Read Sehwi Numeri 6 Bible Online

Numeri 6 - Sehwi bible

Numeri 6

¹AWURADE sele Mose kyɛ,

²“Ka kyire Yisraelfoɛ kyɛ, Sɛ bienzua anaa brasua bie bɔ anohoba sonongo, bɔ ɔte nasiritefoɛ[2] anohoba, kyɛ watu ye nwo wasie berɛ wama AWURADE a,

³ odi kyɛ otua ye nwo bobe nzaa ne nzaa serɛ. Onni kyɛ ɔno bobe nzaa kekarekekare anaa nzaa kekarekekare biala. Onni kyɛ ɔno bobe nzue anaa odi ye aleɛ, kyɛ ye monɛ oo, anaa ye worowaa oo.

⁴Mmerɛ amukoraa bɔ ɔtɛ te nasiriteniɛ ne, onni kyɛ odi nikyee biala bɔ bafa bobe bayɔ ɔ, kyɛ bafa ye mma anaakyɛ ye boen po yeɛ bayɔ hɔ oo.

⁵Mmerɛ amukoraa bɔ watu ye nwo wasie berɛ wayɛ nasiriteniɛ ne, onni kyɛ ɔtete ye ti. Kɔpem kyɛ mmerɛ bɔ watu ye nwo wasie berɛ wama AWURADE kɔpɛ nu ne, odi kyɛ ɔyɛ krongron; ɔ́ma ye ti nwiaa mbɛsɛmbɛsɛ ne ofu gua ye ti anwo.

⁶Mmerɛ amukoraa bɔ watu ye nwo wasie berɛ wama AWURADE ne, onni kyɛ ɔkɔ fuin nwo.

⁷Sɛ ɔse anaa oni anaa oliɛma bienzua anaa oliɛma brasua po wu a, nnɛmaa ɔkɔ ye fuin nwo ma ye nwo gua fiɛ, ofikyɛ ye nwo bɔ watu wasie berɛ wama AWURADE ne, ye ti so yeɛ ɔwɔ ɔ.

⁸Mmerɛ amukoraa bɔ ɔtɛ te Nasiriteniɛ ne, ɔte krongron ma AWURADE.

⁹Sɛ mvum nu ebie wu wɔ ye nyunu maa ɔnate so efiɛ ka ye ti bɔ watu wasie berɛ wama AWURADE ne a, ye de kyẽa bɔ ɔpete ye nwo ne, odi kyɛ ɔpoa ye ti. Ɛlɛsoo ne aso yeɛ odi kyɛ ɔpoa ye ti ɔ.

¹⁰Ye ɛlɛbɔtwɛ ne aso, odi kyɛ ɔfa mmubure nyɔ anaa mmorɔnoma buruwa nyɔ brɛ ɔsɔfo ne wɔ ɛtena sua atenaleɛ anoa nu berɛ.

¹¹Odi kyɛ ɔsɔfo ne fa ko bɔ bɔne nwo afɔleɛ, ná ɔfa ko koso bɔ naen yeralɛ afɔleɛ, ná ɔpata ma ye, ofikyɛ ɔnate efuin ne ati wali fɔ. Odi kyɛ osa te ye ti ne anwo maa ɔyɛ krongron sɔ kyẽa ne ala,

¹²ná otu ye nwo sie berɛ ma AWURADE mmerɛ biala bɔ ɔtɛ te nasiriteniɛ ɔ. Odi kyɛ ɔfa boaen nyii akrɔngrɔma ko bɔ wali afoɛ ko ɔbabɔ foɛlilɛ afɔleɛ. Mmerɛ daa bɔ olili moa tuli ye nwo siele berɛ mane AWURADE ne de, wayera wagua, ofikyɛ efiɛ hane ye ti bɔ ɔyɛle ye krongron ne.

¹³ Sɛ mmerɛ bɔ nasiriteniɛ ne wafa watu ye nwo wasie berɛ wama AWURADE ne ɔba ayieleɛ a, ye nwo mmeraa ɛhe: odi kyɛ bɛfa ye bɛbagyina ɛtena sua atenaleɛ anoa nu berɛ.

¹⁴Odi kyɛ ɔfa ye akyɛdeɛ hemɔ ɔbrɛ AWURADE: boaen nyii akrɔngrɔma ko bɔ wali afoɛ ko, bɔ ollili nnɛen biala, bɔ ɔ́fa bɔ naen yeralɛ afɔleɛ ɔ; boaen beleɛ akrɔngrɔma ko bɔ wali afoɛ ko, bɔ ollili nnɛen biala, bɔ ɔ́fa bɔ bɔne nwo afɔleɛ ɔ; boaen nyii ko bɔ ollili nnɛen biala ɔ, bɔ ɔ́fa bɔ asomdwee afɔleɛ ɔ,

¹⁵paanoo kabrɛdi kɛndɛen ko, taterɛ bɔ bafa esam paa bɔ bafa ngoo bafra ye bayɔ ɔ; apiti kabrɛdi bɔ bafa ngoo bafa ye nwo ɔ, yeɛ bɛ nwo aburoo afɔleɛ ne bɛ nwo anonneɛ afɔleɛ.

¹⁶Odi kyɛ ɔsɔfo ne fa nningyein hemɔ ba AWURADE nyunu ná ɔbɔ nasiriteniɛ ne ye bɔne nwo afɔleɛ ne naen yeralɛ afɔleɛ ne.

¹⁷Odi kyɛ ɔfa boaen nyii ne ɔne paanoo kabrɛdi kɛndɛen ko ne bɔ asomdwee afɔleɛ ma AWURADE. Afei ɔsɔfo ne ɔ́bɔ aburoo afɔleɛ ne anonneɛ afɔleɛ bɔ bɛboka so ne.

¹⁸Nasiriteniɛ ne, ye ti bɔ watu wasie berɛ wama AWURADE ne, odi kyɛ ɔpoa ye wɔ ɛtena sua atenaleɛ anoa nu berɛ, na tire bɔ watu wasie berɛ wama AWURADE ne aso nwiaa ne, ɔ́fa ógua asomdwee afɔleɛ ne abo see ne anu.

¹⁹Sɛ nasiriteniɛ ne, ɔpoa ye ti bɔ watu wasie berɛ wama AWURADE ne oyie a, odi kyɛ ɔsɔfo ne fa ɛhemɔ gua nasiriteniɛ ne ye sa munyɔ nu: sɔ boaen nyii ne ye waen bɔ bato ɔ, taterɛ kabrɛdi ko bɔ baye bafi kɛndɛen ne anu ɔ, ɔne apiti kabrɛdi ko.

²⁰Odi kyɛ ɔsɔfo ne pagya nningyein nemɔ aso bɔ ɛnwahanɛ afɔleɛ wɔ AWURADE nyunu; bɛ ne ye sa bɔ bɛnwaha ne, ɔne ye gya bɔ bɛfa bɛbɔ afɔleɛ ne, bɛte krongron, ná ɔsɔfo bue deɛ ɛne. Ye si ye, nasiriteniɛ ne le ye nwo ate kyɛ ɔno nzaa ɔ.

²¹Mmeraa he la berɛ ma nasiriteniɛ bɔ ɔkɔbɔ anohoba ɔ: ye afɔleɛ bɔ ɔfa ma AWURADE ne, odi kyɛ ɔbɔ ye kyɛbɔ nasiritefoɛ anohobabɔlɛ te ɔ, na odi kyɛ ɔfa nikyee bɔ ye nwo kɔsõ so ɔ ɔboka so. Anohoba biala bɔ ɔkɔbɔ ne, odi kyɛ ogyina nasiriteniɛyɛlɛ mmeraa so odi so.”

²²Na AWURADE sele Mose kyɛ,

²³“Kã kyire Aarɔn ne ye mma mmienzua mɔ kyɛ: Edwirɛ he yeɛ ɛmɔhã bɛfa beyira Yisraelfoɛ ɔ. Ɛmɔhã behyire bɛ kyɛ,

²⁴‘AWURADE yira wɔ, ná ɔnea wɔ so;

²⁵AWURADE ɔ́ma ye nyunu ɔta hyireinn ɔma wɔ, ná ɔlo wɔ;

²⁶AWURADE ɔ́te ye nyunu hyire wɔ, ná ɔma wɔ asomdwee.’

²⁷“Yiti odi kyɛ bɛma me dumaa da Yisraelfoɛ so, na ngoyira bɛ.”