofi afoɛ aburanyɔ bɔ ɔkɔ ɔ, kyɛbɔ AWURADE hyɛle Mose ne.” Yisraelfoɛ bɔ befili Misraim aseɛ so bɛwale nemɔ ɛhe:

⁵ Ruben, bɔ ɔte Yisrael bamuɛbaa ne. Ruben boso ama mɔ ɛhe: Hanokefoɛ bɔ bɛte Hanoke sasofoɛ; Palufoɛ bɔ bɛte Palu sasofoɛ;

⁶Hesronfoɛ bɔ bɛte Hesron sasofoɛ; yeɛ Karemifoɛ bɔ bɛte Kami sasofoɛ.

⁷Rubenfoɛ mmusua mmusua nemɔ ɛne. Bɛhale nu mmenia ne, bɛ somaa te apee aburanna ne nza, ɛyaa nzoo ne aburasa.

⁸Palu awa ole Eliabo.

⁹Eliabo mma mɔ ole Nemuel, Datan ne Abiram. Sɔ Datan ne Abiram hemɔ ala yeɛ né bɛte mbanyi wɔ Yisrael, bɔ bɛ ne Kora bedwɔsole betiale Mose ne Aarɔn, ná bɛyɔle AWURADE nwo lɔen ne.

¹⁰Aseɛ bukyele ye noa nu, na ɔmemene bɛ ne Kora. Sɔ mmenia ne wuwuli ne, see yerale mmenia ɛyaa nyɔ ne aburannu, na bɛ nwo dwirɛ yɛle kɔkɔbɔlɛ.

¹¹Nakoso Kora mma mɔ de, banwuwu bie.

¹²Simeon boso ama, bɛ mmusua mmusua mɔ ɛhe: Nemuelfoɛ bɔ bɛte Nemuel sasofoɛ, Yaminfoɛ bɔ bɛte Yamin sasofoɛ; Yakinfoɛ bɔ bɛte Yakin sasofoɛ;

¹³Serafoɛ bɔ bɛte Sera sasofoɛ; Sɔɔlofoɛ bɔ bɛte Sɔɔlo sasofoɛ.

¹⁴Simeonfoɛ mmusua mmusua nemɔ ɛne. Bɛ mukoraa bɛ somaa te apee aburanyɔ ne nyɔ ne ɛyaa nyɔ.

¹⁵Gade mma mɔ, bɛ mmusua mmusua mɔ ɛhe: Sefonfoɛ bɔ bɛte Sefon sasofoɛ; Hagyifoɛ bɔ bɛte Hagyi sasofoɛ; Sunifoɛ bɔ bɛte Suni sasofoɛ;

¹⁶Osinifoɛ bɔ bɛte Osini sasofoɛ; Ɛrifoɛ bɔ bɛte Ɛri sasofoɛ;

¹⁷Arodefoɛ bɔ bɛte Arode sasofoɛ; Arelifoɛ bɔ bɛte Areli sasofoɛ.

¹⁸Gadefoɛ mmusua mmusua mɔ ɛne. Bɛhale nu mmenia ne, bɛ somaa te apee aburanna ne ɛyaa nnu.

¹⁹Yuda mma mɔ ole Ɛre ne Onan. Ɛre ne Onan wuli wɔ Kanaan aseɛ so.

²⁰Yuda boso ama bɛ mmusua mmusua mɔ ɛhe: Hyelafoɛ bɔ bɛte Hyela sasofoɛ; Pɛrɛsefoɛ bɔ bɛte Pɛrɛse sasofoɛ; Serafoɛ bɔ bɛte Sera sasofoɛ.

²¹Pɛrɛse boso ama mɔ ole Hesronfoɛ bɔ bɛte Hesron sasofoɛ yeɛ Hamulfoɛ bɔ bɛte Hamul sasofoɛ.

²²Yuda mmusua mmusua mɔ ɛne. Bɛhale nu mmenia ne, bɛ somaa te apee aburasoo ne nzia ɔne ɛyaa nnu.

²³Yisaka boso ama mɔ, bɛ mmusua mmusua mɔ ɛhe: Tolafoɛ bɔ bɛte Tola sasofoɛ; Punifoɛ bɔ bɛte Puwa sasofoɛ;

²⁴Yasubofoɛ bɔ bɛte Yasubo sasofoɛ; Simronfoɛ bɔ bɛte Simron sasofoɛ.

²⁵Yisaka mmusua mmusua mɔ ɛne: bɛhale nu mmenia ne, bɛ somaa te apee aburasia ne nna ɔne ɛyaa nza.

²⁶Sebulɔn boso ama bɛ mmusua mmusua mɔ ɛhe: Seredefoɛ bɔ bɛte Serede sasofoɛ; Elonfoɛ bɔ bɛte Elon sasofoɛ; Yaleelfoɛ bɔ bɛte Yaleel sasofoɛ.

²⁷Sebulɔn mmusua mmusua mɔ ɛne. Bɛhale nu mmenia ne, bɛ somaa te apee aburasia ne ɛyaa nnu.

²⁸Yosef mma Manase ne Efraim bɛ mmusua mmusua mɔ ɛhe:

²⁹Manase boso ama mɔ ɛhe: Makyirifoɛ bɔ bɛte Makyiri sasofoɛ. Makyiri ɔwa ole Gileade, na Gileade sasofoɛ ole Gileadefoɛ.

³⁰Gileade ye boso ama mɔ ɛhe: Yiesafoɛ bɔ bɛte Yiesa sasofoɛ; Helekefoɛ bɔ bɛte Heleke sasofoɛ;

³¹Aseriɛlfoɛ bɔ bɛte Aseriɛl sasofoɛ; Sɛkemfoɛ bɔ bɛte Sɛkem sasofoɛ;

³²Semidafoɛ bɔ bɛte Semida sasofoɛ, yeɛ Hefafoɛ bɔ bɛte Hefa sasofoɛ.

³³Né Hefa awa Selofehade olle baa bienzua biala, na mmom ye mma te mmrasua ngome. Selofehade mma mmrasua nemɔ ole Mahela, Nowa, Hogela, Milka yeɛ Tisa.

³⁴Manase mmusua mmusua nemɔ ɛne. Bɛhale nu mmenia ne, bɛ somaa te apee aburannu ne nyɔ ne ɛyaa nzoo.

³⁵Efraim boso ama mɔ bɛ mmusua mmusua mɔ ɛhe: Sutelafoɛ bɔ bɛte Sutela sasofoɛ; Bekyafoɛ bɔ bɛte Bekya sasofoɛ, yeɛ Tahanfoɛ bɔ bɛte Tahan sasofoɛ.

³⁶Sutela ye boso ama mɔ ole Eranfoɛ bɔ bɛte Eran sasofoɛ.

³⁷Efraimfoɛ bɛ mmusua mmusua mɔ ɛne. Bɛhale nu mmenia ne, bɛ somaa te apee aburasa ne nyɔ ɔne ɛyaa nu. Yosef boso ama mɔ bɛ mmusua mmusua mɔ ɛne.

³⁸Benyamin boso ama mɔ, bɛ mmusua mmusua mɔ ɛhe: Belafoɛ bɔ bɛte Bela sasofoɛ; Asebelfoɛ bɔ bɛte Asebel sasofoɛ; Ahiramfoɛ bɔ bɛte Ahiram sasofoɛ;

³⁹Sufamfoɛ bɔ bɛte Sufam sasofoɛ yeɛ Hufamfoɛ bɔ bɛte Hufam sasofoɛ.

⁴⁰Bela mma mmienzua mɔ ole Ade ne Naaman. Adefoɛ bɔ bɛte Ade sasofoɛ; Naamanfoɛ bɔ bɛte Naaman sasofoɛ.

⁴¹Benyamin boso ama mɔ, bɛ mmusua mmusua mɔ ɛne. Bɛhale nu mmenia ne, bɛ somaa te apee aburanna ne nnu ɔne ɛyaa nzia.

⁴²Dan boso ama mɔ, bɛ mmusua mmusua mɔ ɛhe: Suhamfoɛ bɔ bɛte Suham sasofoɛ. Danfoɛ ne, bɛ mmusua mmusua ɛne.

⁴³Suhamfoɛ mmusua mmusua ne, bɛhale nu mmenia ne, bɛ somaa te apee aburasia ne nna ɔne ɛyaa nna.

⁴⁴Asɛ boso ama mɔ, bɛ mmusua mɔ ɛhe: Yiminafoɛ bɔ bɛte Yimina sasofoɛ; Yisiwifoɛ bɔ bɛte Yisiwi sasofoɛ, yeɛ Beriafoɛ bɔ bɛte Beria sasofoɛ.

⁴⁵Beria boso ama mɔ ole Heberifoɛ bɔ bɛte Heberi sasofoɛ, yeɛ Malkiɛlfoɛ bɔ bɛte Malkiɛl sasofoɛ.

⁴⁶Né Asɛ awa brasua li Sera.

⁴⁷Asɛfoɛ mmusua mmusua mɔ ɛne. Bɛhale nu mmenia ne, bɛ somaa te apee aburannu ne nza ɔne ɛyaa nna.

⁴⁸Nafetali boso ama mɔ, bɛ mmusua mmusua mɔ ɛhe: Yaseelfoɛ bɔ bɛte Yaseel sasofoɛ, Gunifoɛ bɔ bɛte Guni sasofoɛ;

⁴⁹Yesarefoɛ bɔ bɛte Yesare sasofoɛ; Silemfoɛ bɔ bɛte Silem sasofoɛ.

⁵⁰Nafetalifoɛ bɛ mmusua mmusua mɔ ɛne. Bɛhale nu mmenia ne, bɛ somaa te apee aburanna ne nu ɔne ɛyaa nna.

⁵¹Bɛhale Yisraelfoɛ ne, bɛ somaa te apee ɛyaa nzia ne ko, ɛyaa nzoo ɔne aburasa.

⁵²AWURADE sele Mose kyɛ,

⁵³“Ɛhemɔ yeɛ odi kyɛ ɛkyɛ aseɛ ne ma bɛ ɔ, kyɛbɔ bɛ mmenia bɔ baha bɛ ne somaa te ɔ, maa ɔyɛ b’agyapadeɛ.

⁵⁴Abusua kure bɔ ɔte piri ne, ma bɛ aseɛ piri; yeɛ abusua kure bɔ ɔte kãa ne koso, ma bɛ aseɛ kaaba. Abusua kure biala aseɛ bɔ okonya ye ne, ye piri gyi nu mmenia bɔ baha bɛ ɔ so.

⁵⁵Nakoso serewagualɛ so yeɛ odi kyɛ ɛfa kyɛ aseɛ ne ɔ; kyɛbɔ bɛ nana mɔ b’abusua kure ne dumaa te ne, nu yeɛ odi kyɛ benya b’aseɛ ɔ.

⁵⁶Odi kyɛ egyina serewagualɛ so ɛkyɛ aseɛ ne ma mmusua kure mbiri ne mmaa mmaa nemɔ.”

⁵⁷ Bɛhale Lewifoɛ mmusua mmusua ne, bɛ ɛhe: Gɛsɔnfoɛ bɔ bɛte Gɛsɔn sasofoɛ; Kohatefoɛ bɔ bɛte Kohate sasofoɛ, yeɛ Merarifoɛ bɔ bɛte Merari sasofoɛ.

⁵⁸Lewi mmusua mmusua mɔ ɛhe: Libinifoɛ abusua, Hebronfoɛ abusua, Mahelifoɛ abusua, Musifoɛ abusua, yeɛ Korafoɛ abusua. Kohate awa ole Amram.

⁵⁹Amram ɔye ole Lewi awa brasua Yokebɛde. Lewi wole Yokebɛde wɔ Misraim, na Yokebɛde ne Amram bɛwole Aarɔn ne Mose yeɛ b’eliɛma brasua Miriam.

⁶⁰Aarɔn mma ole Nadabo, Abihu, Eleasa ɔne Yitama.

⁶¹Nakoso Nadabo ne Abihu de, bewuwuli ofikyɛ né bɛmvata kyɛ bɛfa see bɛbɔ afɔleɛ wɔ AWURADE nyunu, nakoso bɛyɔle sɔ.

⁶²Lewifoɛ mmienzua bɔ bali ofi bosome ko bɔ ɔkɔ ne, bɛhale bɛ ne, bɛ somaa te apee aburanyɔ ne nza. Banga bɛ bamvra Yisraelfoɛ ngaa nemɔ, ofikyɛ bamma bɛ aseɛ biala wɔ Yisraelfoɛ nu.

⁶³Mmenia bɔ Mose ne ɔsɔfo Eleasa bɛhale bɛ nemɔ ɛne. Bɛhale Yisraelfoɛ wɔ Moabo aseɛ frɛtɛɛ ne aso, wɔ asue Yɔɔdan bue nu dɔ bɔ opingye Yeriko ne.

⁶⁴ Yisraelfoɛ bɔ Mose ne ɔsɔfo Aarɔn bɛhale bɛ wɔ Sinai ɛserɛ ne aso ne, bɛ nu ko po nne berɛ bɔ né ɔboka mmenia hemɔ aso ɔ.

⁶⁵Ofikyɛ né AWURADE aha afa bɛ nwo kyɛ, “Bekowuwu wɔ ɛserɛ ne aso.” Bɛ nu ko po anga, sana Yefune awa Kalebo ɔne Nun awa Yosua angome.