Read Sehwi Numeri 30 Bible Online

Numeri 30 - Sehwi bible

Numeri 30

¹Na Mose sele mbanyi bɔ bɛlela Yisraelfoɛ mmusua kure nemɔ noa kyɛ, “Ahyɛdeɛ bɔ AWURADE ahyɛ ato berɛ hɔ ɛhe:

² Sɛ bienzua bie hyɛ AWURADE bɔ, anaakyɛ sɛ ɔta ndaen fa foa edwirɛ bie aso a, onni kyɛ obu edwirɛ bɔ waha ne aso. Odi kyɛ ɔyɔ bɔ wato ye noa nu tui waha ne biala.

³Sɛ brasua bie hyɛ AWURADE bɔ, anaakyɛ ɔta ndaen fa foa edwirɛ bie aso a, wɔ mmerɛ bɔ ɔte taluwa bɔ ɔtɛ te ɔse awuro,

⁴na sɛ ɔse te ye bɔhyɛ ne, anaa ye ndaen bɔ wata wafa wafoa edwirɛ so ne, nakoso wanga hwee wangyire taluwa ne a, ye de odi kyɛ taluwa ne di ye bɔhyɛ ne amu so, ɔne ye nwo nikyee bɔ watua ne koso so.

⁵Nakoso sɛ ye baba te ye dwirɛ ne, ná ɔne ye anyɛ adwene a, ye bɔ bɔ wahyɛ ne, anaa ndaen bɔ wata wafa wafoa edwirɛ so ne, nu biala ngɔyɛ adwuma. AWURADE kɔfa kɔhyɛ ye, ofikyɛ ye baba amaa wanwu ye kyɛ ɔne ye nyɛ adwene.

⁶Mmerɛ bɔ ye anohoba anaa ye bɔhyɛ bɔ wandwene ye nwo yeɛ ɔhyɛle ne tɛ la ye so ne, sɛ okogya biaa,

⁷ná sɛ ohu te dwirɛ ne, nakoso mmerɛ bɔ yeɛ ɔkɔte ne wanga hwee wangyire ye a, ye de bɔhyɛlɛ ne tɛ la ye so, na ndaen bɔ wata wafa wafoa edwirɛ so ne koso tɛ la ye so.

⁸Nakoso sɛ mmerɛ bɔ ohu kɔte dwirɛ ne, ɔma braa ne nwu kyɛ ɔne ye nyɛ adwene a, ye de né ohu ne wakyikyi bɔhyɛ bɔ ɔla braa ne so ne, anaa ye noa dwirɛ bɔ wandwene ye nwo yeɛ ɔhane bɔ ɔsɛ kyɛ odi so ne; na AWURADE kɔfa ye bɔne kɔhyɛ ye.

⁹(Nakoso kunaniɛ brasua biala anaa brasua bɔ ɔne ohu bayira biala, anohoba bɔ wabɔ bɔ ɔsɛ kyɛ odi so ne, ɔkɔhɔ so kɔla ye so).

¹⁰Na sɛ né ɔtɛwɔ agyaa bo yeɛ ɔbɔle sɔ anohoba ne, anaa ɔtale ndaen fa foale edwirɛ bie aso,

¹¹bɔ ohu tele koso wanga hwee wangyire braa ne, bɔ wamma braa ne wannwu ye kyɛ ɔne ye nyɛ adwene a, ye de odi kyɛ braa ne di ye bɔhyɛ ne amu so, ɔne ndaen biala bɔ wata wafa wafoa edwirɛ so ne aso.

¹²Nakoso sɛ ohu ne te edwirɛ ne, ná sɔ mmerɛ ne ala a, okyikyi bɔhyɛ ne ɔne anohoba ne fi berɛ a, ye de anohoba biala bɔ braa ne wafa ye noa wabɔ, anaa ndaen biala bɔ wata wafa wafoa edwirɛ so ne, ɔnzɛ kyɛ odi so. Ohu ne akyikyi afi berɛ, na AWURADE kɔfa kɔhyɛ braa ne.

¹³Anohoba biala anaa ndaen biala bɔ braa ne ta fa tua ye nwo nikyee biala de, ohu ne kɔhora kɔmaa ɔkɔyɔ adwuma, anaa ɔkɔhora kokyikyi kofi berɛ.

¹⁴Nakoso sɛ ohu ne wanga ye nwo hwee wangyire braa ne, ná ɔma aleɛ kye so a, ye de né wale braa ne bɔhyɛ ne amukoraa, anaa ye anohoba bɔ ɔla ye so ne amukoraa wato nu. Wale wato nu, ofikyɛ mmerɛ bɔ ɔtele dwirɛ ne, wanga ye nwo hwee wangyire braa ne.

¹⁵Na sɛ ohu ne te edwirɛ ne, nakoso ɔma aleɛ kye so koraka né wakyikyi wafi berɛ a, ye de ɔkɔsoa braa ne amumuyɛɛ.”

¹⁶Ɛhemɔ ole ahyɛdeɛ mɔ bɔ AWURADE hyɛle Mose, bɔ ɔfa biaa ne ɔye nwo, ɔne bɔ ɔfa baba ne ɔwa brasua ababunu bɔ ɔtɛ te ɔse awuro nwo ɔ.