Read Sehwi Sefania 2 Bible Online

Sefania 2 - Sehwi bible

Sefania 2

¹Ɛmɔ, nyanzoen maen, ɛ́mɔhã ɛmɔ nwo bɛ́bɔ nu, ɛ́mɔboaboa ɛmɔ noa!

²Nnɛma ɛmɔtena berɛ maa ɔhyehyɛ sɔ koraka, kyẽa bɔ ɔsẽ kɔ kyɛ afafu bɔ mvrama bɔ ye kɔ ne, nnɛmɔma ɔba koraka, nnɛmɔma AWURADE ɛyaafɛlɛ piri ne ɔba ɛmɔ so koraka, nnɛmɔma AWURADE ahonehulɛ kyẽa ne ɔba ɛmɔ so koraka.

³Ɛmɔ, ɛ́mɔpena AWURADE, aseɛ ne asofoɛ bɔ ɛmɔbrɛ ɛmɔ nwo ase ɔ, bɔ ɛmɔdi AWURADE mmeraa dwirɛ so ɔ! Ɛ́mɔpena tenenee si atee, ɛ́mɔpena anwobrɛaseɛ si atee; ebiaa né wamaa ɛmɔanya ɛmɔ ti badidi nu wɔ AWURADE ahonehulɛ kyẽa ne.

⁴ Gasa kɔkakyi kuro bɔ batu bafi so ɔ, yeɛ Asekelɔn kɔkakyi kurofoen, bekotu Asedɔde bekofi berɛ eyiagyina, yeɛ bekotutu Ekron bo bɔkɔɔ.

⁵Mboanoafoɛ, ɛmɔ yaakɔ oo, Keretifoɛ maen ne! AWURADE dwirɛ ne obua ɛmɔ foɛ; O Kanaan bɔ ɔte Filistifoɛ aseɛ ɔ, ngɔbɔ wɔ tɔɔ, na bɔ ɔwɔ wɔ nu biala ngɔha wɔ wɔ nu.

⁶Mboanoa aseɛ ne kɔkakyi nekaa bɔ ngaka didi ɔ, ɔne mmoaenneafoɛ bɛ namue ne mmoaennduin.

⁷Mboanoa aseɛ ne kɔyɛ Yuda awuro ama bɔ banya bɛ ti badidi nu ɔ bɛ deɛ, bɔ bɛkɔfa ngaka bɛkɔhɔ so adidie ɔ, na Asekelɔn awuro mɔ nu yeɛ bekobutubutu nɔsoa ɔ; ofikyɛ AWURADE bɛ Nyameɛ kɔpɛ ye nye kɔnea bɛ, na ɔkɔfa bɛ bɔ bahye bɛ nnure nemɔ kosa kɔwa.

⁸ “Mate Moabo anyingahanɛ ne, yeɛ alapaa bɔ Amonfoɛ bɛfa bɛbɔ me maen ne, ɔne kyɛ bele anwomasoɛ bede me maen aseɛ ne ɔ.

⁹Yiti, kyɛbɔ nde ase ye, amba, Moabo kɔkakyi kyɛ Sodom, yeɛ Amonfoɛ bɛkɔkakyi kyɛ Gomora, ndetema ne ngyee ngumaa aseɛ ne aseɛ pralaa afebɔɔ. Na me maen mmaa bɔ bɛkɔha ne, bɛkɔfẽ bɛ bɛkɔfa, yeɛ me maen mmaa bɔ bekonya bɛ ti bekodidi nu ne, bɛkɔfa bɛkɔyɛ bɛ deɛ, Asafo AWURADE, Yisrael Nyameɛ noa dwirɛ ɛne.”

¹⁰B’anwomasoɛ ne, ye nwo akatuaa ɛne, ɔnate alapaa bɔ babɔ, ɔne anwomasoɛ bɔ bayɛ ye wɔ Asafo AWURADE maen ne aso ne ati.

¹¹AWURADE nye kɔboro bɛ so, ofikyɛ okonua aseɛ so mmosoen amukoraa bɛ boso, na asue noa maen maen ne amukoraa, sona biala kɔsɔne ye wɔ ye bɔbɔ ye aseɛ so.

¹² “Ɛmɔ, Yitiopiafoɛ, ɛmɔ koso, me ngrandɛ noa yeɛ ɛmɔkɔtotɔ ɔ.

¹³ Ɔkɔfa koɛ kɔɔteta sorɔ dɔ maen ne, na ɔkɔbɔ Asiria tɔɔ; ɔkɔkakyi Ninewe kurofoen maa ɔkɔyɛ pralaa kyɛ ɛserɛ so.

¹⁴Ngaka kure kure kɔɔlela nu, maen maen mɔ nu ngaka mukoraa: nandwinoma ne mbɛsɛ kɔtena ye sua buburuwaa nemɔ aso, bɛkɔte nnomaa suɛ wɔ ye mboma nemɔ anu, ye aponnwaa nemɔ kodwiri kogua, ofikyɛ ye sida bakaa mbuna nemɔ nwo kɔlela berɛ.

¹⁵Anwomasoɛ kuro bɔ né ye so anu atɔ ye ne, ye ɛne oo, ye bɔ osele ye nwo kyɛ, “Me ɛne, ebiala nne berɛ ko bɔ ɔte kyɛ me ɔ” ne. Nea kyɛbɔ wasi wakakyi kurofoen ɔ, kyɛbɔ wakakyi ngaka dabea ɔ! Ebiala bɔ ɔkɔpɛ nu berɛ ne, ɔkɔwoso ye ti kosobi ye noa.