Read Sehwi Numeri 35 Bible Online

Numeri 35 - Sehwi bible

Numeri 35

¹ Moabo aseɛ frɛtɛɛ ne aso, wɔ asue Yɔɔdan bue nu dɔ bɔ opingye Yeriko ne, berɛ yeɛ AWURADE sele Mose kyɛ,

²“Fa ahyɛdeɛ he ma Yisraelfoɛ kyɛ, b’agyapadeɛ bɔ bɛ sa aha ye ne, bɛ́neanea nu bɛ́yeye nguro bɛ́ma Lewifoɛ mɔ maa bɛtena so. Afei koso, odi kyɛ ɛmɔfa Lewifoɛ bɛ nguro nemɔ nwo aseɛ bɛma bɛ ma bɛ nyɛmmoa didi so.

³Nguro nemɔ kɔyɛ b’atenaleɛ, na nguro nemɔ nwo aseɛ ne, so yeɛ bɛ nandwie mɔ, bɛ nyɛmmoa ne bɛ ngaka amukoraa bekodidi ɔ.

⁴Nguro nemɔ nwo aseɛ bɔ nyɛmmoa kodidi so, bɔ ɛmɔkɔfa bɛkɔma Lewifoɛ ne, odi kyɛ ɔhyɛ ye bo fi kuro berɛ fasue ne, ná ɔtrɛ kɔ agyirɛ apee ko ɔpɛ ye nwo bra yia.

⁵Kuro ne asi dɔ ne, ɛmɔsusu agyirɛ apee nyɔ wɔ eyia afiteleɛ, apee nyɔ wɔ ngwaen, apee nyɔ wɔ eyia atɔleɛ, yeɛ apee nyɔ wɔ sorɔ, maa kuro ne ɔla afia. Sɔ aseɛ ne kɔyɛ bɛ deɛ, na ɔkɔyɛ bɛ nguro nemɔ nwo aseɛ bɔ nyɛmmoa kodidi so ɔ.

⁶ Nguro bɔ ɛmɔkɔfa bɛkɔma Lewifoɛ ne, mmenia nwo adwaabɔlɛ nguro nzia nemɔ, bɔ ɛmɔkɔma sona bɔ wali awue ate maa ɔkɔɔbɔ ye nwo adwaa wɔ nu ne, odi kyɛ ɛmɔfa bɛboka so. Ɛ́mɔfa nguro aburanna ne nyɔ bɛ́boka so bɛma bɛ.

⁷Nguro bɔ ɛmɔkɔfa bɛkɔma Lewifoɛ ne, ye mukoraa kɔyɛ aburanna ne mmɔtwɛ, bɔ bɛ nwo aseɛ bɔ nyɛmmoa kodidi so ɔ boka so ɔ.

⁸Yisraelfoɛ agyapadeɛ bɔ banya ye ne, nu nguro bɔ ɛmɔkɔye bekofi nu bɛkɔma Lewifoɛ ne, odi kyɛ ɛmɔde nguro pee befi mmusua kure mbiri nemɔ berɛ, ná ɛmɔde nguro kãa bie befi mmusua kure mmaa mmaa nemɔ berɛ. Abusua kure biala, ye aseɛ bɔ wanya ye ne, kyɛbɔ ye piri si te ne, so yeɛ odi kyɛ ɔnea na ɔma Lewifoɛ mɔ nguro ɔ.

⁹AWURADE sele Mose kyɛ,

¹⁰“Ka kyire Yisraelfoɛ kyɛ, Sɛ ɛmɔpɛ asue Yɔɔdan bɛkɔ Kaanan aseɛ ne aso a,

¹¹odi kyɛ ɛmɔye nguro nemɔ bie besie berɛ maa bɛyɛ mmenia nwo adwaabɔlɛ nguro bɛma ɛmɔ, amaa sona biala bɔ ɔmmoapa ná okoli awue ne, wanwati wahɔ berɛ.

¹²Sɔ nguro nemɔ, ɛmɔkɔfa bɛkɔbɔ ɛmɔ nwo waen bekofi wereɛtɔlɛniɛ ne sa nu. Ɛhe kɔmaa bengohu sona bɔ wali awue ne wɔ aberɛ bɔ bennya bellili ye dwirɛ wɔ badwa nu ɔ.

¹³Nguro bɔ ɛmɔkɔye bekosie berɛ ne, bɛkɔyɛ mmenia nwo adwaabɔlɛ nguro nzia kɔma ɛmɔ.

¹⁴Odi kyɛ ɛmɔye nguro nza besie berɛ wɔ asue Yɔɔdan asi dɔ, yeɛ nguro nza koso wɔ Kanaan aseɛ ne aso, maa bɛyɛ mmenia nwo adwaabɔlɛ nguro bɛma ɛmɔ.

¹⁵Sɔ nguro nzia nemɔ kɔyɛ mmenia nwo adwaabɔlɛ nguro kɔma Yisraelfoɛ, ɛwɔfoɛ bɔ wanya amandena, ɔne ɛwɔfoɛ bɔ ɔngɔhyɛ Yisrael maen nu ɔ, amaa sona biala bɔ ɔmmoapa ná okoli awue ne, wanwati wahɔ berɛ.

¹⁶Nakoso sɛ ebie fa buralɛ bɔ obiɛngo maa owu a, ɔte kodiawuniɛ, na odi kyɛ beku ye bie.

¹⁷Anaakyɛ, ebiala bɔ ɔkɔfa nyɔboɛ kɔbɔ obiɛngo maa okowu ne, ɔte kodiawuniɛ, na odi kyɛ beku ye bie.

¹⁸Anaakyɛ, ebiala bɔ ɔkɔfa bakaa bɔ ɔte akodeɛ kɔbɔ obiɛngo maa okowu ne, ɔte kodiawuniɛ, na odi kyɛ beku ye bie.

¹⁹Wereɛtɔlɛniɛ ne yeɛ odi kyɛ oku kodiawuniɛ ne ɔ. Sɛ wereɛtɔlɛniɛ ne nwu kodiawuniɛ ne a, odi kyɛ oku ye.

²⁰Sɔ ala yeɛ sɛ ebie onguro obiɛngo dwirɛ, ná osumu ye to ase, anaa ɔtetɛ ye fa nikyee bɔ ye maa owu a,

²¹anaa sɛ ebie pɔ obiɛngo, ná ɔtwe ye sa bɔ ye maa owu a, ye de sɔ sona bɔ ɔtole twɔleɛ ne, odi kyɛ beku ye; ɔte kodiawuniɛ. Sɛ wereɛtɔlɛniɛ ne nwu kodiawuniɛ ne a, odi kyɛ oku ye.

²²Nakoso sɛ mvum nu, ebie sumu obiɛngo bɔ ɔmbɔ ye to ase, anaa ɔto nikyee bɔ ye wɔ aberɛ bɔ wandetɛ ye,

²³anaakyɛ otira nyɔboɛ bɔ ɔkora di awue, na ɔyakyi nu to ebie so maa owu wɔ aberɛ bɔ wanhyɛ da a, ɔwɔ nu kyɛ bɛmbɔ bɛ nwo bɔ adwene tɛɛ biala ɔnne ye ti anu a,

²⁴ye de maen ne kogyina nhyehyɛleɛ hemɔ aso koli sona bɔ wali awue ne ɔne wereɛtɔlɛniɛ ne b’afia dwirɛ.

²⁵Na maen ne kole sona bɔ wali awue ne kofi wereɛtɔlɛniɛ ne sa nu. Afei maen ne kɔfa sona bɔ wali awue ne kɔhɔ mmenia nwo adwaabɔlɛ kuro bɔ ɔnwati hɔle nu ne aso. Sona bɔ wali awue ne kɔtena kuro ne aso kɔpem kyɛ ɔsɔfo panyi bɔ bapopa ye ngoo krongron ne okowu ɔ.

²⁶Nakoso sona bɔ wali awue ne, sɛ ofi mmenia nwo adwaabɔlɛ kuro ne anu fite mmerɛ biala,

²⁷ná sɛ wereɛtɔlɛniɛ ne nwu ye wɔ mmenia nwo adwaabɔlɛ kuro ne asi, ná wereɛtɔlɛniɛ ne ku ye a, ye de onni ye mogya nwo fɔ.

²⁸Ofikyɛ, odi kyɛ sona bɔ wali awue ne, ɔtena mmenia nwo adwaabɔlɛ kuro ne anu kɔpem kyɛ ɔsɔfo panyi ne kowu ɔ. Nakoso ɔsɔfo panyi ne wue si de, sona bɔ wali awue ne, ɔkɔhora kosa kɔhɔ ye kuro.

²⁹Nekaa bɔ ɛmɔkɔtena biala, sɔ dwirɛ ne kɔyɛ ahyɛdeɛ ne nhyehyɛleɛ kɔma ɛmɔ wɔ ɛmɔ aworɛ ndoatoasoɛ amukoraa nu.

³⁰ “Sɛ ebie ku obiɛngo a, odi kyɛ begyina adanzefoɛ noa dwirɛ so beku kodiawuniɛ ne bie; nakoso onni kyɛ begyina adanzeniɛ komapɛ noa dwirɛ so beku ebiala.

³¹Afei koso, kodiawuniɛ bɔ ɔfata ewue ne, onni kyɛ ɛmɔde mbata bɛfa bɛsesã ye ngoa; odi kyɛ beku kodiawuniɛ.

³²Yeɛ sona bɔ wanwati wahɔ mmenia nwo adwaabɔlɛ kuro bie aso ne, onni kyɛ ɛmɔde mbata befi ye berɛ maa onya ate osa batena maen ne anu koraka né ɔsɔfo panyi ne awu.

³³Nnɛma ɛmɔfa efiɛ bɛka aseɛ bɔ ɛmɔte so ne, ofikyɛ mogya ma efiɛ ka aseɛ ne. Na mogya bɔ bɛkɔhã bekogua aseɛ ne aso ne, mbata biala ngɔhora ngɔte aseɛ ne anwo, sana sona bɔ waha sɔ mogya wagua ne, ye mogya ala.

³⁴Nnɛfa efiɛ ka aseɛ bɔ ɛte so, bɔ me koso nde so bie ne. Ofikyɛ me AWURADE, nde Yisraelfoɛ nu.”