Read Sehwi Numeri 28 Bible Online

Numeri 28 - Sehwi bible

Numeri 28

¹AWURADE sele Mose kyɛ,

²“Fa sɔ ahyɛdeɛ he ma Yisraelfoɛ kyɛ, M’afɔleɛ, aleɛ bɔ bɛbɔ ye see so bɛma me, bɔ ɔbo me fona ne, ɛ́mɔnea yé kyɛ ɛmɔkɔbɔ bɛkɔma me mmerɛ bɔ m’ahyɛ ne pɛpɛɛpɛ.

³ Na se bɛ kyɛ, afɔleɛ bɔ bɛbɔ ye see so bɔ odi kyɛ ɛmɔbɔ bɛma AWURADE ne ɛhe: daa biala, ɛ́mɔfa mmoaen nyii nyɔ bɔ bali afoɛ ngoko, bɔ bellili nnɛen biala ɔ, bɛbɔ afɔleɛ.

⁴Fa boaen nyii ko bɔ afɔleɛ ngyerɛmɔ ná fa ko ne koso bɔ afɔleɛ nɔsoa.

⁵Odi kyɛ ɛfa esam paa olonka ko, bɔ bafa ngoo bɔ bahwi towaa ko ne bue bafra ɔ, ɛbɔ aburoo afɔleɛ boka so.

⁶Ɛhe te daa biala naen yeralɛ afɔleɛ, bɔ nhyehyɛle ye wɔ Sinai bokaa ne aso ɔ. Ɔte afɔleɛ fona bɔ bɛbɔ ye see so bɛma AWURADE ɔ.

⁷Odi kyɛ boaen akrɔngrɔma ko biala bɛfa anonneɛ afɔleɛ towaa ko ne bue bɛboka so. Odi kyɛ ehwie nzaa serɛ fa bɔ anonneɛ afɔleɛ ma AWURADE wɔ nekaa krongron berɛ.

⁸Boaen ko bɔ waha ne koso, fa bɔ afɔleɛ nɔsoa ne. Odi kyɛ ɛfa aburoo afɔleɛ ɔne anonneɛ afɔleɛ ɛboka so, kyɛ ngyerɛmɔ deɛ ne ala. Bɔ sɔ afɔleɛ bɔ ɔbo AWURADE fona ne wɔ see so.

⁹Sɛ odwu afofikyẽa a, odi kyɛ ɛmɔfa mmoaen nyii akrɔngrɔma nyɔ bɔ bali afoɛ ngoko, bɔ bellili nnɛen biala ɔ, ɔne esam paa olonka nyɔ bɔ bafa ngoo bafra ɔ, ɔne ye anonneɛ afɔleɛ bɛbɔ afɔleɛ.

¹⁰Ɛhe te afofikyẽa biala naen yeralɛ afɔleɛ bɔ ɔboka daa biala naen yeralɛ afɔleɛ ɔne ye anonneɛ afɔleɛ ne aso ɔ.

¹¹Sɛ ɛmɔhyɛ bosome biala bo a, odi kyɛ ɛmɔbɔ naen yeralɛ afɔleɛ bɛma AWURADE. Ɛ́mɔfa nandwie nyii akrɔngrɔma nyɔ, boaen nyii ko, mmoaen nyii akrɔngrɔma nzoo bɔ bali afoɛ ngoko, bɔ bellili nnɛen biala ɔ bɛbɔ afɔleɛ.

¹²Afei odi kyɛ ɛmɔfa esam paa olonka nza bɔ bafa ngoo bafra ye ɔ bɛbɔ aburoo afɔleɛ bɛboka nandwie nyii ko biala so. Asa koso, esam paa olonka nyɔ bɔ bafa ngoo bafra ye ne, ɛ́mɔfa bɛbɔ aburoo afɔleɛ bɛboka boaen nyii ko ne aso.

¹³Esam paa olonka ko bɔ bafa ngoo bafra ye ne, odi kyɛ ɛmɔfa bɛbɔ aburoo afɔleɛ bɛboka boaen akrɔngrɔma ko biala so. Ɔte naen yeralɛ afɔleɛ bɔ ɔbo fona, bɔ bɛbɔ ye see so bɛma AWURADE ɔ.

¹⁴B’anonneɛ afɔleɛ nemɔ, odi kyɛ bɛfa bobe nzaa towaa nza ne bue bɛboka nandwie nyii ko biala so, ná bɛfa bobe nzaa towaa nyɔ bɛboka boaen nyii ko biala so, ná bɛfa bobe nzaa towaa ko ne bue bɛboka boaen akrɔngrɔma ko biala so. Ɛhe te bosome bosome naen yeralɛ afɔleɛ bɔ bɛbɔ ye afoɛ biala nu ɔ.

¹⁵Na odi kyɛ bɛfa abɔngye nyii ko bɛbɔ bɔne nwo afɔleɛ bɛma AWURADE. Bɛ́fa bɛ́boka daa biala naen yeralɛ afɔleɛ ne ɔne ye anonneɛ afɔleɛ ne aso.

¹⁶ Bosome bɔ oli moa ne, ye kyẽa bɔ ɔtɔ so buru ne nna ne, odi kyɛ bɛbɔ Abɔtra afɔleɛ bɛma AWURADE.

¹⁷ Sɔ bosome ne, ye kyẽa bɔ ɔtɔ so buru ne nnu ne, ɔte aluolue. Odi kyɛ bedi paanoo kabrɛdi ɛlɛsoo.

¹⁸Kyẽa bɔ oli moa ne, odi kyɛ ɛmɔyɛ nyianu krongron; nnɛma ɛmɔyɔ adwuma biala.

¹⁹Odi kyɛ ɛmɔbɔ naen yeralɛ afɔleɛ wɔ see so bɛma AWURADE: ɛ́mɔfa nandwie nyii akrɔngrɔma nyɔ, boaen nyii ko, ɔne mmoaen nyii akrɔngrɔma nzoo bɔ bali afoɛ ngoko ɔ. Nnɛma ɛmɔfa bɔ wali nnɛen biala ɔ.

²⁰Bɛ nwo aburoo afɔleɛ ne, odi kyɛ ɔyɛ esam paa bɔ bafa ngoo bafra ye ɔ: ɛ́mɔfa olonka nza bɛ́boka nandwie nyii ko biala so, ná ɛ́mɔfa olonka nyɔ bɛ́boka boaen nyii ko biala so.

²¹Odi kyɛ ɛmɔfa olonka ko bɛboka mmoaen akrɔngrɔma nzoo ne anu biala so.

²²Afei koso, ɛ́mɔfa abɔngye nyii ko bɛ́bɔ bɔne nwo afɔleɛ maa ɔyɛ mbata ɔma ɛmɔ.

²³Ngyerɛmɔ naen yeralɛ afɔleɛ bɔ ɔboka daa biala naen yeralɛ afɔleɛ ne aso ne, odi kyɛ ɛmɔbɔ sɔ afɔleɛ nemɔ bɛboka so.

²⁴Sɔ ala yeɛ sɔ ɛlɛsoo ne, daa biala, odi kyɛ ɛmɔbɔ see so aleɛ afɔleɛ bɔ ɔbo fona ɔ bɛma AWURADE ɔ. Odi kyɛ ɛmɔbɔ bɛboka daa biala naen yeralɛ afɔleɛ ne, ɔne anonneɛ afɔleɛ ne aso.

²⁵Na ye ɛlɛsoo ne aso, odi kyɛ ɛmɔyɛ nyianu krongron; nnɛma ɛmɔyɔ adwuma biala.

²⁶ Fieso aleɛ bɔ bekoli moa bɛkɔfa ne, ye aluolue kyẽa ne, sɛ ɛmɔfa aburoo foforɛ bɛbɔ aburoo afɔleɛ bɛma AWURADE wɔ ɛmɔ Dapɛn Dapɛn aluolue ne anu a, odi kyɛ ɛmɔyɛ nyianu krongron; nnɛma ɛmɔyɔ adwuma biala.

²⁷Odi kyɛ ɛmɔbɔ naen yeralɛ afɔleɛ bɔ ɔbo AWURADE fona ɔ bɛma ye: ɛ́mɔfa nandwie nyii akrɔngrɔma nyɔ, boaen nyii ko, mmoaen akrɔngrɔma nzoo bɔ bali afoɛ ngoko ɔ.

²⁸Bɛ nwo aburoo afɔleɛ ne, odi kyɛ ɔyɛ esam paa bɔ bafa ngoo bafra ye ɔ: ɛ́mɔfa olonka nza bɛ́boka nandwie nyii ko biala so, ná ɛ́mɔfa olonka nyɔ bɛ́boka boaen nyii ko biala so.

²⁹Odi kyɛ ɛmɔfa olonka ko bɛboka mmoaen akrɔngrɔma nzoo ne anu biala so.

³⁰Ɛ́mɔfa abɔngye nyii ko bɛ́boka so maa ɔyɛ mbata ma ɛmɔ.

³¹Sɔ afɔleɛ nemɔ ne b’anonneɛ afɔleɛ nemɔ, odi kyɛ ɛmɔbɔ bɛboka daa biala naen yeralɛ afɔleɛ ne ɔne ye aburoo afɔleɛ ne aso. Onni kyɛ bɛ nu biala nwo nya ngekalewa biala.