Read Sehwi Nahum 1 Bible Online

Nahum 1 - Sehwi bible

Nahum 1

¹Nyekyire bɔ ɔfa Ninewe nwo ɛhe. Elkoseniɛ Nahum ye nyekyire nwomaa ne ɛhe.

²Nyameɛ ɔtwe nungunɛ, na ɔte AWURADE bɔ ɔtɔ wereɛ ɔ. AWURADE tɔ wereɛ, na ye yaafɛlɛ te piri; AWURADE tɔ bɛ bɔ bekyi ye ɔ so wereɛ, na ye ahonehulɛ wɔ berɛ ma ye pɔfoɛ mɔ.

³ AWURADE ahone onhu ndɛ, ye tumi te piri; na ongobua bɔ odi fɔ ɔ be le. AWURADE atee la mvrama bɔ ɔpɛ ye nwo, ɔne mvrama bɔ otu serɛserɛ ɔ nu, na munungum te ye gya bo mvuture.

⁴Ɔkã ɛpo nyunu, na ɔmaa ɔwewe, ɔwewe asue amukoraa; Basan ne Kamɛl kese, na Lebanon nyerɛen twindwam.

⁵Mmokaa nemɔ woso wɔ ye nyunu, na pambaa nemɔ behuro, aseɛ yera wɔ ye nyunu, amba, wiase ne bɔ ɔwɔ nu amukoraa.

⁶Nwa yeɛ ɔkɔhora kogyina ye ahonehulɛ ne nyunu ɔ? Nwa yeɛ ɔkɔhora kogyina ye yaa noa hyerɛhyerɛ ne noa ɔ? Ye yaafɛlɛ ne hwie gua kyɛ see, na ɔma nyɔbotaen mɔ nu dwudwa.

⁷AWURADE te paa, ɔte amaneɛnwunɛ mmerɛ nu anwoserɛ afealeɛ, na ɔse bɛ bɔ bɛfa bɛ wora bewura ye nu ɔ.

⁸Nakoso bɛ bɔ bekyi ye de, ɔkɔfa nzue bɔ oyi bu fa so ɔ konua bɛ boso, na ɔkɔfoa ye pɔfoɛ mɔ kɔhɔ awosii nu.

⁹Nzikyɛ porɛ yeɛ ɛmɔbɔ bɛfa AWURADE nwo ye? Okonua ɛmɔ boso bɔkɔɔ, ye de, onua nikye boso bɔkɔɔ bɔ onnua ye ye pɛen nyɔ so ɔ.

¹⁰Mmerɛ bɔ batoatoa nu kyɛ mmowue, ná babobo kyɛ akɔnomnzafoɛ nen, ɔkɔyera bɛ kyɛ ɛserɛ worowaa.

¹¹Ebie bɔ ɔdwene AWURADE nwo tɛɛ, bɔ ɔte foɛtulɛniɛ bɔnefoɛ ɔ, wɔ nu yeɛ wafi wawa ɔ.

¹²“Ɔwɔ nu kyɛ bɛ nwo yɛ se, yeɛ bɛsone de, nakoso bekohũhũ bɛ bekogua ma bɛ boso konua. Ɔwɔ nu kyɛ mamaa afa yealɛ nu de, nakoso mengɔma ɛngɔfa yealɛ nu ko, AWURADE noa dwirɛ ɛne.

¹³Afei, ngobubu ye kɔnnua ne anu ngofi wɔ so, na ngɔtete wɔ nyamaa bɔ ɔkyekye wɔ nemɔ anu.”

¹⁴AWURADE ahyɛ wɔ nwo mmeraa kyɛ, “Wɔ dumaa komini kofi aseɛ ye aso: Na mmosoen bɔ base ne mmosoen bɔ bahuro nikyee bafa bayɔ ne, ngɔpra bɛ bo ngofi wɔ nyameɛ mɔ b’awuro. Ngofu w’asieleɛ, ofikyɛ wɔ nwo ayɛ fitii.”

¹⁵ Nea mmokaa nemɔ aso dɔ kyɛ ɔba ɔ, bɔ ɔso ndɛenvɛen, bɔ ɔbɔ asomdwee nwo dawure ne! Ao Yuda, di w’aluolue krongron nemɔ, tua w’aboadeɛ nemɔ, ofikyɛ bɔnefoɛ ne ngɔfa koɛ ngɔtoa wɔ ko, bama ye boso amini bɔkɔɔ.