Read Sehwi Numeri 36 Bible Online

Numeri 36 - Sehwi bible

Numeri 36

¹Manase awa Makyiri ɔwa Gileade boso ama mɔ befi Yosef abusua nu. Bɛ nana mɔ sasofoɛ mbanyi bɛɛfale bɛ dwirɛ bɛtole Mose ne Yisrael mbanyi, ɔne Yisraelfoɛ bɛ nana mɔ sasofoɛ mbanyi nyunu.

² Bɛhane kyɛ, “AWURADE hyɛle me mene kyɛ ɔfa serewagualɛ so ɔhyɛ aseɛ ne ma Yisraelfoɛ; na AWURADE hyɛle me mene kyɛ ɔfa y’eliɛma Selofehade agyapadeɛ ɔma ye mma mmrasua mɔ.

³Nakoso sɛ begya biaa wɔ Yisrael abusua kure foforɛ nu a, ye de bekole b’aseɛ deɛ bekofi yɛ nana mɔ aseɛ deɛ nu, ná bafa baaboka abusua kure bɔ bahɔ nu agyaa ne b’aseɛ deɛ so. Sɛ ɔba ye sɔ a, yɛ aseɛ deɛ ne, so kɔte.

⁴Na sɛ Yisraelfoɛ Yubilee afoɛ ne so a, ye de odi kyɛ bɛfa b’aseɛ deɛ bɛboka abusua kure bɔ bahɔ nu agyaa ne bɛ deɛ so; na bekole b’aseɛ deɛ bekofi yɛ nana mɔ abusua kure aseɛ deɛ nu.”

⁵Yeɛ Mose gyinane AWURADE dwirɛ so fale sɔ ahyɛdeɛ he mane Yisraelfoɛ kyɛ, “Edwirɛ bɔ Yosef boso ama nemɔ baha ne, ɔte nahorɛ.

⁶Edwirɛ bɔ AWURADE ka fa Selofehade mma mmrasua nemɔ nwo ɛhe: Bɛkɔhora bekogya biaa biala bɔ bɛ bɔbɔ bekuro ɔ; na mmom abusua bɔ ɔwɔ bɛ nana mɔ abusua kure ne anu yeɛ odi kyɛ begya nu biaa ɔ;

⁷amaa ɔnate so bamva Yisraelfoɛ abusua kure biala aseɛ bamma abusua kure foforɛ; ofikyɛ Yisraelfoɛ bɛ nana mɔ abusua kure aseɛ ne, odi kyɛ bɛ nu biala maa ɔka abusua kure ne anu.

⁸Baa brasua biala bɔ ole aseɛ wɔ Yisrael abusua kure biala nu ne, odi kyɛ abusua bɔ ɔwɔ ye baba abusua kure nu yeɛ ogya nu biaa ɔ, amaa Yisraelfoɛ bɛ nana mɔ abusua kure aseɛ ne wahɔ so waha abusua kure ne anu.

⁹Onni kyɛ bɛfa abusua kure biala aseɛ bɛma abusua kure foforɛ; ofikyɛ Yisraelfoɛ abusua kure biala b’aseɛ ne, odi kyɛ bɛmaa ɔka abusua kure ne anu.”

¹⁰Selofehade mma mmrasua nemɔ yɔle kyɛbɔ AWURADE hyɛle Mose ne ala.

¹¹Mahela, Tisa, Hogela, Milka ɔne Nowa bɔ yeɛ bɛte Selofehade mma mmrasua ne begyigyale bɛ baba aliɛma mmienzua mɔ bɛ mma mmienzua ne bie.

¹²Yosef awa Manase abusua kure ne, nu mmusua nemɔ anu mmienzua yeɛ begyigyale bɛ ɔ. Na b’aseɛ hale bɛ baba abusua nu wɔ abusua kure ne anu.

¹³Ɛhemɔ ole mmeraa dwirɛ ne nhyehyɛleɛ bɔ AWURADE nate Mose so fa mane Yisraelfoɛ ɔ. Ɔfa mane bɛ wɔ Moabo aseɛ frɛtɛɛ ne aso, wɔ asue Yɔɔdan bue nu dɔ bɔ opingye Yeriko ne.