Read Sehwi Mika 7 Bible Online

Mika 7 - Sehwi bible

Mika 7

¹Edwirɛ ato me oo! Ofikyɛ mayɛ kyɛ ebie bɔ bate borɔdoma bayie, bɔ bate bobe si ne bayie, bɔ bennya ye mma biribiraa ne bie benni ɔ. Borɔdoma mma bɔ wali moa wasu, bɔ me komvi wɔ so ne, ebie nne berɛ.

²Mmeni paa boso amini afi aseɛ ye aso, na teneneeniɛ biala nne mmenia nu; bɛ mukoraa bɛtetɛ bɛpena mogya bɛkã begua, na ebiala sua oliɛma ngaen ɔpena ye ɔkye ye.

³Bɛ sa nyɔ ne, ɔbɔ bɔneyɔlɛ nwo mmɔden, mbanyi ne ndɛenbualɛfoɛ bede fea-ase-ma, na tumifoɛ nemɔ bɛkã nikyee tɛɛ bɔ bɛ kra kuro ɔ nhyɛsoɛ so; sɔ yeɛ bɛbɔ nu bɛbɔ porɛ tɛɛ ɔ.

⁴Bɛ nu sona paa ne po ɔte kyɛ ɛfone, bɛ nu teneneeniɛ paa ne, ɔte mmowue anoa tworɔntworɔn; w’awɛmvoɛ mɔ kyẽa ne, ɔne w’asohwenɛ kyẽa ne ɔ́ba, bɛ basabasayɔlɛ mmerɛ ne wadwu.

⁵Nnɛma ɛmɔde abiɛngoɛ bedi, yeɛ nnɛma ɛmɔfa ɛmɔ wora bewura adamvoa nu. Ɛye bɔ ɔla wɔ kunu ne, ye po nea yé wɔ ngɔmɔ bɔ ɛne ye bedi ɔ nwo.

⁶ Ofikyɛ baa bienzua bu seɛ animtia, yeɛ baa brasua dwɔso tia oni; sia brasua dwɔso tia ye sia brasua, sona ye pɔfoɛ mɔ ole ye bɔbɔ deinn ye awuro ama.

⁷Yiti me de, AWURADE yeɛ me nye la ye so ɔ; ngɔfa me wora ngowura me ngoalelɛ Nyameɛ nu; me Nyameɛ kotie me.

⁸Wɔ, me pɔfoɛ, nnɛdi me nwo ahurusi; sɛ mefi ase a, ngodwɔso, sɛ nde awosii nu a, AWURADE yeɛ ɔkɔyɛ me kanea ɔ.

⁹AWURADE ahonehulɛ ne, mede meto nu, ofikyɛ mayɔ bɔne matia ye, kɔpem kyɛ okoli me dwirɛ kɔma me, ná okobua ndɛen turoloo kɔma me ɔ. Ɔkɔye me kofite kɔwa hyireinn nu, na ngonwu ye tenenee ne.

¹⁰Afei, me pɔfoɛ ne konwu ye, na animguaseɛ kɔhã ye, ye bɔ obisa me kyɛ, “AWURADE wɔ Nyameɛ ne, ɔwɔ ni?” ne. Ngɔfa me nye ngɔnea ye, na afei bekotiatia ye so kyɛ dwaaso asaa.

¹¹Kyẽa bɔ odi kyɛ besi wɔ fasue nemɔ nen, sɔ kyẽa ne yeɛ bɛkɔtrɛ ɛwɛen ne anu bɛkɔhɔ dedeede ɔ.

¹²Na sɔ kyẽa ne koso, okofi Asiria ne Misraim nguro nemɔ aso kɔwa wɔ berɛ, okofi Misraim koodwu asue ne, okofi ɛpo kɔɔhã ɛpo, yeɛ okofi bokaa koodwu bokaa.

¹³Nakoso aseɛ ne kɔkakyi kurofoen, ɔnate so ama nemɔ ati, ɔnate bɛ yɔleɛ ti.

¹⁴Wɔ pɔmaa ne, fa nea wɔ maen so, mmoaen kure bɔ bɛte w’agyapadeɛ, bɔ bɛ ngome bɛte ɛhɔayeɛ ne anu, wɔ Kamɛl so ne; maa bedidi wɔ Basan ne Gileade, kyɛ daa tete ne ala.

¹⁵Ngɔye anwanwadeɛ ali ngohyire ye, kyɛ mmerɛ bɔ efili Misraim aseɛ so ɛwale ne ala.

¹⁶Maen maen mɔ konwu ye, na bɛ nyunu kogua ase, b’anwoserɛ amukoraa si ne. Bɛkɔfa bɛ sa bɛkɔto bɛ noa, na bɛ so koti.

¹⁷Bɛkɔtafe nnɛterɛ kyɛ ewoo, kyɛ ngaka bɔ bɛtwe bɛ nwo ase ɔ. Bele anwopopolɛ bekofi b’anwoserɛ afealeɛ mɔ nu bekofite; bɛkɔfa esuronyi bɛkɔwa AWURADE yɛ Nyameɛ berɛ, na ɔnate wɔ ti bekosuro.

¹⁸Nwa yeɛ ɔte Nyameɛ kyɛ wɔ, bɔ ɔfa amumuyɛɛ kyɛ, bɔ obu ye nye gua ye agyapadeɛ ngaa bɛ mmeraatolɛ so ɔ? Ɔmma ye yaafɛlɛ ndena berɛ afebɔɔ, ofikyɛ ye nye gye anwumvoinnwunɛ nwo.

¹⁹Okosa konwu yɛ anwumvoin, okoli y’amumuyɛɛ so ngonim; na ekofindi bɛ bɔne amukoraa kogua ɛpo buma ne anu.

²⁰ Ɛkɔye nahorɛlilɛ ali kohyire Yakob, ɔne anwumvoinnwunɛ ali kohyire Abraham, kyɛbɔ ata ye nwo ndaen ahyire yɛ nana mɔ fi daa tete ne.