Read Sehwi Numeri 8 Bible Online

Numeri 8 - Sehwi bible

Numeri 8

¹AWURADE sele Mose kyɛ,

²“Ka kyire Aarɔn kyɛ, Sɛ ɛ́fa nganea nemɔ siesie kanea bakaa ne aso a, odi kyɛ ɛfa nganea nzoo nemɔ siesie so maa bɛta kanea bakaa ne nyunu berɛ.”

³Yiti Aarɔn yɔle sɔ. Ɔfale nganea nemɔ siesiele kanea bakaa ne aso maa bɛtale kanea bakaa ne nyunu, kyɛbɔ AWURADE hyɛle Mose ne.

⁴Sɔa yeɛ bɛyɔle kanea bakaa ne ɔ: bɛborole sikaa kɔkorɛ yeɛ bɛfa bɛyɔle ɔ. Ofi ye nyinasoɛ so kodwu ye nyerɛen ne aso ne, ɔte sikaa kɔkorɛ bɔ baboro ɔ. Kyɛbɔ AWURADE fa hyirele Mose ne sɛso te ne, sɔ ala yeɛ ɔyɔle kanea bakaa ne ɔ.

⁵AWURADE sele Mose kyɛ,

⁶ “Yeye Lewifoɛ mɔ fi Yisraelfoɛ nu ná te bɛ nwo.

⁷Ɛhe yeɛ odi kyɛ ɛyɔ ná ɛfa te bɛ nwo ɔ: Fa nzue bɔ bɛfa bɛte bɛ nwo ne pete bɛ nwo. Maa bɛfa dɛmaa bɛpoa bɛ nwo nwiaa amukoraa ná bɛpo bɛ nwo nningyein, amaa ɔnate so bɛ nwo ate.

⁸Afei maa bɛfa nandwie nyii akrɔngrɔma ko, ɔne ye nwo aburoo afɔleɛ bɔ bafa esam paa bɔ bafa ngoo bafra ye ɔ, na odi kyɛ esa fa nandwie nyii akrɔngrɔma ko babɔ bɔne nwo afɔleɛ.

⁹Odi kyɛ ɛma Lewifoɛ mɔ bagyina ɛtena sua atenaleɛ ne anyunu, ná ɛma Yisrael maen ne amukoraa babɔ dwaa.

¹⁰Sɛ ɛma Lewifoɛ mɔ bagyina AWURADE nyunu a, odi kyɛ Yisraelfoɛ fa bɛ sa gua Lewifoɛ mɔ aso.

¹¹Odi kyɛ Aarɔn fa Lewifoɛ mɔ bagyina AWURADE nyunu maa bɛyɛ ɛnwahanɛ afɔleɛ bɔ ofi Yisraelfoɛ berɛ ɔ, amaa ɔnate so Lewifoɛ bayɔ AWURADE adwuma.

¹²Ɔsɛ kyɛ Lewifoɛ mɔ bɛfa bɛ sa begua nandwie nyii nemɔ ti afia; ná Aarɔn ɔ́fa ko ɔ́bɔ bɔne nwo afɔleɛ, ná ɔ́fa ko koso ɔ́bɔ naen yeralɛ afɔleɛ ma AWURADE, ná ɔfa pata ma Lewifoɛ mɔ.

¹³Afei ma Lewifoɛ mɔ beegyina Aarɔn ne ye mma mmienzua nemɔ nyunu, ná fa bɛ yɛ ɛnwahanɛ afɔleɛ ma AWURADE.

¹⁴“Fa sɔ atee ye aso ye Lewifoɛ sie ahameɛ fi Yisraelfoɛ ngaa nemɔ anu, na Lewifoɛ mɔ kɔɔyɛ me deɛ.

¹⁵Sɛ ɛte Lewifoɛ mɔ anwo yie, ná ɛfa bɛ yɛ ɛnwahanɛ afɔleɛ wɔ AWURADE nyunu a, ye si ye, odi kyɛ Lewifoɛ mɔ bɛkɔhyɛ b’adwuma bo wɔ ɛtena sua atenaleɛ ne anu berɛ.

¹⁶Ofikyɛ, Yisraelfoɛ nu, bɛ yeɛ batu bɛ basie berɛ bɔkɔɔ bama me ɔ. Matu bɛ masie berɛ mama me nwo, na mafa bɛ masi ebiala bɔ bekoli moa bɛkɔwo ye, bɔ bɛ yeɛ bɛte Yisrael bamuɛbaa mmienzua amukoraa bɛ gya nu.

¹⁷Ofikyɛ Yisraelfoɛ bamuɛbaa amukoraa, kyɛ sona oo, kyɛ kaka oo, ɔte me deɛ. Kyẽa bɔ nguni bamuɛbaa amukoraa wɔ Misraim aseɛ so ne yeɛ nduli bɛ nziele berɛ mane me nwo ɔ.

¹⁸ Mafa Lewifoɛ mɔ masi Yisraelfoɛ bamuɛbaa mmienzua amukoraa bɛ gya nu.

¹⁹Afei koso, maye Lewifoɛ masie ahameɛ mafi Yisraelfoɛ nu, na mafa bɛ mayɛ akyɛdeɛ mama Aarɔn ne ye mma mmienzua mɔ, kyɛ bɛyɔ ɛsɔnenɛ adwuma bɛma Yisraelfoɛ wɔ ɛtena sua atenaleɛ ne anu, ná bɛpata bɛma Yisraelfoɛ, amaa sɛ Yisraelfoɛ bepingye nekaa krongron ne a, amaneɛ biala ando bɛ.”

²⁰Yiti Mose ne Aarɔn ne Yisraelfoɛ amukoraati betuli Lewifoɛ besiele berɛ bɛmane AWURADE. Yisraelfoɛ tuli Lewifoɛ siele berɛ kyɛbɔ AWURADE hyɛle Mose fale bɛ nwo ne ala.

²¹Lewifoɛ mɔ petene bɛ nwo, na bɛpole bɛ nwo nningyein. Afei Aarɔn fale bɛ yɛle ɛnwahanɛ afɔleɛ wɔ AWURADE nyunu, na Aarɔn patale mane bɛ fa tele bɛ nwo.

²²Ye si ye, Lewifoɛ mɔ hɔle bɛɛyɔle b’adwuma wɔ ɛtena sua atenaleɛ ne anu. Né Aarɔn ne ye mma mmienzua mɔ yeɛ bɛnea bɛ so ɔ. Na kyɛbɔ AWURADE hyɛle Mose fale Lewifoɛ mɔ nwo ne, sɔ ala yeɛ betuli bɛ besiele berɛ bɛmane AWURADE ɔ.

²³AWURADE sele Mose kyɛ,

²⁴“Nhyehyɛleɛ he wɔ berɛ ma Lewifoɛ mɔ: bɛ bɔ bali ofi afoɛ aburanyɔ ne nnu bɔ ɔkɔ ne, odi kyɛ bɛhyɛ ye bo bɛyɔ ɛsɔnenɛ adwuma wɔ ɛtena sua atenaleɛ ne anu.

²⁵Na ofi afoɛ aburannu bɔ ɔkɔ ne, odi kyɛ bede bɛ nwome befi ɛsɔnenɛ adwuma ne anu na onni kyɛ bɛso ko.

²⁶Bɛkɔhora bɛkɔbokaboka b’eliɛma mɔ maa bɛkɔyɔ b’adwuma wɔ ɛtena sua atenaleɛ ne anu, nakoso onni kyɛ bɛyɔ ɛsɔnenɛ adwuma ne bie. Sɔ yeɛ odi kyɛ ɛfa Lewifoɛ nemɔ adwuma wura bɛ sa ɔ.