Read Sehwi Numeri 31 Bible Online

Numeri 31 - Sehwi bible

Numeri 31

²“Tɔ Midianfoɛ so wereɛ ma Yisraelfoɛ; na ɛhe asi ye, ɛkɔtoa wɔ mbanyi mɔ.”

³Yiti Mose sele Yisrael maen ne kyɛ, “Ɛ́mɔboaboa ɛmɔ mmenia ne bie noa maa bɛhɔ koɛ, ná bɛ ne Midian bɛɛho, ma AWURADE wereɛtɔlɛ ɔ́bra Midian so.

⁴Ɛmɔye Yisrael abusua kure biala anu mmenia apee ko maa bɛhɔ koɛ ne.”

⁵Yiti Yisrael mmenia worawora ne, abusua kure biala anu, bɛyele mmenia apee ko; mmenia apee buru ne nyɔ yeɛ bɛboaboale bɛ nwo kyɛ bɛkɔ koɛ ne ɔ.

⁶Mose somane bɛ maa bɛhɔle koɛ ne; abusua kure biala anu mmenia apee ko. Né ɔsɔfo Eleasa awa Finehase boka bɛ so. Né ye yeɛ otira nekaa krongron berɛ ndalie nemɔ ɔne totorobɛndo mɔ bɔ bɛfa bɛbɔ ese ne ɔ.

⁷Bɛfale koɛ bɛtetale Midian, kyɛbɔ AWURADE hyɛle Mose ne, na behuni Midian bienzua biala.

⁸Behuhuni Midian ahemvo hemɔ bɛbokale mmenia bɔ behuhuni bɛ ne aso: Ewi, Rekem, Sure, Hure ne Reba. Besa bɛfale ngrandɛ behuni Beɔ awa Balaam.

⁹Yisraelfoɛ hyele Midian mmrasua, bɛ ne bɛ mma mmaa mmaa mɔ nnure. Bɛfale bɛ nandwie amukoraa, bɛ mmoaen amukoraa, ɔne bɛ nningyein amukoraa bɛyɛle koɛ nu nzesadeɛ.

¹⁰Bɛyerale bɛ nguro bɔ né bɛtete so amukoraati, ɔne b’asikyeleɛ amukoraati.

¹¹Nakoso koɛ nu nningyein amukoraa ɔne koɛ nu nzesadeɛ amukoraa de, kyɛ mmenia oo, kyɛ ngaka oo, bɛfa bɛhɔle.

¹²Afei mmenia bɔ bahye bɛ nnure ne, koɛ nu nzesadeɛ ne, ɔne koɛ nu nningyein ne, bɛfa bɛbrɛle Mose, ɔne ɔsɔfo Eleasa, ɔne Yisrael maen ne, wɔ asikyeleɛ bɔ ɔwɔ Moabo aseɛ frɛtɛɛ ne aso ne, wɔ asue Yɔɔdan bue nu dɔ bɔ opingye Yeriko ne.

¹³Mose, ɔsɔfo Eleasa ɔne Yisrael mbanyi ne amukoraa beeyiale koɛhonɛfoɛ nemɔ wɔ asikyeleɛ ne asi.

¹⁴Safohene mɔ bɔ bɛlela apee apee noa, ɔne bɛ bɔ bɛlela ɛyaa ɛyaa noa bɔ befi koɛ noa bɛwale ne, Mose fɛle bɛ so yaa.

¹⁵Mose bisale bɛ kyɛ, “Ɛmɔama mmrasua hemɔ amu banya bɛ ti badidi nu?

¹⁶ Mmrasua hemɔ yeɛ Balaam tuli bɛ foɛ tɛɛ maa bɛlakalakale Yisraelfoɛ, bɔ ɔnate so Yisraelfoɛ hwi fale AWURADE dwirɛ so ná bɛɛsɔnene Peɔ ne. Na ɛhe mane amaneɛ piri tole AWURADE mmenia.

¹⁷Yiti kekesaala ye, ɛ́mɔhu ngwadaa ne anu bienzua biala, ná ɛ́mɔhu brasua biala bɔ ɔne bienzua bala le ɔ.

¹⁸Nakoso abaayaa biala bɔ ɔne bienzua bɛllale le ne de, ɛ́mɔma onya ye ti odidi nu na ɔyɛ ɛmɔ deɛ.

¹⁹Ɛ́mɔtena asikyeleɛ ne asi dɔ ɛlɛsoo. Ɛmɔ bɔ ɛmɔahu sona anaakyɛ ɛmɔ nu biala bɔ ye nwo aha fuin ne, odi kyɛ ɛmɔpete ɛmɔ nwo ɔne mmenia bɔ ɛmɔahye bɛ nnure nemɔ anwo ye ɛlɛsa ne aso ɔne ɛlɛsoo ne aso.

²⁰Odi kyɛ ɛmɔpete ɛhemɔ anwo: ataadeɛ biala, nikyee biala bɔ bafa nwomaa bapa ɔ, nikyee biala bɔ bafa abɔngye nwiaa banwo ɔ, ɔne nikyee biala bɔ bafa bakaa base ɔ.”

²¹Ɔsɔfo Eleasa sele koɛhonɛfoɛ bɔ bɛhɔle koɛ ne kyɛ, “Mmeraa bɔ AWURADE ahyɛ ama Mose ne, ye nwo ahyɛdeɛ ɛhe:

²²sikaa kɔkorɛ, ɛdwetɛ, kɔɔbere, buralɛ, kyɛnzee, sum,

²³yeɛ nikyee biala bɔ bɛfa see bɛka ye a onhuro ne, ɛ́mɔfa see bɛ́te ye nwo, na ye nwo kofi. Nakoso odi kyɛ ɛmɔfa anwotelɛ nzue koso bɛte ye nwo. Na nikyee biala bɔ bɛfa see bɛka ye a ohuro ne, odi kyɛ ɛmɔfa bewura nzue ne anu.

²⁴Ye ɛlɛsoo ne aso, odi kyɛ ɛmɔpo ɛmɔ nwo nningyein, amaa ɛmɔ nwo afi. Ye si ye, ɛmɔkora bɛba asikyeleɛ ne anu.”

²⁵AWURADE sele Mose kyɛ,

²⁶“Ɛne ɔsɔfo Eleasa ɔne Yisraelfoɛ nana mɔ sasofoɛ atitire nemɔ, ɛ́mɔha koɛ nu nzesadeɛ bɔ ɛmɔanya ye ne, kyɛ mmenia ahɔ oo, anaa ngaka ahɔ oo.

²⁷Kyɛ koɛ nu nzesadeɛ ne anu nyɔ: fa bue ko ma koɛhonɛfoɛ bɔ bɛhɔle koɛ ne, ná fa bue ko koso ma Yisraelfoɛ ngaa ne amukoraa.

²⁸Koɛhonɛfoɛ bɔ bɛhɔle koɛ ne, bɛ bue deɛ ne, tua so toɔ ma AWURADE. Nningyein ɛyaa nnu biala, ye nu ko: kyɛ mmenia oo, nandwie oo, afunum oo, mmoaen oo, anaa mbɔngye oo.

²⁹Ye fi bɛ bue deɛ ne anu ná fa ma ɔsɔfo Eleasa. Ɔte afɔleɛ ma AWURADE.

³⁰Nakoso Yisraelfoɛ ngaa bɛ bue deɛ ne de, nningyein aburannu biala, kyɛ mmenia oo, nandwie oo, afunum oo, mmoaen oo, mbɔngye oo, anaa kaka biala oo, ye nu ko, ná fa ma Lewifoɛ bɔ bɛso wɔ AWURADE nyianu sua ne anu ne.”

³¹Na Mose ne ɔsɔfo Eleasa yɔle kyɛbɔ AWURADE hyɛle Mose ne ala:

³²Koɛ nu nzesadeɛ bɔ koɛhonɛfoɛ nemɔ sesale ne, ye ngaa ne somaa te mmoaen apee ɛyaa nzia ne aburasoo ne nnu,

³³nandwie apee aburasoo ne nyɔ,

³⁴afunum apee aburasia ne ko,

³⁵ɔne mmenia apee aburasa ne nyɔ, bɔ bɛte mmrasua bɔ bennwuni biaa le ɔ.

³⁶Bɛ bɔ bɛhɔle koɛ ne, bɛ bue deɛ te mmoaen ne mbɔngye apee ɛyaa nza aburasa ne nzoo ɔne ɛyaa nnu.

³⁷Mmoaen ne mbɔngye ne, ɛtoɔ bɔ bɛye befili nu bɛmane AWURADE te ɛyaa nzia ne aburasoo ne nnu.

³⁸Né nandwie nemɔ bɛte apee aburasa ne nzia, na ɛtoɔ bɔ bɛye befili nu bɛmane AWURADE te aburasoo ne nyɔ.

³⁹Afunum nemɔ bɛte apee aburasa ɔne ɛyaa nnu, na ɛtoɔ bɔ bɛye befili nu bɛmane AWURADE te aburasia ne ko.

⁴⁰Mmenia nemɔ bɛte apee buru ne nzia, na ɛtoɔ bɔ bɛye befili nu bɛmane AWURADE te mmenia aburasa ne nyɔ.

⁴¹Ɛtoɔ ne, bɔ ɔte afɔleɛ ma AWURADE ne, Mose fa mane ɔsɔfo Eleasa, kyɛbɔ AWURADE hyɛle Mose ne.

⁴²Mose fale koɛhonɛfoɛ nemɔ bue deɛ mane bɛ ne, osa fale Yisraelfoɛ ngaa nemɔ bɛ bue deɛ mane bɛ.

⁴³Yisraelfoɛ ngaa nemɔ bɛ bue deɛ bɔ ɔfa mane bɛ ne, ɔte mmoaen ne mbɔngye apee ɛyaa nza aburasa ne nzoo ɔne ɛyaa nnu,

⁴⁴nandwie apee aburasa ne nzia,

⁴⁵afunum apee aburasa ɔne ɛyaa nnu,

⁴⁶ɔne mmenia apee buru ne nzia.

⁴⁷Yisraelfoɛ ngaa ne, bɛ bue deɛ ne, kyɛbɔ AWURADE hyɛle Mose ne, Mose yele mmenia ne ngaka aburannu biala nu ko, na ɔfa mane Lewifoɛ bɔ yeɛ bɛso wɔ AWURADE nyianu sua ne anu ne.

⁴⁸Na mbanyi mɔ bɔ bɛlela koɛhonɛfoɛ apee apee noa ne: safohene mɔ bɔ bɛlela apee apee noa, ɔne safohene mɔ bɔ bɛlela ɛyaa ɛyaa noa ne, bɛwale Mose berɛ,

⁴⁹na beesele ye kyɛ, “Wɔ ngoaa mɔ yaha koɛhonɛfoɛ bɔ bewura yɛ bo ne, na yɛ nu biala nne berɛ bɔ wafi nu ɔ.

⁵⁰Na bɔ yɛ nu biala nwuni ye ne: sikaa kɔkorɛ mbembenanneɛ, bɛ bati ngaa ne bɛ sa kɔm ngaa, nzɔanoɛ ngaa, asomade ne akomuade, yafa AWURADE afɔleɛ yabrɛ ye, na yafa yapata yama yɛ kra wɔ AWURADE nyunu.”

⁵¹Na sikaa kɔkorɛ bɔ bafa ye mukoraa bayɔ mbembenanneɛ ne, Mose ne ɔsɔfo Eleasa le fili bɛ berɛ.

⁵²Na koɛhonɛfoɛ apee apee so safohene nemɔ ne ɛyaa ɛyaa so safohene nemɔ, bɛ sikaa kɔkorɛ amukoraa bɔ bɛfa bɛbɔle afɔleɛ bɛmane AWURADE ne, ɔte kilo ɛyaa ko aburahona.

⁵³(Sɔ nningyein nemɔ, né koɛhonɛfoɛ nemɔ de bafa bɛ deɛ basie.)

⁵⁴Yiti Mose ne ɔsɔfo Eleasa lele sikaa kɔkorɛ ne fili koɛhonɛfoɛ apee apee so safohene nemɔ ɔne koɛhonɛfoɛ ɛyaa ɛyaa so safohene nemɔ berɛ. Bɛfa bɛwale ɛtena sua atenaleɛ ne anu maa ɔyɛle ngayeɛ nikyee mane Yisraelfoɛ wɔ AWURADE nyunu.