Read Sehwi Mika 4 Bible Online

Mika 4 - Sehwi bible

Mika 4

¹Nakoso ɔkɔwa kyɛ, ngyẽa bɔ oli nziɛ ne anu, bokaa bɔ AWURADE awuro ne gyi so ne, okotimu kɔyɛ tendenn paa wɔ mmokaa nemɔ anu, na ɔkɔhɔ anwuro kɔtra pambaa nemɔ. Mmenia kotu bi bɛkɔhɔ so,

²na maen maen pee kɔwa bɛkɔɔhã kyɛ, “Ɛmɔbra maa yɛfo yɛhɔ AWURADE bokaa ne aso, yɛhɔ Yakob Nyameɛ n’awuro berɛ, amaa ɔnate so wahyirehyire yɛ ye atee, ná yanate ye atimbire so.” Ofikyɛ Sion yeɛ mmeraa ne kofi kɔwa ɔ, na AWURADE dwirɛ ne kofi Yerusalem yeɛ ɔkɔwa ɔ.

³ Okoli maen maen pee b’afia dwirɛ, na okohwi maen maen anwoserɛfoɛ bɔ bɛwɔ dedeede ɔ bɛ nyunu. Bɛkɔboro bɛ ngrandɛ bɛkɔfa bɛkɔbɔ kona, ná baboro bɛ pealɛɛ bafa babɔ asɔsɔaa. Maen bie ngɔhwe obiɛngo maen so ngrandɛ, yeɛ bengosua koɛhonɛ ko.

⁴ Ebiala kɔtena ye bobe ne ye borɔdoma bakaa bo, na ebiala ngonwunanwuna bɛ, ofikyɛ Asafo AWURADE bɔbɔ yeɛ wate ye noa wahã ɔ.

⁵Ofikyɛ amaen maen amukoraa, bɛ nu biala nate wɔ ye nyameɛ dumaa nu, nakoso yɛ de, yɛkɔnate AWURADE yɛ Nyameɛ dumaa nu afebɔɔ.

⁶Na sɔ kyẽa ne, ngɔboaboa mmubuafoɛ mɔ noa, na ngɔboaboa bɛ bɔ bapɛ bɛ asue mɔ noa, ɔne bɛ bɔ mafa bɛ mafa yealɛ nu ɔ bɛ noa, AWURADE noa dwirɛ ɛne.

⁷Na ngɔma mmubuafoɛ nemɔ kɔyɛ mmenia bɔ baha ɔ, yeɛ bɛ bɔ bapɛ bɛ asue ne, ngɔmaa bɛkɔyɛ anwoserɛ maen; na AWURADE koli bɛ so hene wɔ Sion bokaa so kekesaala ye ne afebɔɔ.

⁸Na wɔ, mmoaen kure abandenden, Sion awa brasua anwoserɛ afealeɛ, wɔ berɛ yeɛ tumililɛ bɔ oli moa ne kɔwa ɔ; ahennie ne kɔwa Yerusalem awa brasua berɛ.

⁹Na afei, nzu ati yeɛ esu serɛserɛ ye? Aso ɛhene biala nne wɔ nu anaa? Aso wɔ foɛtulɛniɛ wawu anaa, bɔ enwu yealɛ kyɛ brasua bɔ aworɛ ahã ye e?

¹⁰Ao Sion awa brasua, pene ná twe wɔ nwo kyɛ brasua bɔ wafo aworɛ so ɔ, ofikyɛ afei de, ekofi kuro ne anu kɔhɔ kɔɔtena eburo; na ɛkɔhɔ Babilɔn, berɛ yeɛ AWURADE kɔpepɛ kole wɔ ɔ; berɛ yeɛ AWURADE kɔpɔ wɔ kofi wɔ pɔfoɛ mɔ sa nu ɔ.

¹¹Na afei koso, maen maen pee baboa bɛ noa badwɔso batia wɔ. Bɛnwa, “Yɛpena kyɛ ye nwo gua fiɛ, ná yɛbɔ yɛ nye afɔleɛ wɔ Sion amaneɛnwunɛ ne anwo.”

¹²Nakoso bɛ de, bɛnze AWURADE adwene, yeɛ bɛnde ye nhyehyɛleɛ bo, ofikyɛ ɔkɔboaboa bɛ noa kyɛ ɛmo bɔ bakyekye ye tire tire bagua nekaa bɔ bɛboro ɛmo ɔ.

¹³Ao Sion awa brasua, dwɔso ná boro, ofikyɛ wɔ mmɛen ne, ngɔyɛ ye buralɛ, yeɛ ngɔyɛ wɔ gya mmaboa ne koso kɔɔbere, na ɛkɔfa kɔsɛkye maen pee pasapasa. Ngotu b’anwonyadeɛ ngosie berɛ ngɔma AWURADE, yeɛ ngotu b’agyapadeɛ ngosie berɛ ngɔma aseɛ amukoraa Mene ne.