Read Sehwi Nahum 3 Bible Online

Nahum 3 - Sehwi bible

Nahum 3

¹Awuelilɛ kuro, wɔ yaakɔ oo! Ngondombo ne awerɔm awue yeɛ wayi ye to ɔ, apaabɔlɛ bo ɔngɔpɛ wɔ ye nu.

²Mbirefinɛ pralalala, yeɛ teaseɛnam gya kirikirikiri, mbɔngɔ bɔ behuru bɛpepe, teaseɛnam mɔ bɔ behuruhuru.

³Pɔngɔhanɛfoɛ bɛko bɛkɔ bɛ nyunu, bɛ ngrandɛ te yerɛmyerɛm, yeɛ bɛ pealɛɛ te hyɛmhyɛm, bɛ bɔ batotɔ ɔ bɛte pee, efuin mɔ bahonhɔn bɛ bahɔ anwuro, efuin mɔ somaa bɔ bɛka a bennwu ye noa ɔ, na bɛfofo efuin mɔ so besoti.

⁴Na gyanderaniɛ ne, ɔnate ye gyanderabɔlɛ somaa ne ati, sɔ ngonyaayelɛfoɛ hemmaa anwonyemene ne, bɔ ɔfa ye adwamanbɔlɛ ɔtɔne maen maen mɔ, ná ɔfa ngonyaayelɛ ɔtɔne mmusua ɔ.

⁵Tie, meko metia wɔ, Asafo AWURADE noa dwirɛ ɛne. Ngopuro w’ataadeɛ ngɔfa wɔ nyunu, ngɔma maen maen mɔ bekonwu w’adagya, na ahennie mɔ bekonwu w’animguaseɛ.

⁶Ngogyi akyiwadeɛ fitii ngogua wɔ so, ngobu wɔ animtia, ngɔmaa ɛkɔkakyi nikyee bɔ mmenia tu bɛ nye begua ye so ɔ.

⁷Na ɔkɔwa kyɛ, ebiala bɔ ye nye kɔbɔ wɔ so ne, ɔkɔnwati kofi wɔ nwo, na ɔkɔhã kyɛ, Ninewe akakyi kurofoen! Nwa yeɛ okoli ye nwo aworabɔlɛ ɔ? Nisua yeɛ ngonya aworakyekyerɛfoɛ ngɔma ye ɔ?

⁸Aso ɛte paa tra No Amon[1] bɔ ɔla asue piri ne noa, bɔ asue mɔ bapɛ ye nwo bayia, bɔ ɛpo te ye ɛwaen, ná asue mɔ bɛte ye fasue ne?

⁹Yitiopia ne Misraim bɛte ye anwoserɛ, anwoserɛ bɔ ye bo ɔmbɛ ɔ. Né Pute ne Libiafoɛ bɛte wɔ bokafoɛ mɔ.

¹⁰Nakoso bɛhyele ye nnure bɛhɔle, na ɔhɔle ngoaasolɛ nu; ye ngwadaa mɔ koso, bɛtele bɛ ti bɛbɔle mane bɛ nu tetele nzɔkanzɔka wɔ borɔnoɛ biala ngwandaa; beguale serewa bɛfa bɛhyɛle ye animnyamfoɛ nemɔ bɛfale, na beguale ye atitirefoɛ nemɔ amukoraa ngɔnzɔngɔnzɔ.

¹¹Wɔ koso, ɛkɔno nzaa kɔbo, na ɛkɔɔfea, na ɔnate pɔfoɛ ne ati ɛkɔpena afealeɛ.

¹²W’anwoserɛ afealeɛ amukoraa kɔyɛ kyɛ borɔdoma mmakaa bɔ borɔdoma mmaa bɔ wali moa wasu ɔ wɔ so ɔ. Sɛ bɛwoso ye a, ɔtete gua sona bɔ odi ne noa nu.

¹³Nea! Wɔ koɛhonɛfoɛ nemɔ bɔ bɛwɔ wɔ nu ne, bakakyi mmrasua. W’aseɛ ne aso pambim nemɔ, bɛlela berɛ hambonnwu ma wɔ pɔfoɛ mɔ, na see ayera mmuralɛ bɔ bɛbrambram wɔ pambim mɔ asi ne.

¹⁴Ɔnate kuro ne tualɛ ne ati, sesa nzue sie; miamia w’anwoserɛ afealeɛ nemɔ anu, dɔne nnɛterɛ fa pɛ mmerekese, ná miamia bɔ bɛfa bɛpɛ mmerekese ne anu yé.

¹⁵Berɛ yeɛ see kɔyera wɔ ɔ, ngrandɛ ne konua wɔ boso, ɔkɔpesa wɔ kyɛ abɛbɛ piri, Wɔ de, ta pee kyɛ mmɛbɛ mbiri, ta pee kyɛ torɔka.

¹⁶Ama wɔ dwaalilɛfoɛ nemɔ basone batra ewienu nzramaa; ɛsaa ne odi nningyein, na ɔnwati kɔ.

¹⁷W’atitire mɔ bɛte kyɛ mmɛbɛ, wɔ safohene mɔ bɛte kyɛ torɔka bɔ ɛyerɛ ba a, bɛtenatena ɛwaen so ɔ. Nakoso sɛ eyia pukye a, betu bɛkɔ, na ebiala nze nekaa bɔ bɛwɔ ɔ.

¹⁸Ao Asiria hene, wɔ neafoɛ nemɔ balela, w’atitire nemɔ bɛtɔ ngosie, wɔ mmenia nemɔ babɔ aya wɔ mmokaa nemɔ aso bɔ ebiala ɔmmoaboa bɛ noa ɔ.

¹⁹Wɔ ngena nemɔ bɛte kenangɔ, na wɔ ngena nemɔ batu. Ebiala bɔ ɔkɔte wɔ nga ne, ɔkɔbɔ ye sa nu kogua wɔ so, ofikyɛ wɔ bɔne yɔleɛ bɔ ye bo mbɛ ne, nwa yeɛ amva angɔ ye so ɔ?