Read Sehwi Numeri 9 Bible Online

Numeri 9 - Sehwi bible

Numeri 9

¹ Yisraelfoɛ tu fili Misraim aseɛ so ne asi, bosome bɔ oli moa wɔ afoɛ bɔ ɔtɔ so nyɔ ne anu, AWURADE sele Mose wɔ Sinai ɛserɛ ne aso kyɛ,

²“Ma Yisraelfoɛ beli Abɔtra aluolue ne wɔ mmerɛ bɔ mahyɛ mato berɛ ɔ nu.

³Sɔ bosome he, ye kyẽa bɔ ɔtɔ so buru ne nna ne, sɛ aleɛ dwo a, ɛ́mɔli ye kyɛbɔ ye nwo ahyɛdeɛ ne ye nwo nhyehyɛleɛ te ɔ wɔ mmerɛ bɔ mahyɛ ɔ nu.”

⁴Yiti Mose ha hyirele Yisraelfoɛ kyɛ beli Abɔtra aluolue ne.

⁵Belili Abɔtra aluolue ne wɔ bosome bɔ oli moa ne anu, wɔ ye kyẽa bɔ ɔtɔ so buru ne nna ne aso. Aleɛ dwole ne, belili ye wɔ Sinai ɛserɛ ne aso. Kyɛbɔ AWURADE hyɛle Mose ne, sɔ ala yeɛ Yisraelfoɛ lili ye ɔ.

⁶Né mmenia ne biemɔ bɛ nwo aha fuin ama bɛ nwo agua fiɛ, yiti bangora banni Abɔtra aluolue ne bie sɔ kyẽa ne. Bɛwale Mose ne Aarɔn nyunu sɔ kyẽa ne,

⁷na beebisale Mose kyɛ, “Ɔwɔ nu kyɛ yɛ nwo aha fuin ama yɛ nwo agua fiɛ de, nakoso nzu ati yeɛ odi kyɛ besi yɛ ate maa ye sɔ ti yɛngora yɛmva yɛ afɔleɛ yɛmmrɛ AWURADE wɔ mmerɛ bɔ wahyehyɛ wato berɛ ɔ nu, kyɛbɔ Yisraelfoɛ ngaa ne de bayɔ ne?”

⁸Mose buale bɛ kyɛ, “Ɛmɔnwondɛ maa ndie mmeraa bɔ AWURADE kɔhyɛ kɔfa ɛmɔ nwo ɔ.”

⁹Na AWURADE sele Mose kyɛ,

¹⁰“Ka kyire Yisraelfoɛ kyɛ, Ɛmɔ nu biala anaa ɛmɔ bosoniɛ biala bɔ ye nwo kɔha fuin kɔma ye nwo kogua fiɛ, anaakyɛ ebiala bɔ watu atee ne, ye koso ɔsɛ kyɛ odi AWURADE Abɔtra aluolue ne bie.

¹¹Kyẽa bɔ ɔtɔ so buru ne nna wɔ bosome bɔ ɔtɔ so nyɔ ne anu ne, aleɛ dwo a yeɛ odi kyɛ bedi Abɔtra ne ɔ. Odi kyɛ bɛfa paanoo kabrɛdi ne awɔwee nyaa yeɛ bɛboka so bedi ɔ.

¹² Nnɛmaa bɛyakyi bie ma aleɛ kye so, yeɛ nnɛmaa bɛbɔ naen ne bowue nu. Beli ye kyɛbɔ Abɔtra aluolue ne nwo nhyehyɛleɛ amukoraa te ɔ.

¹³Nakoso ebiala bɔ ye nwo te, bɔ ottuli atee, nakoso wanni Abɔtra aluolue ne bie ne, odi kyɛ bɛpɛ ye asue befi ye mmenia nu, ofikyɛ wamva AWURADE afɔleɛ wammrɛ ye wɔ mmerɛ bɔ AWURADE ahyɛ ɔ nu. Sɔ sona ne, ye bɔne kɔbɔ ye ti so.

¹⁴Sɛ amanvraniɛ bie bɔ waatena ɛmɔ nu kuro kyɛ odi AWURADE Abɔtra aluolue ne bie a, óli ye kyɛbɔ Abɔtra aluolue ne nwo ahyɛdeɛ ne ye nwo nhyehyɛleɛ te ɔ. Amanvoraniɛ bɔ waatena ɛmɔ nu oo, maen ne anu niɛ oo, ahyɛdeɛ komapɛ yeɛ ɔla berɛ ma ɛmɔ ɔ.”

¹⁵Kyẽa bɔ besili nyianu sua ne, munungum ne munduni nyianu sua bɔ ɔte adanzeɛ ɛtena sua ne aso, fi nɔsoa maa oodwuli ngyerɛmɔ. Né munungum ne sue te kyɛ see, na omunduni nyianu sua ne aso.

¹⁶Daa biala sɔ ala yeɛ né ɔte ɔ: sɛ aleɛ kye a, munungum ne mundu so, na aleɛ sa a né wakakyi kyɛ see.

¹⁷Mmerɛ biala bɔ munungum ne kɔma ye nwo so kofi ɛtena sua ne aso ne yeɛ Yisraelfoɛ betu bɛ bo ɔ; na nekaa biala bɔ munungum ne kogyina ne, berɛ yeɛ Yisraelfoɛ fa yɛ b’asikyeleɛ ɔ.

¹⁸Sɛ AWURADE ka kyɛ Yisraelfoɛ betu bɛ bo a yeɛ betu bɛ bo ɔ; na sɛ AWURADE ka kyɛ begyina a, yeɛ begyina bɛkyekye asikyeleɛ ɔ. Mmerɛ biala, bɔ munungum ne tɛ mundu nyianu sua ne aso ne, Yisraelfoɛ tena asikyeleɛ berɛ.

¹⁹Sɛ ɔba ye kyɛ munungum ne mundu nyianu sua ne aso ngyẽa pee po a, Yisraelfoɛ di AWURADE dwirɛ ne aso, na bendu bɛ bo.

²⁰Sɛ né odwu mmerɛ bie a, munungum ne mundu nyianu sua ne aso ngyẽa kãa bie, na kyɛbɔ AWURADE ahyɛ bɛ ne, né bɛtena asikyeleɛ berɛ. Ye si ye, kyɛbɔ AWURADE ahyɛ bɛ ne, né besa betu bɛ bo.

²¹Sɛ né odwu mmerɛ bie a, munungum ne mundu so fi nɔsoa kodwu ngyerɛmɔ; na sɛ munungum ne ma ye nwo so ngyerɛmɔ ne a, né batu bɛ bo. Sɛ munungum ne toa so mundu so eyia ne kɔngɔen a, mmerɛ biala bɔ ɔkɔma ye nwo so ne, né batu bɛ bo.

²²Na sɛ munungum ne toa so mundu nyianu sua ne aso elenyɔ, anaa bosome, anaa mmerɛ tendenn biala a, Yisraelfoɛ kɔ so tena asikyeleɛ berɛ bɔ bendu bɛ bo ɔ. Nakoso sɛ munungum ne ma ye nwo so a, né batu bɛ bo.

²³Sɛ AWURADE ka kyɛ bɛkyekye asikyeleɛ a yeɛ bɛkyekye asikyeleɛ ɔ, na sɛ AWURADE ka kyɛ betu bɛ bo a yeɛ betu bɛ bo ɔ. Belili AWURADE ahyɛdeɛ so, ahyɛdeɛ bɔ AWURADE nate Mose so fa mane bɛ ne.