Read Sehwi Mika 5 Bible Online

Mika 5 - Sehwi bible

Mika 5

¹Ao koɛhonɛfoɛ awa brasua, afei boa wɔ noa koɛhonɛfoɛ kure kure; watua yɛ kuro ne; Yisrael maenbulɛniɛ ne, bɛkɔfa bakaa bɛkɔbɔ ye mvoka.

² Nakoso wɔ, ao Betlehem Efrata, ɔwɔ nu kyɛ ɛte kãa wɔ Yuda nguro nemɔ anu de, nakoso bɔ ɔkɔyɛ Yisrael maenbulɛniɛ ne, bɔ ye ahyɛaseɛ fi tete, bɔ ofi mmerɛ bɔ olle ahyɛaseɛ ne, wɔ yeɛ okofi wɔ nu kɔwa kɔma me ɔ.

³Yiti ɔkɔyakyi bɛ nu kɔɔpem mmerɛ bɔ braa bɔ wafo aworɛ so ne kɔwo ɔ. Na afei oliɛma ngaa nemɔ, bekosa bɛkɔɔboka Yisrael mma nemɔ aso.

⁴Na ɔkɔfa AWURADE anwoserɛ kogyina berɛ kɔma ye mmoaen kure aleɛ, wɔ AWURADE ye Nyameɛ animnyam ahennie dumaa nu. Bɛ bo kotimu, ofikyɛ afei ɔkɔyɛ titire koodwu aseɛ so nekaa biala.

⁵Na ye yeɛ ɔkɔyɛ asomdwee ne ɔ. Sɛ Asiria ɔba y’aseɛ ne aso, ná otiatia y’ahemvie nemɔ aso a, yɛkɔye neafoɛ nzoo ne atitirefoɛ mmɔtwɛ maa bekodwɔso bekotia ye.

⁶ Na bɛkɔfa ngrandɛ bekoli Asiria aseɛ ne aso ngonim, yeɛ Nimrode aseɛ ne aso pambim mɔ anu; sɛ Asiria ɔba y’aseɛ ne aso, ná otiatia y’aseɛ nemɔ aso a, okole yɛ kofi ye sa nu.

⁷Na Yakob boso ama ngaa ne, bɛkɔyɛ kyɛ bosue bɔ ofi AWURADE berɛ ɔ wɔ maen maen pee bɛ nu, kyɛ nyenyenzue bɔ ogua ndire so ɔ, bɔ ɔmva ye nwo ndo sona so, anaa ɔnnwondɛ adasa mmaa ɔ.

⁸Na Yakob boso ama ngaa ne, bɛkɔtena amaenmaensofoɛ nu wɔ maen maen pee bɛ nu, kyɛ gyata bɔ ɔwɔ ɛhɔayeɛ nu ngaka mɔ nu ɔ, kyɛ gyata ba bɔ ɔwɔ mmoaen kure mɔ nu ɔ, bɔ sɛ ɔbaasẽ kɔ a, otiatia bɛ so, ná ɔtete bɛ nu pasapasa bɔ ebiala nne berɛ bɔ ɔkɔpepɛ kole bɛ ɔ.

⁹Ɛkɔma wɔ sa so kotia bɛ bɔ bekyi wɔ ɔ, na wɔ pɔfoɛ mɔ amukoraa bɛ boso konua.

¹⁰Na ɔkɔwa kyɛ sɔ kyẽa ne, ngonua wɔ mbɔngɔ mɔ boso ngofi wɔ nu, na ngɔsɛkye wɔ teaseɛnam mɔ, AWURADE noa dwirɛ ɛne.

¹¹Ngɔbɔ w’aseɛ ne aso nguro mɔ, na ngodwiri w’anwoserɛ afealeɛ ne amukoraa ngogua.

¹²Ngonyaayelɛ bɔ ɛye ne, ngotu ye bo, na engonya ahɔmeɛ ko.

¹³Ngɔsɛkye w’amoen mɔ pasaa, yeɛ ngɔsɛkye w’amoen bɔ agyinagyina nemɔ koso ngofi wɔ nu, na ɛngɔsɔne wɔ sa noa adwuma ko.

¹⁴Ngotutu w’Asera dosii nemɔ abo ngofi wɔ nu, na ngɔbɔ wɔ nguro nemɔ pasaa.

¹⁵Na maen maen mɔ bɔ banyɛ sotie bamma me ne, nne ɛyaa ne ahonehulɛ ngɔtɔ bɛ so wereɛ.