Read Sehwi Numeri 5 Bible Online

Numeri 5 - Sehwi bible

Numeri 5

¹AWURADE sele Mose kyɛ,

² “Hyɛ Yisraelfoɛ kyɛ, ebiala bɔ kwata anwonyerɛ[1] ayɛ ye, anaakyɛ ye nwo nzue se, anaakyɛ ye nwo kɔha fuin ma ye nwo kogua fiɛ ne, odi kyɛ betu ye befi asikyeleɛ ne anu.

³Kyɛ bienzua ahɔ oo, anaa brasua ahɔ oo, ɛ́mɔtu ye maa ɔhɔ asikyeleɛ ne asi dɔ. Onni kyɛ b’asikyeleɛ bɔ me ne bɛ yɛte nu ne, bɛfa efiɛ bɛka ye.”

⁴Yisraelfoɛ yɔle sɔ. Betuli bɛ maa bɛhɔle asikyeleɛ ne asi dɔ. Kyɛbɔ AWURADE ha hyirele Mose ne, sɔ ala yeɛ Yisraelfoɛ yɔle ɔ.

⁵ AWURADE sele Mose kyɛ,

⁶“Ka kyire Yisraelfoɛ kyɛ, Sɛ bienzua bie anaa brasua bie yɔ obiɛngo tɛɛ, maa ɔnate so ti ɔyɔ bɔne tia AWURADE a, sɔ sona ne di fɔ,

⁷na odi kyɛ sɔ sona ne ka bɔne bɔ wayɔ ne. Odi kyɛ ɔfa nikyee si ye gya nu otua kerɛ; ósa fa nnu nu ngyɛmuɛ ko boka so ná ɔfa ma sona bɔ wayɔ ye tɛɛ ne.

⁸Sona bɔ bayɔ ye tɛɛ ne, sɛ wawu ná olle abusuaniɛ kaenn biala bɔ bɛkɔfa nikyee bɔ bɛfa besi ye gya nu ne bɛkɔma ye a, ye de sɔ nikyee ne te AWURADE deɛ, na odi kyɛ bɛfa bɛma ɔsɔfo ne. Mbata boaen nyii bɔ bɛkɔfa bɛkɔpata bɛkɔma sona bɔ wayɔ tɛɛ ne, bɛ́fa bɛ́boka so.

⁹Yisraelfoɛ akyɛdeɛ krongron ne amukoraa, nu biala bɔ bɛkɔfa bɛkɔbrɛ ɔsɔfo ne, ɔkɔyɛ ye deɛ.

¹⁰Ebiala ye akyɛdeɛ krongron te ɔsɔfo nemɔ deɛ. Nikyee biala bɔ ebiala kɔfa kɔbrɛ ɔsɔfo biala ne, ɔkɔyɛ sɔ ɔsɔfo ne deɛ.”

¹¹AWURADE sele Mose kyɛ,

¹²“Ka kyire Yisraelfoɛ kyɛ, Sɛ bienzua bie aye fa ye si, ná wanni nahorɛ wamma ye,

¹³bɔ bienzua foforɛ bie ne sɔ braa ne bala, nakoso ohu ande ye nwo hwee, bɔ ohu ne annwu ye, ɔwɔ nu kyɛ braa ne nwo agua fiɛ, ná ye sɔ ti ohu ne olle edwirɛ ne nwo adanzeniɛ biala, ɔnate kyɛ bangɔ amvite ye so ne ati;

¹⁴sɛ nungunɛ wura biaa ne anu maa ɔtwe ɔye bɔ ye nwo agua fiɛ ne anwo nungunɛ, anaakyɛ nungunɛ wura biaa ne anu maa ɔtwe ɔye ne anwo nungunɛ wɔ aberɛ bɔ ɔye ne nwo ogguale fiɛ a,

¹⁵ye de odi kyɛ biaa ne fa ɔye ne ba ɔsɔfo ne nyunu. Odi kyɛ ɔfa braa ne ti afɔleɛ bɔ ɔte ayuo esam olonka ko ne ɔba. Nnɛmaa ɔfa ngoo gua so, yeɛ nnɛmaa ɔfa ɛyɛɛ ogua so, ofikyɛ ɔte nungunɛhwenɛ aburoo afɔleɛ. Ɔte ngayeɛ aburoo afɔleɛ, bɔ bɛfa bɛkaye amumuyɛɛ ɔ.

¹⁶Odi kyɛ ɔsɔfo ne fa braa ne bagyina AWURADE nyunu;

¹⁷odi kyɛ ɔsɔfo ne fa nzue krongron bɔ ɔwɔ bua nu, ná ɔsa nyianu sua nu aseɛnwo mvuture ne bie gua nzue ne anu.

¹⁸Odi kyɛ ɔsɔfo ne fa braa ne bagyina AWURADE nyunu, ɔsangye braa ne ti nwiaa, ná ngayeɛ aburoo afɔleɛ bɔ ɔte nungunɛhwenɛ aburoo afɔleɛ ne, ɔ́fa wura braa ne sa nu. Odi kyɛ ɔsɔfo ne bɔbɔ otira nzue weewee bɔ ɛnomalɛ wɔ nu ne.

¹⁹Odi kyɛ ɔsɔfo ne ma braa ne ta ndaen ná ɔsɔfo ne ka kyɛ, “Sɛ bienzua biala ɔne wɔ bɛllale, sɛ ɛffili ehu asi eegguale wɔ nwo fiɛ wɔ aberɛ bɔ etegya ye a, ye de nnɛma nzue weewee bɔ ɛnomalɛ wɔ nu ye ɔyɔ wɔ hwee.

²⁰Nakoso sɛ afi ehu asi wɔ aberɛ bɔ etegya ye, sɛ agua wɔ nwo fiɛ bɔ bienzua foforɛ bɔ nna ehu ahɔ ɔ ɔne wɔ bala a,”

²¹ye de ɔsɔfo ne, ɔ́ma braa ne ta ɛnomalɛ ndaen ne ná ɔha hyire braa ne kyɛ, ‘AWURADE ma ɛpɔ baa ná mogya tu wɔ maa ɔnate so wɔ mmenia mɔ benwu wɔ kyɛ AWURADE anoma wɔ, na ɛte akyiwadeɛ wɔ bɛ nu.

²²Afei nzue he bɔ ɛnomalɛ wɔ nu ye oogua wɔ kunu ma mogya tu wɔ ná ɛpɔ baa!’ Na odi kyɛ braa ne ka kyɛ, Amen, Amen.’

²³Odi kyɛ ɔsɔfo ne kyerɛ sɔ ɛnomalɛ dwirɛ ne gua nwomaa so, ná onwunzi gua nzue weewee ne anu.

²⁴Odi kyɛ ɔsɔfo ne ma braa ne no nzue weewee bɔ ɛnomalɛ wɔ nu ne, na ɛnomalɛ nzue ne koogua ye kunu kɔmaa ɔkɔte yealɛ serɛserɛ paa.

²⁵Odi kyɛ ɔsɔfo ne de nungunɛhwenɛ aburoo afɔleɛ ne fi braa ne sa nu, ná ɔnwaha ye wɔ AWURADE nyunu, ná ɔfa ba afɔleɛ bokyea ne aso.

²⁶Aburoo afɔleɛ ne, odi kyɛ ɔsɔfo ne sa ye sa bum ko fa yɛ ngayeɛ nikye ná ɔyera ye wɔ afɔleɛ bokyea ne aso. Afei odi kyɛ ɔma braa ne no nzue ne.

²⁷Sɛ ɔma braa ne no nzue ne yie, ná sɛ braa ne wafi ohu asi waagua ye nwo fiɛ a, ye de nzue bɔ ɛnomalɛ wɔ nu ne kowurawura ye nu kɔma ye nwo kotutu ye paa. Mogya kotu ye, ɔkɔpɔ baa, na ye mmenia mɔ konwu kyɛ ɔte sona bɔ AWURADE anoma ye ɔ.

²⁸Nakoso sɛ braa ne ogguale ye nwo fiɛ, ná mmom ye nwo te a, ye de hwee ngɔyɔ ye, na ɔkɔhora kɔwo baa.

²⁹Ɛhe ole nungunɛhwenɛ nwo mmeraa, na ɔfa brasua bɔ ɔtɛ gya ohu, ná koso okofi ohu asi kogua ye nwo fiɛ nwo.

³⁰Anaa sɛ nungunɛhwenɛ wura bienzua nu maa ɔtwe ɔye anwo nungunɛ a, ye de odi kyɛ ɔfa brasua ne bagyina AWURADE nyunu ma ɔsɔfo ne fa braa ne fa nhyehyɛleɛ he amukoraati nu.

³¹Bienzua ne ngoli amumuyɛɛ biala nwo fɔ, nakoso brasua ne de, ye amumuyɛɛ kɔbɔ ye ti so.